Read Библия Церковнославянская И҆схо́дъ 2 Bible Online

И҆схо́дъ 2 - Библия Церковнославянская bible

И҆схо́дъ 2

¹Бѧ́ше же нѣ́кто ѿ пле́мене леѵі́ина, и҆́же поѧ̀ ѿ дще́рей леѵі́иныхъ, и҆ и҆мѧ́ше ю҆̀:

²и҆ зача̀ во чре́вѣ и҆ родѝ мѹ́жескїй по́лъ. Ви́дѣвше же є҆го̀ лѣ́па, кры́ша є҆го̀ трѝ мц҇ы:

³и҆ поне́же не можа́хѹ є҆го̀ ктомѹ̀ кры́ти, взѧ̀ є҆мѹ̀ ма́ти є҆гѡ̀ ковче́жецъ си́товый и҆ пома́за и҆̀ кле́емъ и҆ смоло́ю, и҆ вложѝ ѻ҆троча̀ въ него̀, и҆ положѝ є҆го̀ въ лѹчи́цѣ при рѣцѣ̀:

⁴и҆ наблюда́ше сестра̀ є҆гѡ̀ и҆здале́ча, да ѹ҆вѣ́даетъ, что̀ бѹ́детъ є҆мѹ̀.

⁵Сни́де же дще́рь фараѡ́нова и҆змы́тисѧ на рѣкѹ̀, и҆ рабы҄ни є҆ѧ̀ прохожда́хѹ при рѣцѣ̀. И҆ ви́дѣвши ковче́жецъ въ лѹчи́цѣ, посла́вши рабы́ню, взѧ̀ и҆̀.

⁶Ѿве́рзши же, ви́дитъ ѻ҆троча̀ пла́чѹщеесѧ въ ковче́жцѣ, и҆ пощадѣ̀ є҆̀ дще́рь фараѡ́нѧ, и҆ речѐ: ѿ дѣте́й є҆вре́йскихъ сїѐ.

⁷И҆ речѐ сестра̀ є҆гѡ̀ дще́ри фараѡ́новѣ: хо́щеши ли, призовѹ́ ти женѹ̀ корми́лицѹ ѿ є҆врє́й, и҆ воздои́тъ тѝ ѻ҆троча̀;

⁸И҆ речѐ є҆́й дще́рь фараѡ́нова: и҆дѝ. Ше́дши же ѻ҆трокови́ца, призва̀ ма́терь ѻ҆троча́те.

⁹Рече́ же къ не́й дще́рь фараѡ́нова: соблюди́ ми ѻ҆троча̀ сїѐ и҆ воздо́й мѝ є҆̀: а҆́зъ же да́мъ тѝ мздѹ̀. Взѧ́ же ѻ҆троча̀ жена̀ и҆ доѧ́ше є҆̀.

¹⁰Возмѹжа́вшѹ же ѻ҆троча́ти, введѐ є҆̀ ко дще́ри фараѡ́новѣ, и҆ бы́сть є҆́й въ сы́на, и҆ наречѐ и҆́мѧ є҆мѹ̀ мѡѷсе́й, глаго́лющи: ѿ воды̀ взѧ́хъ є҆го̀.

¹¹Бы́сть же во дни҄ мнѡ́гїѧ ѡ҆́ны, вели́къ бы́въ мѡѷсе́й, и҆зы́де къ бра́тїѧмъ свои҄мъ, сынѡ́мъ ї҆и҃лєвымъ. Разѹмѣ́въ же болѣ́знь и҆́хъ, ви́дѣ человѣ́ка є҆гѵ́птѧнина бїю́ща нѣ́коего є҆вре́анина ѿ бра́тїи є҆гѡ̀ сынѡ́въ ї҆и҃левыхъ.

¹²Ѡ҆бозрѣ́всѧ же сѣ́мѡ и҆ ѻ҆ва́мѡ, ни кого́же ви́дѣ: и҆ порази́въ є҆гѵ́птѧнина, скры̀ є҆го̀ въ песцѣ̀.

