Read Библия Церковнославянская И҆схо́дъ 16 Bible Online

И҆схо́дъ 16 - Библия Церковнославянская bible

И҆схо́дъ 16

¹Воздвиго́шасѧ же ѿ є҆лі́ма, и҆ прїи́де ве́сь со́нмъ сынѡ́въ ї҆и҃левыхъ въ пѹсты́ню сі́нъ, ѩ҆́же є҆́сть междѹ̀ є҆лі́момъ и҆ междѹ̀ сі́ною. Въ пѧ́тый же на́десѧть де́нь втора́гѡ мц҇а и҆зше́дшымъ и҆̀мъ ѿ землѝ є҆гѵ́петскїѧ,

²возропта̀ ве́сь со́нмъ сынѡ́въ ї҆и҃левыхъ на мѡѷсе́а и҆ а҆арѡ́на,

³и҆ реко́ша къ ни҄мъ сы́нове ї҆и҃лєвы: ѽ, дабы̀ бы́хомъ и҆зме́рли мы̀ ѹ҆ѧ́звени ѿ гд҇а въ землѝ є҆гѵ́петстѣй, є҆гда̀ сѣдѧ́хомъ над̾ котлы҄ мѧсны́ми и҆ ѩ҆до́хомъ хлѣ́бы до сы́тости: ѩ҆́кѡ и҆зведо́сте ны̀ въ пѹсты́ню сїю̀ ѹ҆мори́ти ве́сь со́нмъ се́й гла́домъ.

⁴Рече́ же гд҇ь къ мѡѷсе́ю: сѐ, а҆́зъ ѡ҆дождю̀ ва́мъ хлѣ́бы съ небесѐ: и҆ и҆зы́дѹтъ лю́дїе, и҆ соберѹ́тъ дово́лное дню̀, на (всѧ́къ) де́нь, ѩ҆́кѡ да и҆скѹшѹ̀ и҆̀хъ, а҆́ще по́йдѹтъ въ зако́нѣ мое́мъ, и҆лѝ нѝ:

⁵и҆ бѹ́детъ въ де́нь шесты́й, и҆ ѹ҆гото́вѧтъ, є҆́же внесѹ́тъ, и҆ да бѹ́детъ сѹгѹ́бо, є҆́же собира́ша на всѧ́къ де́нь.

⁶Рече́ же мѡѷсе́й и҆ а҆арѡ́нъ ко всемѹ̀ со́нмѹ сынѡ́въ ї҆и҃левыхъ: въ ве́черъ (се́й) ѹ҆вѣ́сте, ѩ҆́кѡ гд҇ь и҆зведе́ вы ѿ землѝ є҆гѵ́петскїѧ,

⁷и҆ заѹ́тра ѹ҆́зрите сла́вѹ гд҇ню, внегда̀ ѹ҆слы́шати гд҇ѹ ропта́нїе ва́ше на бг҃а: мы́ же что̀ є҆смы̀, ѩ҆́кѡ ро́пщете на ны̀;

⁸И҆ речѐ мѡѷсе́й: є҆гда̀ да́стъ гд҇ь ва́мъ въ ве́черъ мѧса̀ ѩ҆́сти и҆ хлѣ́бы заѹ́тра до сы́тости, поне́же ѹ҆слы́ша гд҇ь ропта́нїе ва́ше, и҆́мже ро́пщете на ны̀: мы́ же что̀ є҆смы̀; не на на́съ бо ропта́нїе ва́ше, но то́чїю на бг҃а.

⁹И҆ речѐ мѡѷсе́й ко а҆арѡ́нѹ: глаго́ли ко всемѹ̀ со́нмѹ сынѡ́въ ї҆и҃левыхъ: прїиди́те пред̾ бг҃а, ѹ҆слы́ша бо ропта́нїе ва́ше.

