Read Библия Церковнославянская И҆схо́дъ 14 Bible Online

И҆схо́дъ 14 - Библия Церковнославянская bible

И҆схо́дъ 14

¹И҆ речѐ гд҇ь къ мѡѷсе́ю гл҃ѧ:

²рцы̀ сынѡ́мъ ї҆и҃лєвымъ, и҆ ѡ҆брати́вшесѧ да ѡ҆полча́тсѧ прѧ́мѡ придво́рїю, междѹ̀ магдѡ́ломъ и҆ междѹ̀ мо́ремъ, прѧ́мѡ веельсепфѡ́нѹ: пред̾ ни́ми ѡ҆полчи́шисѧ при мо́ри:

³и҆ рече́тъ фараѡ́нъ лю́демъ свои҄мъ ѡ҆ сынѣ́хъ ї҆и҃левыхъ: заблѹжда́ютъ сі́и по землѝ, затвори́ бо и҆̀хъ пѹсты́нѧ:

⁴а҆́зъ же ѡ҆жесточѹ̀ се́рдце фараѡ́ново, и҆ пожене́тъ созадѝ и҆́хъ, и҆ просла́влюсѧ въ фараѡ́нѣ и҆ во все́мъ во́инствѣ є҆гѡ̀: и҆ ѹ҆разѹмѣ́ютъ всѝ є҆гѵ́птѧне, ѩ҆́кѡ а҆́зъ є҆́смь гд҇ь. И҆ сотвори́ша та́кѡ.

⁵И҆ возвѣще́но бы́сть царю̀ є҆гѵ́петскомѹ, ѩ҆́кѡ бѣжа́ша лю́дїе, и҆ преврати́сѧ се́рдце фараѡ́ново и҆ рабѡ́въ є҆гѡ̀ на лю́ди, и҆ реко́ша: что̀ сїѐ сотвори́хомъ, ѿпѹсти́вше сы́ны ї҆и҃лєвы, да не рабо́таютъ на́мъ;

⁶Впрѧжѐ ѹ҆̀бо фараѡ́нъ колєсни́цы своѧ҄, и҆ всѧ҄ лю́ди своѧ҄ собра̀ съ собо́ю:

⁷и҆ поѧ́тъ ше́сть сѡ́тъ колесни́цъ и҆збра́нныхъ, и҆ всѧ҄ ко́ни є҆гѵ́пєтскїѧ, и҆ трїста́ты над̾ всѣ́ми.

⁸И҆ ѡ҆жесточѝ гд҇ь се́рдце фараѡ́на царѧ̀ є҆гѵ́петскагѡ и҆ рабѡ́въ є҆гѡ̀, и҆ погна̀ созадѝ сынѡ́въ ї҆и҃левыхъ. Сы́нове же ї҆и҃лєвы и҆схожда́хѹ рѹко́ю высо́кою.

⁹И҆ погна́ша є҆гѵ́птѧне в̾слѣ́дъ и҆́хъ, и҆ ѡ҆брѣто́ша и҆̀хъ ѡ҆полчи́вшихсѧ при мо́ри: и҆ всѧ҄ ко́ни и҆ колєсни́цы фараѡ́нѡвы, и҆ кѡ́нницы, и҆ во́инство є҆гѡ̀ прѧ́мѡ придво́рїю, проти́вѹ веельсепфѡ́на.