¹³И҆зше́дъ же во вторы́й де́нь, ви́дѣ два̀ мѹ҄жа є҆врє́анина бїю҄щасѧ и҆ глаго́ла ѡ҆би́дѧщемѹ: чесѡ̀ ра́ди ты̀ бїе́ши и҆́скреннѧго;

¹⁴Ѻ҆́нъ же речѐ: кто́ тѧ поста́ви кнѧ́зѧ и҆ сѹдїю̀ над̾ на́ми; є҆да̀ ѹ҆би́ти мѧ̀ ты̀ хо́щеши, и҆́мже ѡ҆́бразомъ ѹ҆би́лъ є҆сѝ вчера̀ є҆гѵ́птѧнина; Ѹ҆боѧ́сѧ же мѡѷсе́й и҆ речѐ: а҆́ще си́це ѩ҆вле́нъ бы́сть глаго́лъ се́й;

¹⁵Ѹ҆слы́ша же фараѡ́нъ глаго́лъ се́й и҆ и҆ска́ше ѹ҆би́ти мѡѷсе́а. Ѿи́де же мѡѷсе́й ѿ лица̀ фараѡ́нова и҆ всели́сѧ въ землѝ мадїа́мстѣй: прише́дъ же въ зе́млю мадїа́мскѹю сѣ́де при кла́дѧзѣ.

¹⁶Свѧще́нникѹ же мадїа́мскомѹ бѣ́ша се́дмь дще́рей, пасѹ́щихъ ѻ҆́вцы ѻ҆тца̀ своегѡ̀ ї҆оѳо́ра: прише́дшѧ же че́рпахѹ, до́ндеже напо́лниша кѡры́та, напои́ти ѻ҆́вцы ѻ҆тца̀ своегѡ̀ ї҆оѳо́ра.

¹⁷Прише́дше же па́стырїе и҆згна́ша ѧ҆̀. Воста́въ же мѡѷсе́й и҆зба́ви и҆̀хъ, и҆ налїѧ̀ и҆̀мъ и҆ напоѝ ѻ҆́вцы и҆́хъ.

¹⁸Прїидо́ша же къ рагѹи́лѹ ѻ҆тцѹ̀ своемѹ̀. Ѻ҆́нъ же речѐ и҆̀мъ: что̀ ѩ҆́кѡ ѹ҆скори́сте прїитѝ дне́сь;

¹⁹Ѻ҆́ныѧ же реко́ша: человѣ́къ є҆гѵ́птѧнинъ и҆зба́ви на́съ ѿ па́стырей, и҆ наче́рпа на́мъ и҆ напоѝ ѻ҆́вцы на́шѧ.

²⁰Ѻ҆́нъ же речѐ дще́ремъ свои҄мъ: и҆ гдѣ́ є҆сть; и҆ вскѹ́ю си́це ѡ҆ста́висте человѣ́ка; призови́те ѹ҆̀бо є҆го̀, да ѩ҆́стъ хлѣ́бъ.

²¹Всели́сѧ же мѡѷсе́й ѹ҆ человѣ́ка: и҆ дадѐ сепфѡ́рѹ дще́рь свою̀ мѡѷсе́ю въ женѹ̀.

²²Во чре́вѣ же заче́нши жена̀ родѝ сы́на, и҆ наречѐ мѡѷсе́й и҆́мѧ є҆мѹ̀ гирса́мъ, глаго́лѧ: ѩ҆́кѡ пришле́цъ є҆́смь въ землѝ чѹжде́й. Є҆ще́ же заче́нши родѝ сы́на втора́го, и҆ наречѐ и҆́мѧ є҆мѹ̀ є҆лїезе́ръ, глаго́лѧ: бг҃ъ бо ѻ҆тца̀ моегѡ̀ помо́щникъ мо́й и҆ и҆зба́ви мѧ̀ и҆з̾ рѹкѝ фараѡ́новы.

²³По дне́хъ же мно́гихъ тѣ́хъ, ѹ҆́мре ца́рь є҆гѵ́петскїй, и҆ возстена́ша сы́нове ї҆и҃лєвы ѿ дѣ́лъ и҆ возопи́ша, и҆ взы́де во́пль и҆́хъ къ бг҃ѹ ѿ дѣ́лъ.

²⁴И҆ ѹ҆слы́ша бг҃ъ стена́нїе и҆́хъ: и҆ помѧнѹ̀ бг҃ъ завѣ́тъ сво́й и҆́же ко а҆враа́мѹ и҆ ї҆саа́кѹ и҆ ї҆а́кѡвѹ,

²⁵и҆ призрѣ̀ бг҃ъ на сы́ны ї҆и҃лєвы, и҆ позна́нъ бы́сть и҆́ми.