Read Библия Церковнославянская И҆схо́дъ 28 Bible Online

И҆схо́дъ 28 - Библия Церковнославянская bible

И҆схо́дъ 28

¹И҆ ты̀ приведѝ къ себѣ̀ а҆арѡ́на, бра́та твоего̀, и҆ сы́ны є҆гѡ̀ ѿ сынѡ́въ ї҆и҃левыхъ, да свѧщеннодѣ́йствѹютъ мнѣ̀ а҆арѡ́нъ и҆ нада́въ, и҆ а҆вїѹ́дъ и҆ є҆леаза́ръ и҆ ї҆ѳа́маръ, сы́нове а҆арѡ҄ни.

²И҆ да сотвори́ши ри́зѹ свѧ́тѹ а҆арѡ́нѹ бра́тѹ твоемѹ̀ въ че́сть и҆ сла́вѹ.

³И҆ ты̀ возглаго́ли ко всѣ҄мъ премѹ҄дрымъ ѹ҆мо́мъ, и҆̀хже напо́лнихъ дх҃а мѹ́дрости и҆ смышле́нїѧ: и҆ да сотворѧ́тъ ри́зѹ свѧ́тѹ а҆арѡ́нѹ, въ не́йже и҆́мать свѧщеннодѣ́йствовати мнѣ̀ во свѧти́лищи.

⁴И҆ сїѧ҄ сѹ́ть ри҄зы, и҆̀хже сотворѧ́тъ: напе́рсникъ и҆ ри́зѹ ве́рхнюю {Гре́ч.: є҆пѡмі́съ, є҆вр.: є҆фѹ́дъ.}, и҆ до́лгѹю ри́зѹ {Гре́ч.: поди́ръ.} и҆ ри́зѹ треснови́тѹ, и҆ нагла́вїе {Гре́ч.: кїда́ръ.} и҆ по́ѧсъ: и҆ да сотворѧ́тъ ри҄зы свѧ҄ты а҆арѡ́нѹ и҆ сынѡ́мъ є҆гѡ̀, во є҆́же свѧщеннодѣ́йствовати мнѣ̀.

⁵И҆ сі́и да во́змѹтъ зла́то и҆ синетѹ̀, и҆ багрѧни́цѹ и҆ червлени́цѹ и҆ вѷссо́нъ,

⁶и҆ да сотворѧ́тъ ри́зѹ ве́рхнюю ѿ вѷссо́на ска́нагѡ, дѣ́ло тка́нно пестрѧ́щагѡ.

⁷Двѣ̀ ри҄зы вє́рхнїѧ {є҆ди́нъ нара́мникъ на дво́е раздѣле́нный въ подо́бїе са́ккоса.} да бѹ́дѹтъ є҆мѹ̀ придержа́щѧсѧ є҆ди́на дрѹзѣ́й, на ѻ҆́бѣ странѣ҄ свѧ҄заныѧ.

⁸И҆ тка́нїе ри́зъ ве́рхнихъ, є҆́же є҆́сть на ни́хъ, по сотворе́нїю и҆́хъ да бѹ́детъ ѿ зла́та чи́ста и҆ синеты̀, и҆ багрѧни́цы и҆ червлени́цы прѧ́деныѧ и҆ вѷссо́на ска́нагѡ.

⁹И҆ во́змеши два̀ ка́менѧ, ка́мене смара́гда, и҆ и҆зваѧ́еши на ни́хъ и҆мена̀ сынѡ́въ ї҆и҃левыхъ:

¹⁰ше́сть и҆ме́нъ на ка́мени є҆ди́нѣмъ и҆ ше́сть и҆ме́нъ про́чїихъ на ка́мени дрѹзѣ́мъ по родѡ́мъ и҆́хъ,

¹¹дѣ́ло ка́менныѧ хи́трости: ваѧ́нїемъ печа́ти и҆зваѧ́еши ѻ҆́ба ка́менѧ и҆мены̀ сынѡ́въ ї҆и҃левыхъ.

¹²И҆ положи́ши ѻ҆́ба ка́менѧ на ра́менахъ ве́рхнїѧ ри́зы: ка҄мени въ па́мѧть сѹ́ть сынѡ́мъ ї҆и҃лєвымъ: и҆ воздви́гнетъ а҆арѡ́нъ и҆мена̀ сынѡ́въ ї҆и҃левыхъ пред̾ гд҇емъ на ѻ҆́ба ра́мена своѧ҄ въ па́мѧть ѡ҆ ни́хъ.

¹³И҆ да сотвори́ши щитцы̀ ѿ зла́та чи́ста,

¹⁴и҆ да сотвори́ши двѣ̀ треснѡви́цы ѿ зла́та чи́ста, смѣ҄шены цвѣта́ми, дѣ́ло плете́нїѧ: и҆ возложи́ши треснѡви́цы сплетє́ныѧ на щитцы̀ по нара́мникѡмъ и҆́хъ сопредѝ.