¹⁰И҆ фараѡ́нъ приближа́шесѧ. Воззрѣ́вше же сы́нове ї҆и҃лєвы ѻ҆чи́ма, ви́дѣша: и҆ сѐ, є҆гѵ́птѧне ѡ҆полчи́шасѧ в̾слѣ́дъ и҆́хъ: и҆ ѹ҆боѧ́шасѧ ѕѣлѡ̀, и҆ возопи́ша сы́нове ї҆и҃лєвы ко гд҇ѹ

¹¹и҆ реко́ша къ мѡѷсе́ю: за є҆́же не бы́ти гробѡ́мъ во є҆гѵ́птѣ, и҆зве́лъ є҆сѝ на́съ ѹ҆мертви́ти въ пѹсты́ни: что̀ сїѐ сотвори́лъ є҆сѝ на́мъ, и҆зве́дъ на́съ и҆з̾ є҆гѵ́пта;

¹²не се́й ли бѧ́ше глаго́лъ, є҆го́же реко́хомъ къ тебѣ̀ во є҆гѵ́птѣ, глаго́люще: ѡ҆ста́ви на́съ, да рабо́таемъ є҆гѵ́птѧнѡмъ: лѹ́чше бо бѧ́ше на́мъ рабо́тати є҆гѵ́птѧнѡмъ, не́жели ѹ҆мре́ти въ пѹсты́ни се́й.

¹³Рече́ же мѡѷсе́й къ лю́демъ: дерза́йте, сто́йте и҆ зри́те сп҇нїе є҆́же ѿ гд҇а, є҆́же сотвори́тъ на́мъ дне́сь: и҆́мже бо ѡ҆́бразомъ ви́дѣсте є҆гѵ́птѧнъ дне́сь, не приложитѐ ктомѹ̀ ви́дѣти и҆̀хъ въ вѣ́чное вре́мѧ:

¹⁴гд҇ь побо́ретъ по ва́съ, вы́ же ѹ҆мо́лкните.

¹⁵И҆ речѐ гд҇ь къ мѡѷсе́ю: что̀ вопїе́ши ко мнѣ̀; рцы̀ сынѡ́мъ ї҆и҃лєвымъ, и҆ да пѹтеше́ствѹютъ,

¹⁶ты́ же возмѝ же́злъ тво́й и҆ прострѝ рѹ́кѹ твою̀ на мо́ре, и҆ расто́ргни є҆̀: и҆ да вни́дѹтъ сы́нове ї҆и҃лєвы посредѣ̀ мо́рѧ по сѹ́хѹ:

¹⁷и҆ сѐ, а҆́зъ ѡ҆жесточѹ̀ се́рдце фараѡ́ново и҆ всѣ́хъ є҆гѵ́птѧнъ, и҆ вни́дѹтъ в̾слѣ́дъ и҆́хъ: и҆ просла́влюсѧ въ фараѡ́нѣ и҆ во все́мъ во́инствѣ є҆гѡ̀, и҆ въ колесни́цахъ и҆ въ ко́нехъ є҆гѡ̀,

¹⁸и҆ ѹ҆вѣ́дѧтъ всѝ є҆гѵ́птѧне, ѩ҆́кѡ а҆́зъ є҆́смь гд҇ь, є҆гда̀ прославлѧ́юсѧ въ фараѡ́нѣ и҆ въ колесни́цахъ и҆ въ ко́нехъ є҆гѡ̀.

¹⁹Взѧ́тсѧ же а҆́гг҃лъ бж҃їй ходѧ́й пред̾ полко́мъ сынѡ́въ ї҆и҃левыхъ и҆ по́йде созадѝ и҆́хъ, взѧ́тсѧ же и҆ сто́лпъ ѡ҆́блачный ѿ лица̀ и҆́хъ и҆ ста̀ созадѝ и҆́хъ.

²⁰И҆ вни́де посредѣ̀ полка̀ є҆гѵ́петска и҆ посредѣ̀ полка̀ сынѡ́въ ї҆и҃левыхъ и҆ ста̀: и҆ бы́сть тма̀ и҆ мра́къ, и҆ прїи́де но́щь, и҆ не смѣси́шасѧ дрѹ́гъ съ дрѹ́гомъ во всю̀ но́щь.

