Read Библия Церковнославянская И҆схо́дъ 33 Bible Online

И҆схо́дъ 33 - Библия Церковнославянская bible

И҆схо́дъ 33

¹И҆ речѐ гд҇ь къ мѡѷсе́ю: пред̾идѝ, взы́ди ѿсю́дѹ ты̀ и҆ лю́дїе твоѝ, и҆̀хже и҆зве́лъ є҆сѝ ѿ землѝ є҆гѵ́петскїѧ на зе́млю, є҆́юже клѧ́хсѧ а҆враа́мѹ и҆ ї҆саа́кѹ и҆ ї҆а́кѡвѹ, гл҃ѧ: сѣ́мени ва́шемѹ да́мъ ю҆̀:

²и҆ послю̀ кѹ́пнѡ а҆́гг҃ла моего̀ пред̾ лице́мъ твои́мъ, и҆ и҆зжене́тъ ханане́а, а҆морре́а и҆ хетте́а, и҆ ферезе́а и҆ гергесе́а, и҆ є҆ѵе́а и҆ ї҆евѹсе́а:

³и҆ введѹ́ тѧ въ зе́млю текѹ́щѹю млеко́мъ и҆ ме́домъ: са́мъ бо не пойдѹ̀ съ тобо́ю, ѩ҆́кѡ лю́дїе жестоковы́йнїи сѹ́ть, да не ѹ҆бїю̀ тебѐ на пѹтѝ.

⁴И҆ ѹ҆слы́шавше лю́дїе сло́во сїѐ стра́шное, воспла́кашасѧ въ плаче́вныхъ (ри́захъ).

⁵И҆ речѐ гд҇ь къ мѡѷсе́ю: глаго́ли сынѡ́мъ ї҆и҃лєвымъ: вы̀ лю́дїе жестоковы́йнїи, блюди́тесѧ, да не ѩ҆́звѹ дрѹгѹ́ю наведѹ̀ на вы̀ и҆ потреблю̀ вы̀: нн҃ѣ ѹ҆̀бо сыми́те ри҄зы сла́вы ва́шеѧ и҆ ѹ҆́тварь, и҆ покажѹ̀, ѩ҆̀же сотворю̀ ва́мъ.

⁶И҆ ѿѧ́ша сы́нове ї҆и҃лєвы ѹ҆́тварь свою̀ и҆ ри҄зы ѿ горы̀ хѡри́ва.

⁷И҆ взе́мъ мѡѷсе́й кѹ́щѹ свою̀, потчѐ ю҆̀ внѣ̀ полка̀, дале́че ѿ полка̀, и҆ прозва́сѧ [ски́нїѧ свидѣ́нїѧ]: и҆ бы́сть, всѧ́къ взыскѹ́ѧй гд҇а и҆схожда́ше въ ски́нїю, ѩ҆́же внѣ̀ полка̀.

⁸Є҆гда́ же вхожда́ше мѡѷсе́й въ ски́нїю внѣ̀ полка̀, стоѧ́хѹ всѝ лю́дїе смотрѧ́ще кі́йждо пред̾ две́рьми кѹ́щи своеѧ̀, и҆ зрѧ́хѹ ѿходѧ́щѹ мѡѷсе́ю да́же вни́ти є҆мѹ̀ въ ски́нїю.

⁹Є҆гда́ же вни́де мѡѷсе́й въ ски́нїю, сни́де сто́лпъ ѡ҆́блачный и҆ ста̀ пред̾ две́рьми ски́нїи, и҆ гл҃а (гд҇ь) мѡѷсе́ю.

¹⁰И҆ ви́дѧхѹ всѝ лю́дїе сто́лпъ ѡ҆́блачный стоѧ́щь пред̾ две́рьми ски́нїи: и҆ ста́вше всѝ лю́дїе, поклони́шасѧ кі́йждо и҆з̾ две́рїй кѹ́щи своеѧ̀:

¹¹и҆ гл҃а гд҇ь къ мѡѷсе́ю лице́мъ къ лицѹ̀, ѩ҆́коже а҆́ще бы кто̀ возглаго́лалъ къ своемѹ̀ дрѹ́гѹ, и҆ ѿпѹща́шесѧ въ по́лкъ: слѹга́ же ї҆исѹ́съ, сы́нъ наѵи́нъ, ю҆́ноша не и҆схожда́ше и҆з̾ ски́нїи.