¹⁵И҆ да сотвори́ши сло́во {Гре́ч.: логі́онъ.} сѹ́дное, дѣ́ло пестрѧ́щагѡ: по соста́вѹ ри́зы ве́рхнїѧ {Гре́ч.: є҆пѡмі́съ, є҆вр.: є҆фѹ́дъ.} да сотвори́ши сїѐ ѿ зла́та и҆ синеты̀, и҆ багрѧни́цы и҆ червлени́цы прѧ́деныѧ и҆ вѷссо́на ска́нагѡ:

¹⁶сотвори́ши є҆̀ четвероѹго́лно: да бѹ́детъ сѹгѹ́бо, пѧ́ди долгота̀ є҆гѡ̀ и҆ пѧ́ди широта̀,

¹⁷и҆ нашїе́ши на не́мъ шве́нїе ка́менное въ четы́ри рѧда҄. Рѧ́дъ ка́менїй да бѹ́детъ: сарді́й, топа́зїй и҆ смара́гдъ, рѧ́дъ є҆ди́нъ:

¹⁸и҆ рѧ́дъ вторы́й, а҆́нѳраѯъ и҆ сапфі́ръ и҆ ї҆а́спїсъ:

¹⁹и҆ рѧ́дъ тре́тїй, лїгѵ́рїй и҆ а҆ха́тъ и҆ а҆меѳѵ́стъ:

²⁰и҆ рѧ́дъ четве́ртый, хрѷсолі́ѳъ и҆ вирѵ́ллїй и҆ ѻ҆нѵ́хїй: ѡ҆б̾ѧ҄ты зла́томъ, и҆сплетє́ны въ зла́тѣ да бѹ́дѹтъ по рѧ́дѹ своемѹ̀.

²¹И҆ ка́менїе да бѹ́дѹтъ ѿ и҆ме́нъ двѹна́десѧти сынѡ́въ ї҆и҃левыхъ пред̾ гд҇емъ: на двѹ̀ ра́менахъ є҆гѡ̀ двана́десѧть по и҆мена́мъ и҆́хъ и҆ по родѡ́мъ и҆́хъ, и҆зва́ѧни печа́тми, коегѡ́ждо по и҆́мени да бѹ́дѹтъ въ двана́десѧть племе́нъ.

²²И҆ да сотвори́ши на сло́вѣ трє́сны сплетє́ны, дѣ́ломъ вери́жнымъ, ѿ зла́та чи́ста.

²³И҆ да сотвори́ши на словесѝ два̀ кѡлца̀ зла҄та: и҆ возложи́ши два̀ кѡлца̀ зла҄та на ѻ҆́ба кра҄ѧ словесѐ.

²⁴И҆ возложи́ши трє́сны и҆ чє́пи зла҄ты на два̀ кѡлца̀ ѿ ѻ҆бои́хъ кра́євъ словесѐ.

²⁵И҆ два̀ кра҄ѧ двѹ́хъ тре́снъ наложи́ши на двѣ̀ чепѡ́чки, и҆ возложи́ши на ра́мена ве́рхнихъ ри́зъ лице́мъ ко дрѹгъдрѹ́гѹ.

²⁶И҆ сотвори́ши два̀ кѡлца̀ зла҄та, и҆ возложи́ши на ѻ҆́бѣ страны҄ словесѐ на кра́й ѿ кра́ѧ за́днѧгѡ ве́рхнихъ ри́зъ, ѿвнѹ́трь.

²⁷И҆ сотвори́ши два̀ кѡлца̀ зла҄та, и҆ возложи́ши на ѻ҆́ба ра́мена ве́рхнїѧ ри́зы сни́зѹ є҆гѡ̀, лице́мъ по согбе́нїю свы́ше сотка́нїѧ ве́рхнихъ ри́зъ.

²⁸И҆ стѧ́гнеши сло́во колца́ми, ѩ҆̀же на не́мъ, съ колца́ми ве́рхнихъ ри́зъ сложе́ными, и҆з̾ синеты̀ плете́ными во тка́нїе ве́рхнихъ ри́зъ, да не низпѹска́етсѧ сло́во съ ве́рхнихъ ри́зъ.

²⁹И҆ да во́зметъ а҆арѡ́нъ и҆мена̀ сынѡ́въ ї҆и҃левыхъ на сло́вѣ сѹ́днѣмъ на пе́рсехъ, входѧ́щь во ст҃о́е на па́мѧть пред̾ бг҃омъ. И҆ да положи́ши на словесѝ сѹ́днѣмъ трє́сны: плетє́нїѧ на ѻ҆́ба кра҄ѧ словесѐ возложи́ши, и҆ ѻ҆́ба щита҄ возложи́ши на ѻ҆́бѣ ра҄мѣ нара́мника {Гре́ч.: є҆пѡмі́съ, є҆вр.: є҆фѹ́дъ.} на лицѐ.

³⁰И҆ да возложи́ши на сло́во сѹ́дное ѩ҆вле́нїе и҆ и҆́стинѹ: и҆ да бѹ́детъ на пе́рсехъ а҆арѡ́нѹ, є҆гда̀ вни́детъ въ ст҃о́е пред̾ гд҇а: и҆ да но́ситъ а҆арѡ́нъ сѹды̀ сынѡ́въ ї҆и҃левыхъ на пе́рсехъ пред̾ гд҇емъ всегда̀.