²¹Простре́ же мѡѷсе́й рѹ́кѹ на мо́ре, и҆ возгна̀ гд҇ь мо́ре вѣ́тромъ ю҆́жнымъ си́льнымъ всю̀ но́щь, и҆ сотворѝ мо́ре сѹ́шѹ, и҆ разстѹпи́сѧ вода̀.

²²И҆ внидо́ша сы́нове ї҆и҃лєвы посредѣ̀ мо́рѧ по сѹ́хѹ, и҆ вода̀ и҆̀мъ стѣна̀ бы́сть ѡ҆деснѹ́ю и҆ стѣна̀ ѡ҆шѹ́юю.

²³Погна́ша же є҆гѵ́птѧне и҆ внидо́ша в̾слѣ́дъ и҆́хъ, и҆ всѧ́къ ко́нь фараѡ́новъ, и҆ колєсни́цы, и҆ вса́дники посредѣ̀ мо́рѧ.

²⁴Бы́сть же въ стра́жѹ ѹ҆́треннюю, и҆ воззрѣ̀ гд҇ь на по́лкъ є҆гѵ́петскїй въ столпѣ̀ ѻ҆́гненнѣмъ и҆ ѡ҆́блачнѣмъ, и҆ смѧтѐ по́лкъ є҆гѵ́петскїй,

²⁵и҆ свѧза̀ ѡ҆́си колесни́цъ и҆́хъ, и҆ ведѧ́ше и҆̀хъ съ нѹ́ждею. И҆ реко́ша є҆гѵ́птѧне: бѣжи́мъ ѿ лица̀ ї҆и҃лева, гд҇ь бо побора́етъ по ни́хъ на є҆гѵ́птѧны.

²⁶И҆ речѐ гд҇ь къ мѡѷсе́ю: прострѝ рѹ́кѹ твою̀ на мо́ре, и҆ да совокѹпи́тсѧ вода̀ и҆ да покры́етъ є҆гѵ́птѧны, колєсни́цы же и҆ вса́дники.

²⁷Простре́ же мѡѷсе́й рѹ́кѹ на мо́ре, и҆ ѹ҆стро́исѧ вода̀ ко дню̀ на мѣ́сто: є҆гѵ́птѧне же бѣжа́ша под̾ водо́ю, и҆ и҆стрѧсѐ гд҇ь є҆гѵ́птѧны посредѣ̀ мо́рѧ:

²⁸и҆ ѡ҆брати́вшисѧ вода̀ покры̀ колєсни́цы и҆ вса́дники и҆ всю̀ си́лѹ фараѡ́новѹ, вше́дши в̾слѣ́дъ и҆́хъ въ мо́ре: и҆ не ѡ҆ста̀ ѿ ни́хъ ни є҆ди́нъ.

²⁹Сы́нове же ї҆и҃лєвы проидо́ша по сѹ́хѹ посредѣ̀ мо́рѧ: вода́ же и҆̀мъ стѣна̀ (бы́сть) ѡ҆деснѹ́ю и҆ стѣна̀ ѡ҆шѹ́юю,

³⁰и҆ и҆зба́ви гд҇ь ї҆и҃лѧ въ де́нь ѡ҆́нъ и҆з̾ рѹкѝ є҆гѵ́петскїѧ: и҆ ви́дѣша сы́нове ї҆и҃лєвы є҆гѵ́птѧнъ и҆зме́ршихъ при краѝ мо́рѧ.

³¹Ви́дѣ же ї҆и҃ль рѹ́кѹ вели́кѹю, ѩ҆̀же сотворѝ гд҇ь є҆гѵ́птѧнѡмъ, и҆ ѹ҆боѧ́шасѧ лю́дїе гд҇а и҆ вѣ́роваша бг҃ѹ и҆ мѡѷсе́ю ѹ҆го́дникѹ є҆гѡ̀.

³²Тогда̀ воспѣ̀ мѡѷсе́й и҆ сы́нове ї҆и҃лєвы пѣ́снь сїю̀ гд҇ви, и҆ реко́ша глаго́люще: