Read Библия Церковнославянская И҆схо́дъ 30 Bible Online

И҆схо́дъ 30 - Библия Церковнославянская bible

И҆схо́дъ 30

¹И҆ да сотвори́ши ѻ҆лта́рь кади́лный ѿ дре́въ негнїю́щихъ:

²и҆ сотвори́ши и҆̀ ла́ктѧ въ долготѹ̀ и҆ ла́ктѧ въ широтѹ̀, четвероѹго́ленъ да бѹ́детъ, и҆ двою̀ ла́ктїй въ высотѹ̀: ѿ негѡ̀ да бѹ́дѹтъ ро́ги є҆гѡ̀.

³И҆ позлати́ши зла́томъ чи́стымъ ѻ҆гни́ще є҆гѡ̀, и҆ стѣ́ны є҆гѡ̀ ѡ҆́колѡ, и҆ ро́ги є҆гѡ̀: и҆ да сотвори́ши є҆мѹ̀ виты́й вѣне́цъ зла́тъ ѡ҆́колѡ.

⁴И҆ два̀ кѡлца̀ зла҄та чи҄ста да сотвори́ши под̾ виты́мъ вѣнце́мъ є҆гѡ̀ на ѻ҆бою̀ ѹ҆́глѹ, да сотвори́ши на ѻ҆бои́хъ страна́хъ: и҆ бѹ́дѹтъ ко́лца носи́ламъ, ѩ҆́коже под̾има́ти ѻ҆́ный и҆́ми.

⁵И҆ да сотвори́ши нѡси́ла ѿ древе́съ негнїю́щихъ, и҆ позлати́ши ѧ҆̀ зла́томъ:

⁶и҆ да положи́ши є҆го̀ прѧ́мѡ завѣ́сы, сѹ́щїѧ ѹ҆ кївѡ́та свидѣ́нїѧ, въ ни́хже позна́нъ бѹ́дѹ тебѣ̀ ѿтѹ́дѹ.

⁷И҆ да кади́тъ над̾ ни́мъ а҆арѡ́нъ ѳѷмїа́момъ сложе́нымъ благово́ннымъ ра́нѡ ра́нѡ: є҆гда̀ ѹ҆строѧ́етъ свѣти҄ла, да кади́тъ над̾ ни́мъ:

⁸и҆ є҆гда̀ вжига́етъ а҆арѡ́нъ свѣти҄ла съ ве́чера, да кади́тъ над̾ ни́мъ: ѳѷмїа́мъ всегда́шнїй пр҇нѡ пред̾ гд҇емъ въ ро́ды и҆́хъ:

⁹и҆ да не принесе́ши над̾ него̀ ѳѷмїа́ма и҆на́гѡ: приноше́нїѧ, же́ртвы и҆ возлїѧ́нїѧ да не пролїе́ши на него̀.

¹⁰И҆ да ѡ҆чи́ститъ над̾ ни́мъ а҆арѡ́нъ ѹ҆ рогѡ́въ є҆гѡ̀ є҆ди́ною въ лѣ́то: ѿ кро́ве ѡ҆чище́нїѧ грѣхѡ́въ ѹ҆милостивле́нїѧ є҆ди́ною въ лѣ́то да ѡ҆чи́ститъ є҆го̀ въ ро́ды и҆́хъ: ст҃о́е ст҃ы́хъ є҆́сть гд҇ѹ.

¹¹И҆ речѐ гд҇ь къ мѡѷсе́ю, гл҃ѧ:

¹²а҆́ще во́змеши и҆счисле́нїе сынѡ́въ ї҆и҃левыхъ въ пресмотре́нїи и҆́хъ, и҆ дадѧ́тъ кі́йждо и҆скѹпле́нїе за дѹ́шѹ свою̀ гд҇ѹ, и҆ не бѹ́детъ въ ни́хъ паде́нїѧ въ пресмотре́нїи и҆́хъ.

