Read Библия Церковнославянская И҆схо́дъ 38 Bible Online

И҆схо́дъ 38 - Библия Церковнославянская bible

И҆схо́дъ 38

¹И҆ сотворѝ веселеи́лъ кївѡ́тъ

²и҆ позлатѝ є҆го̀ зла́томъ чи́стымъ внѹтрьѹ́дѹ и҆ внѣѹ́дѹ,

³и҆ сотворѝ є҆мѹ̀ зла́тъ ѡ҆бво́дъ ѻ҆бою́дѹ: и҆ слїѧ̀ є҆мѹ̀ четы́ри кѡлца̀ зла҄та на четы́ри страны҄ є҆гѡ̀: два̀ на странѣ̀ є҆ди́нѣй, и҆ два̀ на странѣ̀ дрѹзѣ́й,

⁴широкѝ носи́ламъ, ѩ҆́кѡ носи́ти є҆го̀ и҆́ми.

⁵И҆ сотворѝ ѡ҆чисти́лище над̾ кївѡ́томъ ѿ зла́та чи́ста,

⁶и҆ два̀ херѹвї҄ма зла҄ты:

⁷херѹві́ма є҆ди́наго на странѣ̀ ѡ҆чисти́лища, и҆ херѹві́ма втора́го на странѣ̀ вторѣ́й ѡ҆чисти́лища,

⁸ѡ҆сѣнѧ́ющыѧ кри́лами свои́ми над̾ ѡ҆чисти́лищемъ.

⁹И҆ сотворѝ трапе́зѹ предложе́нїѧ ѿ зла́та чи́ста,

¹⁰и҆ слїѧ̀ є҆́й четы́ри кѡлца̀ зла҄та: два̀ кѡлца̀ на странѣ̀ є҆ди́нѣй, и҆ два̀ кѡлца̀ на странѣ̀ вторѣ́й, широкѝ ѩ҆́кѡ носи́ти носи́лами въ ни́хъ.

¹¹И҆ нѡси́ла кївѡ́тѹ и҆ трапе́зѣ сотворѝ, и҆ позлатѝ и҆̀хъ зла́томъ.

¹²И҆ сотворѝ сосѹ́ды трапе́зѣ, блю҄да и҆ ѳѷмїа́мники, и҆ ча́шы зла҄ты и҆ возлива́лники, и҆́миже возлива́ти бѹ́детъ, ѿ зла́та.

¹³И҆ сотворѝ свѣти́лникъ, є҆́же свѣти́ти, златы́й, крѣ́покъ стебло́мъ,

¹⁴ и҆ вѣ҄тви ѿ ѻ҆бои́хъ стра́нъ є҆гѡ̀:

¹⁵и҆ ѿ вѣ́твїй є҆гѡ̀ ѿра҄сли и҆сходѧ́щыѧ, трѝ ѿ є҆ди́ныѧ и҆ трѝ ѿ вторы́ѧ страны̀, ра҄вны дрѹ́гъ дрѹ́гѹ:

¹⁶и҆ свѣти҄ла и҆́хъ, ѩ҆̀же на верхѹ̀ и҆́хъ, во ѡ҆́бразъ ѻ҆рѣ́ха, ѿ ни́хъ: и҆ цвѣтцы̀ ѿ ни́хъ, (и҆ крѹ́зи и҆́хъ,) да бѹ́дѹтъ свѣти҄ла на ни́хъ: и҆ цвѣте́цъ седмы́й, и҆́же на краю̀ свѣти́ла, на верхѹ̀ свы́ше, крѣ́пкїй ве́сь зла́тъ:

¹⁷и҆ се́дмь свѣти҄лъ на не́мъ златы́хъ, и҆ щипцы̀ є҆гѡ̀ златы҄ѧ, и҆ подста́вы и҆́хъ зла҄ты.

¹⁸Се́й посребрѝ столпы̀ и҆ слїѧ̀ столпѡ́мъ ко́лца зла҄та, и҆ позлатѝ верєѝ зла́томъ, и҆ позлатѝ столпы̀ завѣ́сѣ зла́томъ, и҆ сотворѝ пє́тли зла҄ты:

¹⁹се́й сотворѝ и҆ крючкѝ ски́нїи зла҄ты, и҆ крючкѝ двора̀, и҆ крючкѝ на распростре́нїе завѣ́сы све́рхѹ мѣ҄дѧны:

²⁰се́й слїѧ̀ глави҄цы срє́брѧны ски́нїи, и҆ глави҄цы мѣ҄дѧны две́рїй ски́нїи, и҆ двє́ри двора̀, и҆ пє́тли сотворѝ срє́брѧны на столпа́хъ: се́й посребрѝ и҆̀хъ:

²¹се́й сотворѝ колкѝ ски́нїи и҆ колкѝ двора̀ мѣ҄дѧны.

²²Се́й сотворѝ ѻ҆лта́рь мѣ́дѧнъ и҆з̾ кади́лницъ мѣ́дѧныхъ, ѩ҆̀же бы́ша мѹжє́мъ вскрамоли́вшымсѧ съ коре́овымъ со́нмищемъ:

²³се́й сотворѝ всѧ҄ сосѹ́ды ѻ҆лтарѧ̀ и҆ кади́лникъ є҆гѡ̀, и҆ стоѧ́ло є҆гѡ̀ и҆ ча́шы, и҆ ви҄лицы є҆гѡ̀ мѣ҄дѧны:

²⁴се́й сотворѝ ѻ҆лтарю̀ ѡ҆́крестъ ѡ҆бложе́нїе дѣ́ломъ мре́жнымъ, сни́зѹ ѻ҆гни́ща под̾ ни́мъ да́же до среды̀ є҆гѡ̀, и҆ положѝ на не́мъ четы́ри кѡлца̀ ѿ четы́рехъ стра́нъ ѡ҆бложе́нїѧ ѻ҆лтарѧ̀ мѣ҄дѧны, широкѝ носи́ламъ, є҆́же носи́ти ѻ҆лта́рь на ни́хъ:

²⁵се́й сотворѝ є҆ле́й пома́занїѧ ст҃ы́й, и҆ сложе́нїе ѳѷмїа́ма, дѣ́ло чи́стое мѷрова́рца:

²⁶се́й сотворѝ ѹ҆мыва́лницѹ мѣ́дѧнѹ и҆ стоѧ́ло є҆ѧ̀ мѣ́дѧно и҆з̾ зерца́лъ по́стницъ, ѩ҆̀же пости́шасѧ ѹ҆ две́рїй ски́нїи свидѣ́нїѧ, въ ѻ҆́ньже де́нь поста́ви ю҆̀:

²⁷и҆ сотворѝ ѹ҆мыва́лницѹ, да ѡ҆мыва́ютъ и҆з̾ неѧ̀ мѡѷсе́й и҆ а҆арѡ́нъ и҆ сы́нове є҆гѡ̀ рѹ́цѣ своѝ и҆ но́зѣ, входѧ́щымъ и҆̀мъ въ ски́нїю свидѣ́нїѧ: и҆лѝ є҆гда̀ прихо́дѧтъ ко ѻ҆лтарю̀ слѹжи́ти, ѡ҆мыва́хѹсѧ и҆з̾ неѧ̀, ѩ҆́коже заповѣ́да гд҇ь мѡѷсе́ю.