Read Библия Церковнославянская И҆схо́дъ 35 Bible Online

И҆схо́дъ 35 - Библия Церковнославянская bible

И҆схо́дъ 35

¹И҆ собра̀ мѡѷсе́й ве́сь со́нмъ сынѡ́въ ї҆и҃левыхъ и҆ речѐ къ ни҄мъ: сїѧ҄ словеса̀, ѩ҆̀же гл҃а гд҇ь твори́ти ѧ҆̀:

²ше́сть дні́й сотвори́ши дѣла̀, въ де́нь же седмы́й почі́еши, ст҃а̀ сѹббѡ́та, поко́й гд҇ѹ: всѧ́къ творѧ́й дѣ́ло въ ню̀, да ѹ҆́мретъ:

³да не возгнѣтитѐ ѻ҆гнѧ̀ во всѣ́хъ домѣ́хъ ва́шихъ въ де́нь сѹббѡ́тный: а҆́зъ гд҇ь.

⁴И҆ речѐ мѡѷсе́й ко всемѹ̀ со́нмѹ сынѡ́въ ї҆и҃левыхъ, глаго́лѧ: сїѐ сло́во, є҆́же завѣща̀ гд҇ь гл҃ѧ:

⁵возми́те ѿ себє̀ сами́хъ ѹ҆ча́стїе гд҇ѹ: всѧ́къ по во́ли се́рдца своегѡ̀ да принесе́тъ нача́тки гд҇ѹ, зла́то, сребро̀, мѣ́дь,

⁶синетѹ̀, багрѧни́цѹ, червлени́цѹ сѹгѹ́бѹ спрѧ́денѹ, и҆ вѷссо́нъ ска́ный и҆ во́лнѹ ко́зїю,

⁷и҆ ко́жы ѡ҆́вни ѡ҆червлє́ны, и҆ ко́жы си҄ни, и҆ древеса̀ негнїю҄ща,

⁸и҆ є҆ле́й во свѣще́нїе, и҆ ѳѷмїа́мъ въ є҆ле́й пома́занїѧ, и҆ въ сложе́нїе ѳѷмїа́ма:

⁹и҆ ка́мєни сардї҄йски, и҆ ка́мєни въ ваѧ́нїе на ри́зѹ ве́рхнюю и҆ на поди́ръ {Славе́н.: до́лгаѧ ри́за.}:

¹⁰и҆ всѧ́къ премѹ́дрый се́рдцемъ въ ва́съ ше́дъ да дѣ́лаетъ всѧ҄, є҆ли҄ка заповѣ́да гд҇ь:

¹¹ски́нїю и҆ завѣ҄сы, и҆ покро́вы и҆ развѡ́ры, и҆ колкѝ и҆ верєѝ, и҆ столпы̀ и҆ стѡѧ́ла:

¹²и҆ кївѡ́тъ свидѣ́нїѧ и҆ нѡси́ла є҆гѡ̀, и҆ ѡ҆чисти́лище є҆гѡ̀ и҆ завѣ́сѹ, (и҆ ѻ҆пѡ́ны двора̀, и҆ столпы̀ є҆гѡ̀, и҆ ка́мєни смара́гдѡвы, и҆ ѳѷмїа́мъ и҆ є҆ле́й пома́занїѧ,)

¹³и҆ трапе́зѹ и҆ нѡси́ла є҆ѧ̀, и҆ всѧ҄ сосѹ́ды є҆ѧ̀, и҆ хлѣ́бы предложе́нїѧ, (*и҆ ѻ҆лта́рь и҆ всѧ҄ сосѹ́ды є҆гѡ̀,)

¹⁴и҆ свѣти́лникъ свѣ́та и҆ всѧ҄ сосѹ́ды є҆гѡ̀, и҆ свѣти҄ла є҆гѡ̀ и҆ є҆ле́й свѣти́лный,

¹⁵и҆ ѻ҆лта́рь кади́лный и҆ нѡси́ла є҆гѡ̀, и҆ є҆ле́й пома́занїѧ, и҆ ѳѷмїа́мъ сложе́нїѧ, и҆ завѣ́сѹ две́рїй ски́нїи,

¹⁶и҆ ѻ҆лта́рь всесожже́нїѧ, и҆ ѻ҆гни́ще є҆гѡ̀ мѣ́дѧно и҆ нѡси́ла є҆гѡ̀, и҆ всѧ҄ сосѹ́ды є҆гѡ̀, и҆ ѹ҆мыва́лницѹ, и҆ стоѧ́ло є҆ѧ̀,

¹⁷и҆ ѻ҆пѡ́ны двора̀, и҆ столпы̀ є҆гѡ̀ и҆ стѡѧ́ла є҆гѡ̀, и҆ завѣ́сѹ две́рїй двора̀,

¹⁸и҆ колкѝ ски́нїи, и҆ колкѝ двора̀, и҆ ѹ҆́жы и҆́хъ:

¹⁹и҆ ри҄зы свѧты҄ѧ а҆арѡ́на жерца̀, и҆ ри҄зы, въ ни́хже слѹжи́ти и҆́мѹтъ во ст҃ѣ́мъ, и҆ ри҄зы сынѡ́мъ а҆арѡ́нѡвымъ свѧще́нства (и҆ є҆ле́й пома́занїѧ, и҆ ѳѷмїа́мъ сложе́нїѧ).