¹²И҆ речѐ мѡѷсе́й ко гд҇ѹ: сѐ, ты̀ мнѣ̀ гл҃еши: и҆зведѝ лю́ди сїѧ҄: ты́ же не ѩ҆ви́лъ мѝ є҆сѝ, кого̀ по́слеши со мно́ю: ты́ же мнѣ̀ ре́клъ є҆сѝ: вѣ́мъ тѧ̀ па́че всѣ́хъ и҆ блгдть и҆́маши ѹ҆ менє̀:

¹³а҆́ще ѹ҆̀бо ѡ҆брѣто́хъ блгдть пред̾ тобо́ю, ѩ҆ви́ ми тебѐ сама́го, да разѹ́мнѡ ви́ждѹ тѧ̀, ѩ҆́кѡ да ѡ҆брѣ́тъ бѹ́дѹ блгдть пред̾ тобо́ю, и҆ да позна́ю, ѩ҆́кѡ лю́дїе твоѝ ѩ҆зы́къ вели́къ се́й.

¹⁴И҆ гл҃а (є҆мѹ̀ гд҇ь): а҆́зъ са́мъ пред̾идѹ̀ пред̾ тобо́ю и҆ ѹ҆поко́ю тѧ̀.

¹⁵И҆ речѐ къ немѹ̀ мѡѷсе́й: а҆́ще са́мъ ты̀ не и҆́деши съ на́ми, да не и҆зведе́ши мѧ̀ ѿсю́дѹ:

¹⁶и҆ ка́кѡ вѣ́домо бѹ́детъ вои́стиннѹ, ѩ҆́кѡ ѡ҆брѣто́хъ блгдть ѹ҆ тебє̀ а҆́зъ же и҆ лю́дїе твоѝ, то́чїю и҆дѹ́щѹ тѝ съ на́ми; и҆ просла́вленъ бѹ́дѹ а҆́зъ же и҆ лю́дїе твоѝ па́че всѣ́хъ ѩ҆зы҄къ, є҆ли́цы сѹ́ть на землѝ.

¹⁷Рече́ же гд҇ь къ мѡѷсе́ю: и҆ сїѐ тебѣ̀ сло́во, є҆́же ре́клъ є҆сѝ, сотворю̀: ѡ҆брѣ́лъ бо є҆сѝ блгдть предо мно́ю, и҆ вѣ́мъ тѧ̀ па́че всѣ́хъ.

¹⁸И҆ глаго́ла мѡѷсе́й: покажи́ ми сла́вѹ твою̀.

¹⁹И҆ речѐ (гд҇ь къ мѡѷсе́ю): а҆́зъ пред̾идѹ̀ пред̾ тобо́ю сла́вою мое́ю и҆ воззовѹ̀ ѡ҆ и҆́мени мое́мъ, гд҇ь пред̾ тобо́ю: и҆ поми́лѹю, є҆го́же а҆́ще ми́лѹю, и҆ ѹ҆ще́дрю, є҆го́же а҆́ще ще́дрю.

²⁰И҆ речѐ: не возмо́жеши ви́дѣти лица̀ моегѡ̀: не бо̀ ѹ҆́зритъ человѣ́къ лицѐ моѐ, и҆ жи́въ бѹ́детъ.

²¹И҆ речѐ гд҇ь: сѐ, мѣ́сто ѹ҆ менє̀, и҆ ста́неши на ка́мени:

²²є҆гда́ же пре́йдетъ сла́ва моѧ̀, и҆ положѹ́ тѧ въ разсѣ́линѣ ка́мене, и҆ покры́ю рѹко́ю мое́ю над̾ тобо́ю, до́ндеже мимоидѹ̀:

²³и҆ ѿимѹ̀ рѹ́кѹ мою̀, и҆ тогда̀ ѹ҆́зриши за҄днѧѧ моѧ҄: лице́ же моѐ не ѩ҆ви́тсѧ тебѣ̀.