Read Библия Церковнославянская И҆схо́дъ 17 Bible Online

И҆схо́дъ 17 - Библия Церковнославянская bible

И҆схо́дъ 17

¹И҆ воздви́жесѧ ве́сь со́нмъ сынѡ́въ ї҆и҃левыхъ ѿ пѹсты́ни сі́нъ по полкѡ́мъ свои҄мъ сло́вомъ гд҇нимъ и҆ ѡ҆полчи́шасѧ въ рафїді́нѣ. Не бѧ́ше же воды̀ лю́демъ пи́ти,

²и҆ хѹ́лѧхѹ лю́дїе мѡѷсе́а, глаго́люще: да́ждь на́мъ во́дѹ, да пїе́мъ. И҆ речѐ и҆̀мъ мѡѷсе́й: что̀ хѹ́лите мѧ̀; и҆ что̀ и҆скѹша́ете гд҇а;

³Возжажда́ша же та́мѡ лю́дїе воды̀ и҆ ропта́хѹ на мѡѷсе́а, глаго́люще: вскѹ́ю сїѐ; и҆зве́лъ є҆сѝ на́съ и҆з̾ є҆гѵ́пта ѹ҆мори́ти на́съ и҆ ча҄да на҄ша и҆ скоты̀ жа́ждею;

⁴Возопи́ же мѡѷсе́й ко гд҇ѹ глаго́лѧ: что̀ сотворю̀ лю́демъ си҄мъ; є҆щѐ ма́лѡ, и҆ побїю́тъ мѧ̀ ка́менїемъ.

⁵И҆ речѐ гд҇ь къ мѡѷсе́ю: пойдѝ пред̾ людьмѝ си́ми, и҆ поимѝ съ собо́ю ѿ ста́рєцъ людски́хъ, и҆ же́злъ, и҆́мже пресѣ́клъ є҆сѝ мо́ре, возмѝ въ рѹ́кѹ твою̀, и҆ пойдѝ:

⁶а҆́зъ же ста́нѹ та́мѡ пре́жде прише́ствїѧ твоегѡ̀ ѹ҆ ка́мене въ хѡри́вѣ: и҆ ѹ҆да́риши въ ка́мень, и҆ и҆зы́детъ и҆з̾ негѡ̀ вода̀, и҆ да пїю́тъ лю́дїе. Сотвори́ же мѡѷсе́й та́кѡ пред̾ сы҄ны ї҆и҃левыми,

⁷и҆ прозва̀ и҆́мѧ мѣ́стѹ томѹ̀ [и҆скѹше́нїе и҆ похѹле́нїе], хѹлы̀ ра́ди сынѡ́въ ї҆и҃левыхъ, и҆ зане́же и҆скѹси́ша гд҇а, глаго́люще: а҆́ще є҆́сть въ на́съ гд҇ь, и҆лѝ нѝ;

⁸Прїи́де же а҆мали́къ и҆ воева̀ на ї҆и҃лѧ въ рафїді́нѣ.

⁹Рече́ же мѡѷсе́й ко ї҆исѹ́сѹ: и҆зберѝ себѣ̀ мѹ́жы си҄льны и҆ и҆зше́дъ ѡ҆полчи́сѧ на а҆мали́ка заѹ́тра: и҆ сѐ, а҆́зъ ста́нѹ на верхѹ̀ горы̀, и҆ же́злъ бж҃їй въ рѹцѣ̀ мое́й.

¹⁰И҆ сотворѝ ї҆исѹ́съ, ѩ҆́коже речѐ є҆мѹ̀ мѡѷсе́й, и҆ и҆зше́дъ ѡ҆полчи́сѧ на а҆мали́ка: мѡѷсе́й же и҆ а҆арѡ́нъ и҆ ѡ҆́ръ взыдо́ша на ве́рхъ горы̀.

¹¹И҆ бы́сть є҆гда̀ воздвиза́ше мѡѷсе́й рѹ́цѣ, ѡ҆долѣва́ше ї҆и҃ль: є҆гда́ же ѡ҆пѹска́ше рѹ́цѣ, ѡ҆долѣва́ше а҆мали́къ:

¹²рѹ́цѣ же мѡѷсе́ѡвы тѧ҄жки бѣ́ша: и҆ взе́мше ка́мень, подложи́ша є҆мѹ̀, и҆ сѣдѧ́ше на не́мъ: а҆арѡ́нъ же и҆ ѡ҆́ръ поддержа́ста рѹ́цѣ є҆мѹ̀, є҆ди́нъ ѿсю́дѹ, а҆ дрѹгі́й ѿтѹ́дѹ: и҆ бы́ша мѡѷсе́ови рѹ́цѣ ѹ҆крѣплє́ны до захожде́нїѧ со́лнца:

¹³и҆ преѡдолѣ̀ ї҆исѹ́съ а҆мали́ка и҆ всѧ҄ лю́ди є҆гѡ̀ ѹ҆бі́йствомъ меча̀.

¹⁴Рече́ же гд҇ь къ мѡѷсе́ю: впишѝ сїѐ на па́мѧть въ кни҄ги и҆ вда́й во ѹ҆́шы ї҆исѹ́сѹ, ѩ҆́кѡ па́гѹбою погѹблю̀ па́мѧть а҆мали́ковѹ ѿ поднебе́сныѧ.

¹⁵И҆ созда̀ мѡѷсе́й ѻ҆лта́рь гд҇ѹ и҆ прозва̀ и҆́мѧ є҆мѹ̀ [гд҇ь прибѣ́жище моѐ]:

¹⁶ѩ҆́кѡ рѹко́ю та́йною ра́тѹетъ гд҇ь на а҆мали́ка ѿ ро́да въ ро́дъ.