³¹И҆ да сотвори́ши ри́зѹ внѹ́треннюю {Гре́ч.: ѵ҆подѵ́тисъ.} поди́ръ {Славе́н.: до́лгаѧ ри́за.} всю̀ си́ню.

³²И҆ да бѹ́детъ ѹ҆́стїе посредѣ̀ є҆гѡ̀, ѡ҆жере́лїе и҆мѹ́що крѹго́мъ ѹ҆́стїѧ дѣ́ломъ тка́нымъ, сги́бъ сошве́нъ ѿ негѡ̀, да не раздере́тсѧ.

³³И҆ да сотвори́ши на ѻ҆ме́тѣ ри́знѣмъ {Гре́ч.: ѵ҆подѵ́тисъ.} сни́зѹ, а҆́ки ши́пка цвѣтѹ́щагѡ, пѹ҄гвицы и҆з̾ синеты̀ и҆ багрѧни́цы, и҆ червлени́цы прѧ́деныѧ и҆ вѷссо́на ска́нагѡ, на ѻ҆ме́тѣ ри́зы крѹго́мъ: въ то́йже ѡ҆́бразъ пѹ҄гвицы зла҄ты, и҆ звонцы̀ междѹ̀ си́ми ѡ҆́крестъ.

³⁴При пѹ́гвицѣ зла́тъ звоне́цъ, и҆ цвѣ́тъ на ѻ҆ме́тѣ ри́знѣмъ, крѹго́мъ.

³⁵И҆ да бѹ́детъ а҆арѡ́нѹ, є҆гда̀ слѹ́житъ, слы́шанъ гла́съ є҆гѡ̀, входѧ́щѹ во ст҃о́е пред̾ гд҇а, и҆ и҆сходѧ́щѹ, да не ѹ҆́мретъ.

³⁶И҆ да сотвори́ши дщи́цѹ зла́тѹ чи́стѹ: и҆ и҆з̾ѡбрази́ши на не́й ѡ҆́бразъ печа́ти, [ст҃ы́нѧ гд҇нѧ],

³⁷и҆ да возложи́ши ю҆̀ на синетѹ̀ ска́нѹю, и҆ да бѹ́детъ на ѹ҆вѧ́слѣ {Гре́ч.: мі́тра.}, спредѝ ѹ҆вѧ́сла да бѹ́детъ,

³⁸и҆ да бѹ́детъ на челѣ̀ а҆арѡ́ни: и҆ ѿи́метъ а҆арѡ́нъ согрѣшє́нїѧ свѧты́хъ, є҆ли҄ка ѡ҆свѧтѧ́тъ сы́нове ї҆и҃лєвы ѿ всѧ́кагѡ даѧ́нїѧ свѧты́хъ свои́хъ, и҆ да бѹ́детъ на челѣ̀ а҆арѡ́ни всегда̀ прїѧ́то и҆́ми пред̾ гд҇емъ.

³⁹И҆ трє́сны ри́зъ ѿ вѷссо́на: и҆ сотвори́ши клобѹ́къ {Гре́ч.: кі́дарїсъ.} вѷссо́нный, и҆ по́ѧсъ да сотвори́ши дѣ́ло пестрѧ́щагѡ.

⁴⁰И҆ сынѡ́мъ а҆арѡ́нѡвымъ да сотвори́ши ри҄зы и҆ по́ѧсы, и҆ клобѹкѝ да сотвори́ши и҆̀мъ въ че́сть и҆ сла́вѹ:

⁴¹и҆ ѡ҆блече́ши въ нѧ̀ а҆арѡ́на бра́та твоего̀ и҆ сы́ны є҆гѡ̀ съ ни́мъ, и҆ да пома́жеши и҆̀хъ, и҆ и҆спо́лниши рѹ́цѣ и҆́хъ и҆ ѡ҆свѧти́ши и҆̀хъ, да мѝ свѧщеннодѣ́йствѹютъ.

⁴²И҆ да сотвори́ши и҆̀мъ надра҄ги льнѧ҄ны покрыва́ти стыдѣ҄нїѧ пло́ти и҆́хъ, ѿ бе́дръ да́же до сте́гнъ бѹ́дѹтъ,

⁴³и҆ да и҆́мать а҆арѡ́нъ и҆ сы́нове є҆гѡ̀, є҆гда̀ вхо́дѧтъ въ ски́нїю свидѣ́нїѧ, и҆лѝ є҆гда̀ прихо́дѧтъ слѹжи́ти къ же́ртвенникѹ ст҃ы́ни: и҆ да не наведѹ́тъ на сѧ̀ грѣха̀, да не ѹ҆́мрѹтъ: зако́нное вѣ́чное (да бѹ́детъ) є҆мѹ̀ и҆ сѣ́мени є҆гѡ̀ по не́мъ.