Read Библия Церковнославянская И҆схо́дъ 18 Bible Online

И҆схо́дъ 18 - Библия Церковнославянская bible

И҆схо́дъ 18

¹Ѹ҆слы́ша же ї҆оѳо́ръ, ї҆ере́й мадїа́мскїй, те́сть мѡѷсе́овъ, всѧ҄, є҆ли҄ка сотворѝ гд҇ь ї҆и҃лю свои҄мъ лю́демъ, ѩ҆́кѡ и҆зведѐ гд҇ь ї҆и҃лѧ и҆з̾ є҆гѵ́пта:

²и҆ поѧ̀ ї҆оѳо́ръ, те́сть мѡѷсе́овъ, сепфѡ́рѹ, женѹ̀ мѡѷсе́овѹ, по ѿпѹще́нїи є҆ѧ̀,

³и҆ два̀ сы҄на є҆ѧ̀: и҆́мѧ є҆ди́номѹ ѿ ни́хъ гирса́мъ, глаго́лѧ: пришле́цъ бы́хъ въ землѝ чѹжде́й,

⁴и҆ и҆́мѧ второ́мѹ є҆лїе́зеръ, глаго́лѧ: бг҃ъ бо ѻ҆тца̀ моегѡ̀ помо́щникъ мо́й и҆ и҆зба́ви мѧ̀ и҆з̾ рѹкѝ фараѡ́ни.

⁵И҆ прїи́де ї҆оѳо́ръ, те́сть мѡѷсе́овъ, и҆ сы́нове и҆ жена̀ къ мѡѷсе́ю въ пѹсты́ню, и҆дѣ́же ѡ҆полчи́сѧ при горѣ̀ бж҃їей.

⁶Возвѣсти́ша же мѡѷсе́ю, глаго́люще: сѐ, ї҆оѳо́ръ, те́сть тво́й, и҆́детъ къ тебѣ̀, и҆ жена̀ твоѧ̀, и҆ ѻ҆́ба сы҄на твоѧ҄ съ ни́мъ.

⁷И҆зы́де же мѡѷсе́й во срѣ́тенїе те́стю своемѹ̀ и҆ поклони́сѧ є҆мѹ̀ и҆ цѣлова̀ є҆го̀, и҆ привѣ́тствоваша дрѹ́гъ дрѹ́га: и҆ введѐ и҆̀хъ мѡѷсе́й въ кѹ́щѹ.

⁸И҆ повѣ́да мѡѷсе́й те́стю своемѹ̀ всѧ҄, є҆ли҄ка сотворѝ гд҇ь фараѡ́нѹ и҆ всѣ҄мъ є҆гѵ́птѧнѡмъ ї҆и҃лѧ ра́ди, и҆ ве́сь трѹ́дъ бы́вшїй и҆̀мъ на пѹтѝ, и҆ ѩ҆́кѡ и҆зба́ви и҆̀хъ гд҇ь ѿ рѹкѝ фараѡ́ни и҆ ѿ рѹкѝ є҆гѵ́петскїѧ.

⁹Ѹ҆жасе́сѧ же ї҆оѳо́ръ ѡ҆ всѣ́хъ благи́хъ, ѩ҆̀же сотворѝ и҆̀мъ гд҇ь, ѩ҆́кѡ и҆зба́ви и҆̀хъ гд҇ь ѿ рѹкѝ є҆гѵ́петскїѧ и҆ ѿ рѹкѝ фараѡ́ни,

¹⁰и҆ речѐ ї҆оѳо́ръ: блг҇ве́нъ гд҇ь, ѩ҆́кѡ и҆зба́ви лю́ди своѧ҄ и҆з̾ рѹкѝ є҆гѵ́петскїѧ и҆ и҆з̾ рѹкѝ фараѡ́ни:

¹¹нн҃ѣ ѹ҆вѣ́дѣхъ, ѩ҆́кѡ вели́къ гд҇ь па́че всѣ́хъ богѡ́въ, сегѡ̀ ра́ди, ѩ҆́кѡ налего́ша на ни́хъ.

¹²И҆ взѧ̀ ї҆оѳо́ръ те́сть мѡѷсе́овъ всесожжє́нїѧ и҆ жє́ртвы бг҃ѹ: прїи́де же а҆арѡ́нъ и҆ всѝ ста́рцы ї҆и҃лєвы ѩ҆́сти хлѣ́ба съ те́стемъ мѡѷсе́овымъ пред̾ бг҃омъ.

¹³И҆ бы́сть на ѹ҆́трїе, сѣ́де мѡѷсе́й сѹди́ти лю́ди: стоѧ́хѹ же пред̾ мѡѷсе́омъ всѝ лю́дїе ѿ ѹ҆́тра до ве́чера.

