Read Библия Церковнославянская Е҆сѳи́рь 9 Bible Online

Е҆сѳи́рь 9 - Библия Церковнославянская bible

Е҆сѳи́рь 9

¹Во вторыйна́десѧть мц҇ъ, и҆же є҆́сть а҆да́ръ, въ третїйна́десѧть де́нь мц҇а прїидо́ша писа҄нїѧ ѿ царѧ̀.

²Въ то́й же день погибо́ша сѹпоста́ты ї҆ѹде́євъ: ни є҆ди́нъ бо сопроти́висѧ и҆̀мъ боѧ́сѧ и҆́хъ.

³Нача́лствѹющїи бо стра́намъ и҆ власти́телїе и҆ ца́рстїи книгѡ́чїѧ почита́хѹ ї҆ѹдє́й:

⁴стра́хъ бо мардохе́евъ належа́ше на ни́хъ.

⁵Приложи́сѧ бо повелѣ́нїе царе́во и҆менова́тисѧ є҆мѹ̀ по всемѹ̀ ца́рствїю.

⁶И҆ въ сѹ́сѣхъ гра́дѣ и҆зби́ша ї҆ѹде́є пѧ́ть сѡ́тъ мѹже́й:

⁷Фарса́на, неста́нна и҆ делфѡ́на, и҆ фасга́на

⁸и҆ фардаѳа́на, и҆ варе́а и҆ сарвака́на,

⁹и҆ мармасі́ма и҆ рѹфе́а, и҆ а҆рсе́а и҆ завѹѳеѳа́ма,

¹⁰де́сѧть сынѡ́въ а҆ма́на а҆мадаѳѹ́ева вѹге́анина врага̀ ї҆ѹдеѡмъ, и҆́же ѿ ѳармаѳе́а, и҆ разгра́биша въ то́й де́нь (и҆мѣ҄нїѧ и҆́хъ):

¹¹и҆ сказа́ша число̀ и҆збїе́нныхъ царю̀ въ сѹ́сѣхъ гра́дѣ.

¹²И҆ речѐ ца́рь ко є҆сѳи́ри: и҆зби́ша ї҆ѹде́є въ сѹ́сѣъ гра́дѣ пѧ́ть сѡ́тъ мѹже́й, по ѡ҆крє́стнымъ же страна́мъ коли́кѡ, мни́ши, погѹби́ша; и҆ чесогѡ̀ є҆щѐ проси́ши, и҆ бѹ́детъ тѝ;

¹³И҆ речѐ є҆сѳи́рь ко царю̀: да да́стсѧ та́кожде ї҆ѹде́ѡмъ твори́ти заѹ́тра, ѩ҆́кѡ да повѣ́сѧтъ де́сѧть сынѡ́въ а҆ма́новыхъ.

¹⁴И҆ повелѣ̀ ца́рь та́кѡ бы́ти, и҆ попѹстѝ ї҆ѹде́ѡмъ внѣ̀ гра́да повѣ́сити тѣлеса̀ сынѡ́въ а҆ма́новыхъ.

¹⁵И҆ собра́шасѧ ї҆ѹде́є, и҆̀же въ сѹ́сѣхъ, въ четвертыйна́десѧть дее́нь а҆да́ра, и҆ и҆зби́ша мѹже́й три́ста, и҆ ничто́же разгра́биша.

¹⁶Про́чїи же ї҆ѹде́є, и҆̀же во ца́рствїи, собра́шасѧ и҆ себѣ̀ помога́хѹ и҆ почи́ша ѿ бра́ней: и҆зби́ша бо ѿ ни́хъ пѧтьна́десѧть ты́сѧщъ въ третїйна́десѧть а҆да́ра, и҆ ничто́же расхи́тиша.

¹⁷И҆ почи́ша въ четвертыйна́десѧть де́нь тогѡ́жде мц҇а и҆ провожда́хѹ то́й де́нь ѹ҆покое́нїѧ съ ра́достїю и҆ весе́лїемъ.

¹⁸Ї҆ѹде́є же въ сѹ́сѣхъ гра́дѣ собра́шасѧ и҆ въ четвертыйна́десѧть почи́ша: проводи́ша же и҆ пѧтыйна́десѧть съ ра́достїю и҆ весе́лїемъ.

