Read Библия Церковнославянская И҆схо́дъ 11 Bible Online

И҆схо́дъ 11 - Библия Церковнославянская bible

И҆схо́дъ 11

¹Рече́ же гд҇ь къ мѡѷсе́ю: є҆щѐ є҆ди́нѹ ѩ҆́звѹ а҆́зъ наведѹ̀ на фараѡ́на и҆ на є҆гѵ́петъ, и҆ по си́хъ ѿпѹ́ститъ вы̀ ѿсю́дѹ: є҆гда́ же ѿпѹ́ститъ вы̀ со всѣ́мъ, и҆зжене́тъ ва́съ и҆згна́нїемъ:

²глаго́ли ѹ҆̀бо ѡ҆́тай во ѹ҆́шы лю́демъ, и҆ да и҆спро́ситъ кі́йждо ѹ҆ сосѣ́да, и҆ жена̀ ѹ҆ сосѣ́ды своеѧ̀ сосѹ́ды срє́брѧны и҆ зла҄ты, и҆ ри҄зы.

³Гд҇ь же дадѐ блгдть лю́демъ свои҄мъ пред̾ є҆гѵ҄птѧны, и҆ да́ша и҆̀мъ. Человѣ́къ же мѡѷсе́й вели́къ бы́сть ѕѣлѡ̀ пред̾ є҆гѵ҄птѧны и҆ пред̾ фараѡ́номъ, и҆ пред̾ рабы҄ є҆гѡ̀ и҆ пред̾ ѻ҆чи́ма всѣ́хъ люді́й.

⁴И҆ речѐ мѡѷсе́й: сїѧ҄ гл҃етъ гд҇ь: въ полѹ́нощи а҆́зъ вни́дѹ посредѣ̀ є҆гѵ́пта.

⁵И҆ и҆́змретъ всѧ́къ пе́рвенецъ въ землѝ є҆гѵ́петстѣй, ѿ пе́рвенца фараѡ́нова, и҆́же сѣди́тъ на престо́лѣ, и҆ да́же до пе́рвенца рабы́ни, ѩ҆́же ѹ҆ же́рнѡвъ, и҆ до пе́рвенца всѧ́кагѡ скота̀:

⁶и҆ бѹ́детъ во́пль вели́къ по все́й землѝ є҆гѵ́петстѣй, ѩ҆ко́въ не бѣ̀, и҆ тако́въ ктомѹ̀ не бѹ́детъ.

⁷Во всѣ́хъ же сынѣ́хъ ї҆и҃левыхъ не поско́млетъ пе́съ ѧ҆зы́комъ свои́мъ, ѿ человѣ́ка до скота̀: да ѹ҆́зриши є҆ли́кѡ просла́витсѧ гд҇ь междѹ̀ є҆гѵ҄птѧны и҆ сынмѝ ї҆и҃левыми:

⁸и҆ прїи́дѹтъ всѝ ѻ҆́троцы твоѝ сі́и ко мнѣ̀ и҆ покло́нѧтсѧ мнѣ̀, глаго́люще: ѿидѝ ты̀, и҆ всѝ лю́дїе твоѝ, и҆̀хже ты̀ ѿво́диши: и҆ по си́хъ ѿидѹ̀. И҆зы́де же мѡѷсе́й ѿ фараѡ́на со гнѣ́вомъ.

⁹И҆ речѐ гд҇ь къ мѡѷсе́ю: не послѹ́шаетъ ва́съ фараѡ́нъ, да ѹ҆множа́ѧ ѹ҆мно́жѹ зна́мєнїѧ моѧ҄ и҆ чѹдеса̀ въ землѝ є҆гѵ́петстѣй.

¹⁰Мѡѷсе́й же и҆ а҆арѡ́нъ сотвори́ша всѧ҄ зна́мєнїѧ и҆ чѹдеса̀ сїѧ҄ пред̾ фараѡ́номъ: и҆ ѡ҆жесточѝ гд҇ь се́рдце фараѡ́ново, и҆ не восхотѣ̀ ѿпѹсти́ти сынѡ́въ ї҆и҃левыхъ ѿ землѝ є҆гѵ́петскїѧ.