²⁰И҆ и҆зы́де ве́сь со́нмъ сынѡ́въ ї҆и҃левыхъ ѿ мѡѷсе́а.

²¹И҆ принесо́ша кі́йждо, ѩ҆̀же возлюбѝ се́рдце и҆́хъ, и҆ ѩ҆́коже возмнѣ́сѧ дѹшѝ и҆́хъ, принесо́ша ѹ҆ча́стїе гд҇ѹ на всѧ҄ дѣла̀ ски́нїи свидѣ́нїѧ, и҆ на всѧ҄ сосѹ́ды є҆ѧ̀, и҆ на всѧ҄ ри҄зы свѧти́лища:

²²и҆ принесо́ша мѹ́жїе ѿ же́нъ свои́хъ, кі́йждо, ѩ҆́коже помы́сли ѹ҆мо́мъ, принесо́ша печа҄ти и҆ ѹ҆серѧ҄зи, и҆ пє́рстни и҆ плени҄цы, и҆ мѡни́ста и҆ всѧ́къ сосѹ́дъ зла́тъ: и҆ всѝ є҆ли́цы принесо́ша ѹ҆ча́стїе зла́та гд҇ѹ,

²³и҆ всѧ́къ ѹ҆ негѡ́же ѡ҆брѣ́тесѧ синета̀ и҆ багрѧни́ца, и҆ червлени́ца и҆ вѷссо́нъ, и҆ ко́жы си҄ни и҆ ко́жы ѡ҆́вни ѡ҆червлє́ны, (и҆ ко́жы кѡ́зїѧ) принесо́ша:

²⁴всѧ́къ ѿдѣлѧ́ѧй ѹ҆ча́стїе, сребро̀ и҆ мѣ́дь, принесо́ша ѹ҆ча҄стїѧ гд҇ѹ: и҆ ѹ҆ ни́хже ѡ҆брѣто́шасѧ древеса̀ негнїю҄щаѧ, на всѧ҄ содѣ́лѡванїѧ сосѹ́дѡвъ принесо́ша:

²⁵и҆ всѧ́ка жена̀ мѹ́драѧ ѹ҆мо́мъ рѹка́ма прѧ́сти, принесѐ прѧ́дєнаѧ, синетѹ̀ и҆ багрѧни́цѹ и҆ червлени́цѹ и҆ вѷссо́нъ:

²⁶и҆ всѧ҄ жєны̀, и҆̀мже возлюби́сѧ во ѹ҆мѣ̀ и҆́хъ, хи́тростїю спрѧдо́ша во́лнѹ ко́зїю:

²⁷и҆ кнѧ҄зи принесо́ша ка́мєни смара́гдѡвы и҆ ка́мєни на соверше́нїе ри́зѣ ве́рхней {Гре́ч.: є҆пѡмі́съ, є҆вр.: є҆фѹ́дъ.}, и҆ на сло́во {Гре́ч.: логі́онъ.},

²⁸и҆ на сложе́нїе, и҆ на є҆ле́й пома́занїѧ, и҆ на сложе́нїе ѳѷмїа́ма:

²⁹и҆ всѧ́къ мѹ́жъ, и҆лѝ жена̀, и҆̀мже наносѧ́ше ѹ҆́мъ и҆́хъ, вше́дшымъ твори́ти всѧ҄ дѣла̀, є҆ли҄ка заповѣ́да гд҇ь твори́ти ѧ҆̀ мѡѷсе́омъ, принесо́ша сы́нове ї҆и҃лєвы ѹ҆ча́стїе гд҇ѹ.

³⁰И҆ речѐ мѡѷсе́й сынѡ́мъ ї҆и҃лєвымъ: сѐ, наречѐ бг҃ъ и҆́менемъ веселеи́ла сы́на ѹ҆рі́ина, сы́на ѡ҆́рова, ѿ пле́мене ї҆ѹ́дина,

³¹и҆ напо́лни є҆го̀ дх҃а бж҃їѧ, премдрости и҆ ра́зѹма, и҆ ѹ҆мѣ́нїй всѣ́хъ,

³²а҆рхїтекто́нствовати во всѣ́хъ дѣлесѣ́хъ древодѣ́ланїѧ {а҆рхїтекто́нства.}, твори́ти зла́то и҆ сребро̀ и҆ мѣ́дь,

³³и҆ ваѧ́ти ка́мєни, и҆ дѣ́лати дре́во, и҆ твори́ти по всемѹ̀ дѣ́лѹ премѹ́дрости:

³⁴и҆ преѹспѣва́ти дадѐ во ѹ҆мѣ̀ є҆мѹ̀ и҆ є҆лїа́вѹ а҆хїсама́ховѹ, ѿ пле́мене да́нова:

³⁵и҆ напо́лни и҆̀хъ премѹ́дрости, ѹ҆ма̀, є҆́же разѹмѣ́ти твори́ти всѧ҄ дѣла̀ ст҃ы́ни, тка҄нїѧ и҆ пестрє́нїѧ тка́ти червлени́цею и҆ багрѧни́цею и҆ вѷссо́номъ, твори́ти всѧ́кое дѣ́ло хѹдо́жества разли́чна.