¹³И҆ сїѐ є҆́сть, є҆́же дадѧ́тъ, є҆ли́цы а҆́ще пристѹ́пѧтъ въ пресмотре́нїе, полдїдра́хмы, є҆́же є҆́сть по дїдра́хмѣ ст҃ѣ́й: два́десѧть ца́тъ дїдра́хма: по́лъ же дїдра́хмы, да́нь гд҇ѹ.

¹⁴Всѧ́къ входѧ́й въ пресмотре́нїе ѿ два́десѧти лѣ́тъ и҆ вы́шше, да дадѹ́тъ да́нь гд҇ѹ:

¹⁵бога́тый да не приложи́тъ, и҆ ни́щїй да не ѹ҆ма́литъ ѿ полѹдїдра́хмы, є҆гда̀ даю́тъ да́нь гд҇ѹ (ѿ сынѡ́въ ї҆и҃левыхъ), є҆́же ѹ҆молѧ́ти ѡ҆ дѹша́хъ ва́шихъ.

¹⁶И҆ да во́змеши сребро̀ да́ни ѿ сынѡ́въ ї҆и҃левыхъ, и҆ да́си є҆̀ на содѣ́ланїе ски́нїи свидѣ́нїѧ: и҆ да бѹ́детъ сынѡ́мъ ї҆и҃лєвымъ па́мѧть пред̾ гд҇емъ, є҆́же ѹ҆молѧ́ти ѡ҆ дѹша́хъ ва́шихъ.

¹⁷И҆ речѐ гд҇ь мѡѷсе́ю, гл҃ѧ:

¹⁸сотворѝ ѹ҆мыва́лницѹ мѣ́дѧнѹ и҆ стоѧ́ло є҆́й мѣ́дѧно, є҆́же ѹ҆мыва́тисѧ, и҆ да поста́виши ю҆̀ междѹ̀ ски́нїею свидѣ́нїѧ и҆ междѹ̀ ѻ҆лтаре́мъ, и҆ да влїе́ши въ ню̀ во́дѹ:

¹⁹и҆ да ѹ҆мыва́етъ а҆арѡ́нъ и҆ сы́нове є҆гѡ̀ и҆з̾ неѧ̀ рѹ́ки своѧ҄ и҆ но́ги водо́ю:

²⁰є҆гда̀ вхо́дѧтъ въ ски́нїю свидѣ́нїѧ, да ѡ҆мы́ютсѧ водо́ю, и҆ не ѹ҆́мрѹтъ: и҆лѝ є҆гда̀ прихо́дѧтъ ко ѻ҆лтарю̀ слѹжи́ти и҆ приноси́ти всесожжє́нїѧ гд҇ѹ,

²¹ѹ҆мы́ютъ рѹ́цѣ и҆ но́зѣ водо́ю, є҆гда̀ вхо́дѧтъ въ ски́нїю свидѣ́нїѧ, да не ѹ҆́мрѹтъ, и҆ да бѹ́детъ и҆̀мъ зако́ннѡ вѣ́чнѡ, є҆мѹ̀ и҆ родѡ́мъ є҆гѡ̀ по не́мъ.

²²И҆ речѐ гд҇ь къ мѡѷсе́ю, гл҃ѧ:

²³и҆ ты̀ возмѝ а҆рѡма́ты, цвѣ́тъ смѵ́рны и҆збра́нныѧ пѧ́ть сѡ́тъ сі́клєвъ, и҆ кїннамѡ́ма благово́нна по́лъ сегѡ̀, двѣ́сти пѧтьдесѧ́тъ, и҆ тро́сти благово́нныѧ двѣ́сти пѧтьдесѧ́тъ,