¹⁰Є҆гда́ же глаго́лаше а҆арѡ́нъ всемѹ̀ со́нмѹ сынѡ́въ ї҆и҃левыхъ, и҆ ѡ҆брати́шасѧ въ пѹсты́ню, и҆ сла́ва гд҇нѧ ѩ҆ви́сѧ во ѡ҆́блацѣ,

¹¹и҆ речѐ гд҇ь къ мѡѷсе́ю гл҃ѧ:

¹²слы́шахъ ропта́нїе сынѡ́въ ї҆и҃левыхъ: рцы̀ къ ни҄мъ глаго́лѧ: къ ве́черѹ да снѣ́сте мѧса̀ и҆ заѹ́тра насы́титесѧ хлѣ́бѡвъ, и҆ ѹ҆вѣ́сте, ѩ҆́кѡ а҆́зъ є҆́смь гд҇ь бг҃ъ ва́шъ.

¹³Бы́сть же ве́черъ, и҆ прїидо́ша кра҄стели и҆ покры́ша по́лкъ. Заѹ́тра же бы́сть спа́дшей росѣ̀ ѡ҆́колѡ полка̀,

¹⁴и҆ сѐ, на лицы̀ пѹсты́ни ме́лко ѩ҆́кѡ корїа́ндръ, бѣло̀ а҆́ки ле́дъ на землѝ.

¹⁵Ѹ҆зрѣ́вше же то̀ сы́нове ї҆и҃лєвы, рѣ́ша дрѹ́гъ ко дрѹ́гѹ: что́ є҆сть сїѐ; Не вѣ́дѧхѹ бо, что̀ бѧ́ше. Рече́ же мѡѷсе́й къ ни҄мъ: се́й хлѣ́бъ, є҆го́же дадѐ гд҇ь ва́мъ ѩ҆́сти:

¹⁶се́й гл҃го́лъ, є҆го́же завѣща̀ гд҇ь: собери́те ѿ негѡ̀ кі́йждо на дома҄шнїѧ, гомо́ръ погла́внѡ по числѹ̀ дѹ́шъ ва́шихъ, кі́йждо ва́съ съ дома́шними свои́ми собери́те.

¹⁷И҆ сотвори́ша та́кѡ сы́нове ї҆и҃лєвы, и҆ собра́ша ѻ҆́въ мно́гѡ, ѻ҆́въ же ма́лѡ:

¹⁸и҆ и҆змѣ́ривше гомо́ромъ, не преизбы́точествова и҆́же мно́гѡ, и҆ и҆́же ма́лѡ, не мнѣ́е прїѧ́тъ: кі́йждо на дома́шнихъ свои́хъ собра́ша.

¹⁹И҆ речѐ мѡѷсе́й къ ни҄мъ: никто́же да ѡ҆ста́витъ на ѹ҆́трїе ѿ негѡ̀.

²⁰И҆ не послѹ́шаша мѡѷсе́а, но ѡ҆ста́виша нѣ́цыи ѿ негѡ̀ на ѹ҆́трїе, и҆ воскипѣ̀ червьмѝ и҆ возсмердѣ́сѧ. И҆ ѡ҆скорби́сѧ на ни́хъ мѡѷсе́й.

²¹И҆ собира́ша ѻ҆́ное ра́нѡ ра́нѡ, кі́йждо надлежа́щее себѣ̀: є҆гда́ же ѡ҆грѣва́ше со́лнце, растаѧва́ше.

²²Бы́сть же въ де́нь шесты́й, собра́ша потре́бное сѹгѹ́бѡ, два̀ гомѡ́ра комѹ́ждо. Прїидо́ша же всѝ кнѧ҄зи со́нма и҆ повѣ́даша мѡѷсе́ю.

²³Рече́ же мѡѷсе́й къ ни҄мъ: сїѐ сло́во є҆́сть, є҆́же гл҃а гд҇ь: сѹббѡ́та поко́й ст҃ъ гд҇ѹ заѹ́тра: є҆ли҄ка а҆́ще печетѐ, пецы́те, и҆ є҆ли҄ка а҆́ще варитѐ, вари́те, все́ же и҆збы́точное ѡ҆ста́вите въ скро́вѣ на ѹ҆́трїе.