¹⁹Сегѡ̀ ра́ди ї҆ѹде́є разсѣ́ѧннїи во всѧ́цѣй странѣ̀ внѣ́шней провожда́ютъ четвертыйна́десѧть де́нь а҆да́ра бла́гъ съ весе́лїемъ, посыла́юще ча҄сти кі́йждо бли́жнемѹ: живѹ́щїй же въ митропо́лїѧхъ и҆ въ пѧтыйна́десѧть де́нь а҆да́ра весе́лїѧ благі́й провожда́ютъ, посыла́юще ча҄сти бли҄жним.

²⁰Написа̀ же мардохе́й словеса̀ сїѧ҄ въ кни́гѹ и҆ посла̀ ї҆ѹде́ѡмъ, є҆ли́цы бѣ́ша въ ца́рствїи а҆ртаѯе́рѯовѣ, бли́з̾ и҆ дале́че сѹ́щымъ,

²¹ѹ҆ста́вити дни҄ сїѧ҄ бла҄ги, є҆́же провожда́ти четвертыйна́десѧть и҆ пѧтыйна́десѧть де́нь а҆да́ра:

²²въ си́хъ бо дне́хъ почи́ша ї҆ѹде́є ѿ вра҄гъ свои́хъ: и҆ мц҇ъ а҆да́ръ, и҆́же ѡ҆брати́сѧ и҆̀мъ ѿ пла́ча въ ра́дость и҆ ѿ болѣ́зни во благі́й де́нь, провожда́ти ве́сь во благи́хъ дне́хъ ра́дости и҆ весе́лїѧ, посыла́юще ча҄сти ко дрѹгѡ́мъ и҆ ни́щымъ.

²³И҆ прїѧ́ша ї҆ѹде́є, ѩ҆́коже написа̀ и҆̀мъ мардохе́й:

²⁴ка́кѡ а҆ма́нъ а҆мадаѳѹ́евъ македѡ́нѧнинъ ра́товаше ї҆ѹдеєвъ, и҆ ка́кѡ и҆знесѐ сѹ́дъ и҆ жре́бїй, є҆́же погѹби́ти и҆̀хъ,

²⁵и҆ ѩ҆́кѡ вни́де ко царю̀, глаго́лѧ, да повѣ́ситъ мардохе́а: є҆ли҄ка нача̀ наводи́ти на ї҆ѹдє́и ѕла́ѧ, на него̀ бы́ша, и҆ повѣ́шенъ бы́сть са́мъ и҆ ча҄да є҆гѡ̀.

²⁶Сегѡ̀ ра́ди нареко́шасѧ дні́е сі́и фѹрі́мъ ра́ди жрє́бїй, занѐ дїале́ктомъ и҆́хъ жрє́бїи нарица́ютсѧ фѹрі́мъ, ра́ди слове́съ є҆пїсто́лїи сеѧ̀, и҆ є҆ли҄ка пострада́ша си́хъ ра́ди, и҆ є҆ли҄ка и҆̀мъ приключи́шасѧ.

²⁷Ѹ҆ста́ви ѹ҆́бѡ, и҆ та́кѡ прїѧ́ша ї҆ѹде́є на себѐ и҆ на сѣ́мѧ своѐ и҆ на ириложи́вшихсѧ къ ни҄мъ, нижѐ и҆на́че да ѹ҆потреблѧ́ютъ: дні́е же сі́и па́мѧти соверша́еми по ро́дѹ и҆ ро́дѹ, и҆ гра́дѹ и҆ ѻ҆те́чествѹ и҆ странѣ̀.

²⁸Дні́е же сі́и фѹрі́мъ да провожда́ютъ во всѧ́кое лѣ́то, и҆ па́мѧть да не ѡ҆скѹдѣ́етъ ѿ родѡ́бъ.

²⁹И҆ написа̀ є҆сѳи́рь царица дщѝ а҆мїнада́влѧ и҆ мардохе́й ї҆ѹде́анинъ, є҆ли҄ка сотвори́ша во ѹ҆твержде́нїе є҆пїсто́лїи ѡ҆ дне́хъ фѹрі́мъ.

³⁰И҆ мардохе́й и҆ є҆сѳи́рь цари́ца ѹ҆ста́виста себѣ̀ са́ми, и҆ тогда̀ ѹ҆ста́виста въ постѣ̀ свое́мъ совѣ́тъ сво́й.

³¹И҆ є҆сѳи́рь сло́во поста́ви во вѣ́ки, и҆ напи́сано бы́сть въ па́мѧть.