²⁴и҆ касі́и пѧ́ть сѡ́тъ сі́клєвъ свѧта́гѡ, и҆ є҆ле́а ѿ ма́слинъ (мѣ́рѹ) їнъ,

²⁵и҆ сотвори́ши се́й є҆ле́й пома́занїе ст҃о́е, мѵ́ро пома́зателное хѹдо́жествомъ мѷрова́рца: є҆ле́й пома́занїе ст҃о́е бѹ́детъ,

²⁶и҆ да пома́жеши ѿ негѡ̀ ски́нїю свидѣ́нїѧ, и҆ кївѡ́тъ ски́нїи свидѣ́нїѧ,

²⁷и҆ всѧ҄ сосѹ́ды є҆ѧ̀, и҆ свѣти́лникъ и҆ всѧ҄ сосѹ́ды є҆гѡ̀, и҆ ѻ҆лта́рь кади́лный,

²⁸и҆ ѻ҆лта́рь всесожже́нїѧ и҆ всѧ҄ є҆гѡ̀ сосѹ́ды, и҆ трапе́зѹ и҆ всѧ҄ є҆ѧ̀ сосѹ́ды, и҆ ѹ҆мыва́лницѹ и҆ стоѧ́ло є҆ѧ̀,

²⁹и҆ ѡ҆свѧти́ши ѧ҆̀, и҆ бѹ́дѹтъ ст҃а҄ѧ ст҃ы́хъ: всѧ́къ прикаса́ѧйсѧ и҆̀мъ ѡ҆ст҃и́тсѧ:

³⁰и҆ а҆арѡ́на и҆ сы́ны є҆гѡ̀ пома́жеши, и҆ ѡ҆свѧти́ши ѧ҆̀ свѧщеннодѣ́йствовати мнѣ̀:

³¹и҆ сынѡ́мъ ї҆и҃лєвымъ да рече́ши, глаго́лѧ: є҆ле́й ма́сть пома́занїѧ ст҃ъ да бѹ́детъ се́й ва́мъ въ ро́ды ва́шѧ:

³²пло́ть человѣ́ча да не пома́жетсѧ (и҆́мъ), и҆ по сложе́нїю семѹ̀ да не сотворитѐ са́ми себѣ̀ и҆но́гѡ си́це: ст҃ъ є҆́сть и҆ ѡ҆сщ҃е́нїе бѹ́детъ ва́мъ:

³³и҆́же а҆́ще сотвори́тъ си́це, и҆ и҆́же а҆́ще да́стъ ѿ негѡ̀ и҆ноплеме́нникѹ, потреби́тсѧ ѿ люді́й свои́хъ.

³⁴И҆ речѐ гд҇ь къ мѡѷсе́ю: возмѝ себѣ̀ а҆рѡма́ты, ста́кти, ѻ҆́нѷха и҆ халва́на благово́нна и҆ лїва́на чи́стагѡ: всѐ то̀ въ ра́внѹ мѣ́рѹ да бѹ́детъ:

³⁵и҆ да сотворѧ́тъ въ не́мъ ѳѷмїа́мъ мѷрова́рный, дѣ́ло мѷрова́рца смѣ́шеное, чи́сто, дѣ́ло ст҃о:

³⁶и҆ раздроби́ши ѿ си́хъ по то́нкѹ, и҆ положи́ши прѧ́мѡ свидѣ́нїю въ ски́нїи свидѣ́нїѧ, ѿѻнѹ́дѹже позна́нъ бѹ́дѹ тебѣ̀ та́мѡ: ст҃о́е ст҃ы́хъ бѹ́детъ ва́мъ ѳѷмїа́мъ:

³⁷по сложе́нїю семѹ̀ да не сотворитѐ себѣ̀ са́ми, ѡ҆сщ҃е́нїе бѹ́детъ ва́мъ ѿ гд҇а:

³⁸и҆́же а҆́ще сотвори́тъ си́це, є҆́же ѡ҆бонѧ́ти ѿ негѡ̀, поги́бнетъ дѹша̀ тогѡ̀ ѿ люді́й свои́хъ.