Read Библия Церковнославянская И҆схо́дъ 39 Bible Online

И҆схо́дъ 39 - Библия Церковнославянская bible

И҆схо́дъ 39

¹Всѐ зла́то, є҆́же содѣ́лано бы́сть въ дѣ́лѣ по всѧ́комѹ дѣ́ланїю ст҃ы́хъ, бѧ́ше зла́та нача́ткѡвъ два́десѧть де́вѧть тала́нтѡвъ и҆ се́дмь сѡ́тъ три́десѧть сі́клєвъ, по сі́клю свѧто́мѹ:

²и҆ сребра̀ ѹ҆ча́стїе ѿ и҆счи́сленныхъ мѹже́й со́нма, сто̀ тала́нтѡвъ и҆ ты́сѧща се́дмь сѡ́тъ се́дмьдесѧтъ пѧ́ть сі́клєвъ:

³дра́хма є҆ди́на съ главы̀ по́лъ сі́клѧ, по сі́клю свѧто́мѹ: всѧ́къ приходѧ́й къ пресмотре́нїю ѿ два́десѧти лѣ́тъ и҆ вы́шше, на шестьдесѧ́тъ тє́мъ и҆ на трѝ ты́сѧщы пѧ́ть сѡ́тъ и҆ пѧтьдесѧ́тъ.

⁴И҆ бы́ша сто̀ тала҄нтъ сребра̀ на слїѧ́нїе ста̀ глави́цъ ски́нїи и҆ на глави҄цы завѣ҄сныѧ, сто̀ глави́цъ на сто̀ тала҄нтъ, тала́нтъ на глави́цѹ:

⁵и҆ ты́сѧщѹ се́дмь сѡ́тъ се́дмьдесѧтъ пѧ́ть сі́клєвъ сотворѝ на пє́тли столпа́мъ, и҆ позлатѝ глави҄цы и҆́хъ, и҆ ѹ҆красѝ ѧ҆̀.

⁶И҆ мѣ́дь ѹ҆ча́стїѧ, се́дмьдесѧтъ тала҄нтъ и҆ двѣ̀ ты́сѧщы и҆ четы́реста сі́клєвъ.

⁷И҆ сотвори́ша и҆з̾ неѧ̀ стѡѧ́ла двє́рнаѧ ски́нїи свидѣ́нїѧ,

⁸и҆ стѡѧ́ла двора̀ ѡ҆́крестъ, и҆ стѡѧ́ла две́рїй двора̀, и҆ колкѝ ски́нїи, и҆ колкѝ двора̀ ѡ҆́крестъ, и҆

⁹ѡ҆бложе́нїе мѣ́дѧно ѡ҆́крестъ ѻ҆лтарѧ̀, и҆ всѧ҄ сосѹ́ды ѻ҆лтарѧ̀, и҆ всѧ҄ ѻ҆рѹ҄дїѧ ски́нїи свидѣ́нїѧ.

¹⁰И҆ сотвори́ша сы́нове ї҆и҃лєвы, ѩ҆́коже заповѣ́да гд҇ь мѡѷсе́ю, та́кѡ сотвори́ша.

¹¹Ѿ и҆збы́вшагѡ же зла́та ѹ҆ча́стїѧ сотвори́ша сосѹ́ды, є҆́же слѹжи́ти въ ни́хъ пред̾ гд҇емъ:

¹²и҆ ѿ ѡ҆ста́вшїѧ синеты̀ и҆ багрѧни́цы, и҆ червлени́цы и҆ вѷссо́на, сотвори́ша ри҄зы слѹжє́бныѧ а҆арѡ́нѹ, є҆́же слѹжи́ти въ ни́хъ во свѧти́лищи.

¹³И҆ принесо́ша ри҄зы къ мѡѷсе́ю, и҆ ски́нїю и҆ сосѹ́ды є҆ѧ̀, и҆ верєѝ є҆ѧ̀ и҆ столпы̀ и҆ стѡѧ́ла є҆ѧ̀,

¹⁴и҆ кївѡ́тъ завѣ́та и҆ нѡси́ла є҆гѡ̀,

¹⁵и҆ ѻ҆лта́рь и҆ всѧ҄ сосѹ́ды є҆гѡ̀, и҆ є҆ле́й пома́занїѧ и҆ ѳѷмїа́мъ сложе́нїѧ,

¹⁶и҆ свѣти́лникъ чи́стый и҆ свѣти҄ла є҆гѡ̀, свѣти҄ла вжига́нїѧ и҆ є҆ле́й свѣтѣ́нїѧ:

¹⁷и҆ трапе́зѹ предложе́нїѧ и҆ всѧ҄ сосѹ́ды є҆ѧ̀, и҆ хлѣ́бы предложє́нныѧ:

¹⁸и҆ ри҄зы свѧты҄ѧ, ѩ҆̀же сѹ́ть а҆арѡ҄ни, и҆ ри҄зы сынѡ́въ є҆гѡ̀ на жре́чество:

¹⁹и҆ ѻ҆пѡ́ны двора̀, и҆ столпы̀, и҆ стѡѧ́ла є҆гѡ̀, и҆ завѣ́сѹ две́рїй ски́нїи и҆ две́рїй двора̀: и҆ всѧ҄ сосѹ́ды ски́нїи и҆ всѧ҄ ѻ҆рѹ҄дїѧ є҆ѧ̀:

²⁰и҆ покро́вцы ко́жы ѡ҆́вни ѡ҆червлє́ны, и҆ покро́вы ко́жы си҄нїѧ, и҆ про́чихъ ѻ҆пѡ́ны:

²¹и҆ колкѝ, и҆ всѧ҄ ѻ҆рѹ҄дїѧ на дѣла̀ ски́нїи свидѣ́нїѧ:

²²є҆ли҄ка заповѣ́да гд҇ь мѡѷсе́ю, та́кѡ сотвори́ша сы́нове ї҆и҃лєвы всѐ ѹ҆строе́нїе.

²³И҆ ви́дѣ мѡѷсе́й всѧ҄ дѣла̀, и҆ бѧ́хѹ сотворє́на та҄, ѩ҆́коже заповѣ́да гд҇ь мѡѷсе́ю, та́кѡ сотвори́ша ѧ҆̀, и҆ благословѝ и҆̀хъ мѡѷсе́й.