¹⁴Ви́дѣвъ же ї҆оѳо́ръ всѧ҄, є҆ли҄ка творѧ́ше лю́демъ, речѐ: что̀ сїѐ, є҆́же ты̀ твори́ши лю́демъ; почто̀ ты̀ є҆ди́нъ сѣди́ши, вси́ же лю́дїе предстоѧ́тъ тебѣ̀ ѿ ѹ҆́тра до ве́чера;

¹⁵Рече́ же мѡѷсе́й те́стю: поне́же прихо́дѧтъ лю́дїе ко мнѣ̀ проси́ти сѹда̀ ѿ бг҃а:

¹⁶є҆гда́ бо быва́етъ и҆̀мъ ра́спрѧ, и҆ прихо́дѧтъ ко мнѣ̀, разсѹжда́ю коемѹ́ждо и҆ сказѹ́ю и҆̀мъ повєлѣ́нїѧ бж҃їѧ и҆ зако́нъ є҆гѡ̀.

¹⁷Рече́ же те́сть мѡѷсе́овъ къ немѹ̀: не пра́вѡ ты̀ твори́ши глаго́лъ се́й:

¹⁸трѹдо́мъ ѹ҆трѹди́шисѧ несно́снымъ и҆ ты̀, и҆ всѝ лю́дїе сі́и, и҆̀же сѹ́ть съ тобо́ю: тѧ́жекъ тебѣ̀ глаго́лъ се́й, не возмо́жеши твори́ти ты̀ є҆ди́нъ:

¹⁹нн҃ѣ ѹ҆̀бо послѹ́шай менѐ и҆ присовѣ́тѹю тебѣ̀, и҆ бѹ́детъ бг҃ъ съ тобо́ю: бѹ́ди ты̀ лю́демъ въ тѣ́хъ ѩ҆̀же къ бг҃ѹ, и҆ донесе́ши словеса̀ и҆́хъ къ бг҃ѹ,

²⁰и҆ засвидѣ́телствѹй и҆̀мъ повелѣ҄нїѧ бж҃їѧ и҆ зако́нъ є҆гѡ̀, и҆ повѣ́ждь и҆̀мъ пѹти҄ є҆гѡ̀, и҆́миже по́йдѹтъ, и҆ дѣла̀, ѩ҆̀же сотворѧ́тъ:

²¹ты́ же ѹ҆смотрѝ себѣ̀ ѿ всѣ́хъ люді́й мѹ́жы си҄льны, бг҃а боѧ́щыѧсѧ, мѹ́жы пра́вєдны, ненави́дѧщыѧ го́рдости, и҆ поста́виши и҆̀хъ над̾ ни́ми тысѧщенача́лники и҆ стонача́лники, и҆ пѧтьдесѧтонача́лники и҆ десѧтонача́лники и҆ писмовводи҄тели,

²²и҆ сѹ́дѧтъ люді́й по всѧ҄ часы̀: сло́во же неѹдоборѣши́телное донесѹ́тъ къ тебѣ̀: ма҄лыѧ же сѹды̀ да сѹ́дѧтъ ѻ҆нѝ, и҆ ѡ҆блегча́тъ тѧ̀ и҆ спомо́гѹтъ тебѣ̀:

²³а҆́ще сло́во сїѐ сотвори́ши, ѹ҆крѣпи́тъ тѧ̀ бг҃ъ, и҆ возмо́жеши настоѧ́телствовати, и҆ всѝ лю́дїе сі́и прїи́дѹтъ во своѐ мѣ́сто съ ми́ромъ.

²⁴Послѹ́ша же мѡѷсе́й гла́са те́стѧ своегѡ̀ и҆ сотворѝ всѧ҄, є҆ли҄ка речѐ є҆мѹ̀:

²⁵и҆ и҆збра̀ мѡѷсе́й мѹ́жы си҄льны ѿ всегѡ̀ ї҆и҃лѧ, и҆ сотворѝ ѧ҆̀ над̾ ни́ми тысѧщенача́лники и҆ стонача́лники, и҆ пѧтьдесѧтонача́лники и҆ десѧтонача́лники и҆ писмовводи҄тели:

²⁶и҆ сѹжда́хѹ лю́демъ по всѧ҄ часы̀: всѧ́кое же сло́во неѹдоборѣши́телное доноси́ша къ мѡѷсе́ю, всѧ́кое же сло́во ле́гкое сѹжда́хѹ са́ми.

²⁷Ѿпѹсти́ же мѡѷсе́й те́стѧ своего̀, и҆ ѿи́де въ зе́млю свою̀.