²⁴И҆ ѡ҆ста́виша ѿ тогѡ̀ до ѹ҆́трїѧ, ѩ҆́коже заповѣ́да и҆̀мъ мѡѷсе́й: и҆ не возсмердѣ́сѧ, нижѐ че́рвь бы́сть въ не́мъ.

²⁵Рече́ же мѡѷсе́й: ѩ҆ди́те дне́сь, є҆́сть бо сѹббѡ́та поко́й гд҇ѹ: дне́сь не ѡ҆брѧ́щете на по́ли:

²⁶ше́сть дні́й собира́йте, въ седмы́й же де́нь сѹббѡ́та: ѩ҆́кѡ не бѹ́детъ въ не́мъ.

²⁷Бы́сть же въ седмы́й де́нь, и҆зыдо́ша нѣ́цыи ѿ люді́й собира́ти, и҆ не ѡ҆брѣто́ша.

²⁸Рече́ же гд҇ь мѡѷсе́ови: доко́лѣ не хо́щете послѹ́шати за́повѣдїй мои́хъ и҆ зако́на моегѡ̀;

²⁹зри́те: гд҇ь бо дадѐ ва́мъ сѹббѡ́тѹ де́нь се́й: сегѡ̀ ра́ди то́й дадѐ ва́мъ въ де́нь шесты́й хлѣ́ба на два̀ дни҄: сѣди́те кі́йждо ва́съ въ домѹ̀ свое́мъ ѹ҆ себє̀, никто́же да и҆схо́дитъ ѿ мѣ́ста своегѡ̀ въ де́нь седмы́й.

³⁰И҆ сѹббѡ́тствоваша лю́дїе въ де́нь седмы́й.

³¹И҆ прозва́ша сы́нове ї҆и҃лєвы и҆́мѧ томѹ̀ [ма́нна]: бѧ́ше же ѩ҆́кѡ сѣ́мѧ корїа́ндрово бѣло̀, вкѹ́съ же є҆гѡ̀ а҆́ки мѹка̀ съ ме́домъ.

³²Рече́ же и҆̀мъ мѡѷсе́й: се́й гл҃го́лъ, є҆го́же завѣща̀ гд҇ь: напо́лните гомо́ръ ѿ ма́нны въ скро́въ въ ро́ды ва́шѧ: да ви́дѧтъ хлѣ́бъ, є҆го́же ѩ҆до́сте вы̀ въ пѹсты́ни, є҆гда̀ и҆зведѐ ва́съ гд҇ь ѿ землѝ є҆гѵ́петскїѧ.

³³И҆ речѐ мѡѷсе́й ко а҆арѡ́нѹ: возмѝ ста́мнѹ златѹ́ю є҆ди́нѹ и҆ вложѝ въ ню̀ гомо́ръ по́лный ѿ ма́нны, и҆ положи́ши тѹ́ю пред̾ бг҃омъ въ соблюде́нїе въ ро́ды ва́шѧ.

³⁴ѩ҆́коже заповѣ́да гд҇ь мѡѷсе́ю, положѝ ю҆̀ а҆арѡ́нъ пред̾ свидѣ́нїемъ въ соблюде́нїе.

³⁵Сы́нове же ї҆и҃лєвы ѩ҆до́ша ма́ннѹ лѣ́тъ четы́редесѧть, до́ндеже прїидо́ша въ зе́млю ѡ҆бита́емѹю, и҆ ѩ҆до́ша ма́ннѹ, до́ндеже прїидо́ша во странѹ̀ фїнїкі́йскѹю:

³⁶гомо́ръ же десѧ́таѧ ча́сть тре́хъ мѣ́ръ {Є҆вр.: є҆́фы} бѧ́ше.