Read Библия Церковнославянская И҆схо́дъ 31 Bible Online

И҆схо́дъ 31 - Библия Церковнославянская bible

И҆схо́дъ 31

¹И҆ речѐ гд҇ь къ мѡѷсе́ю, гл҃ѧ:

²сѐ, нареко́хъ и҆́менемъ веселеи́ла сы́на ѹ҆рі́и, сы́на ѡ҆́рова, ѿ пле́мене ї҆ѹ́дина,

³и҆ напо́лнихъ є҆го̀ дх҃омъ бж҃їимъ премдрости и҆ смышле́нїѧ и҆ вѣ́дѣнїѧ, во всѧ́комъ дѣ́лѣ разѹмѣ́ти

⁴и҆ а҆рхїтекто́нствовати, дѣ́лати зла́то и҆ сребро̀ и҆ мѣ́дь, и҆ синетѹ̀ и҆ багрѧни́цѹ, и҆ червлени́цѹ прѧ́денѹ и҆ вѷссо́нъ ска́ный,

⁵и҆ ка́менное дѣ́ло, и҆ разли҄чнаѧ древодѣ҄лства дѣ́лати во всѣ́хъ дѣ́лѣхъ:

⁶и҆ а҆́зъ да́хъ є҆го̀ и҆ є҆лїа́ва сы́на а҆хїсама́хова ѿ пле́мене да́нова, и҆ всѧ́комѹ смы́сленномѹ се́рдцемъ да́хъ смы́слъ, и҆ потрѹдѧ́тсѧ, и҆ сотворѧ́тъ всѧ҄, є҆ли҄ка заповѣ́дахъ тебѣ̀:

⁷ски́нїю свидѣ́нїѧ и҆ кївѡ́тъ завѣ́та, и҆ ѡ҆чисти́лище є҆́же верхѹ̀ є҆гѡ̀, и҆ ѹ҆́тварь ски́нїи,

⁸и҆ же́ртвенники, и҆ трапе́зѹ и҆ всѧ҄ сосѹ́ды є҆ѧ̀, и҆ свѣти́лникъ чи́стый и҆ всѧ҄ сосѹ́ды є҆гѡ̀,

⁹и҆ ѹ҆мыва́лницѹ и҆ стоѧ́ло є҆ѧ̀,

¹⁰и҆ ри҄зы слѹжє́бныѧ а҆арѡ́нѡвы и҆ ри҄зы сынѡ́въ є҆гѡ̀, є҆́же свѧщеннодѣ́йствовати мнѣ̀,

¹¹и҆ є҆ле́й пома́занїѧ, и҆ ѳѷмїа́мъ сложе́нїѧ ст҃а́гѡ: по всѣ҄мъ, є҆ли҄ка заповѣ́дахъ тебѣ̀, сотворѧ́тъ.

¹²И҆ речѐ гд҇ь къ мѡѷсе́ю, гл҃ѧ:

¹³и҆ ты̀ заповѣ́ждь сынѡ́мъ ї҆и҃лєвымъ, глаго́лѧ: смотри́те и҆ сѹббѡ҄ты моѧ҄ сохрани́те: є҆́сть бо зна́менїе междѹ̀ мно́ю и҆ ва́ми въ ро́ды ва́шѧ, да ѹ҆вѣ́сте, ѩ҆́кѡ а҆́зъ гд҇ь ѡ҆сщ҃а́ѧй ва́съ:

¹⁴и҆ сохрани́те сѹббѡ́тѹ, ѩ҆́кѡ ст҃а̀ сїѧ̀ є҆́сть гд҇ѹ и҆ ва́мъ: ѡ҆скверни́вый ю҆̀ сме́ртїю ѹ҆́мретъ: всѧ́къ, и҆́же сотвори́тъ въ ню̀ дѣ́ло, потреби́тсѧ дѹша̀ та̀ ѿ среды̀ люді́й свои́хъ:

¹⁵ше́сть дні́й да сотвори́ши дѣла̀, въ де́нь же седмы́й сѹббѡ́та, поко́й ст҃ъ гд҇ѹ: всѧ́къ, и҆́же сотвори́тъ дѣ́ло въ седмы́й де́нь, сме́ртїю ѹ҆́мретъ:

¹⁶и҆ да сохранѧ́тъ сы́нове ї҆и҃лєвы сѹббѡ҄ты держа́ти ѧ҆̀ въ ро́ды и҆́хъ:

¹⁷завѣ́тъ вѣ́ченъ во мнѣ̀ и҆ въ сынѣ́хъ ї҆и҃левыхъ, зна́менїе є҆́сть во мнѣ̀ вѣ́чное: ѩ҆́кѡ въ шестѝ дне́хъ сотворѝ гд҇ь не́бо и҆ зе́млю, въ седмы́й же де́нь преста̀, и҆ почѝ.

¹⁸И҆ дадѐ (бг҃ъ) мѡѷсе́ю, є҆гда̀ преста̀ гл҃ѧ є҆мѹ̀ на горѣ̀ сїна́йстѣй, двѣ̀ скрижа҄ли свидѣ́нїѧ, скрижа҄ли ка́мєнны напи҄саны пе́рстомъ бж҃їимъ.