Read Библия Церковнославянская И҆схо́дъ 6 Bible Online

И҆схо́дъ 6 - Библия Церковнославянская bible

И҆схо́дъ 6

¹И҆ речѐ гд҇ь къ мѡѷсе́ю: сѐ, ѹ҆́зриши, что̀ сотворю̀ фараѡ́нѹ: рѹко́ю бо крѣ́пкою ѿпѹ́ститъ и҆̀хъ и҆ мы́шцею высо́кою и҆зжене́тъ и҆̀хъ ѿ землѝ своеѧ̀.

²Гл҃а же бг҃ъ къ мѡѷсе́ю и҆ речѐ є҆мѹ̀: а҆́зъ гд҇ь,

³и҆ ѩ҆ви́хсѧ а҆враа́мѹ, и҆ ї҆саа́кѹ, и҆ ї҆а́кѡвѹ, бг҃ъ сы́й и҆́хъ, и҆ и҆́мене моегѡ̀ гд҇ь не ѩ҆ви́хъ и҆̀мъ:

⁴и҆ поста́вихъ завѣ́тъ мо́й съ ни́ми, ѩ҆́кѡ да́ти и҆̀мъ зе́млю ханаа́нскѹ, зе́млю прише́лствїѧ и҆́хъ, на не́йже и҆ ѡ҆бита́хѹ:

⁵а҆́зъ же ѹ҆слы́шахъ стена́нїе сынѡ́въ ї҆и҃левыхъ, и҆̀мже є҆гѵ́птѧне порабо́тиша и҆̀хъ, и҆ помѧнѹ́хъ завѣ́тъ мо́й:

⁶и҆дѝ, рцы̀ сынѡ́мъ ї҆и҃лєвымъ глаго́лѧ: а҆́зъ гд҇ь, и҆ и҆зведѹ̀ ва́съ ѿ наси́лїѧ є҆гѵ́петска, и҆ и҆зба́влю ва́съ ѿ рабо́ты (и҆́хъ), и҆ ѿимѹ̀ ва́съ мы́шцею высо́кою и҆ сѹдо́мъ вели́кимъ,

⁷и҆ прїимѹ̀ вы̀ себѣ̀ въ лю́ди, и҆ бѹ́дѹ ва́мъ бг҃ъ: и҆ ѹ҆разѹмѣ́ете, ѩ҆́кѡ а҆́зъ гд҇ь бг҃ъ ва́шъ, и҆зведы́й ва́съ ѿ землѝ є҆гѵ́петскїѧ и҆ ѿ наси́лїѧ є҆гѵ́петска:

⁸и҆ введѹ̀ ва́съ въ зе́млю, на ню́же простро́хъ рѹ́кѹ мою̀, да́ти ю҆̀ а҆враа́мѹ и҆ ї҆саа́кѹ и҆ ї҆а́кѡвѹ: и҆ да́мъ ю҆̀ ва́мъ въ наслѣ́дїе, а҆́зъ гд҇ь.

⁹Глаго́ла же мѡѷсе́й та́кѡ сынѡ́мъ ї҆и҃лєвымъ, и҆ не послѹ́шаша мѡѷсе́а ѿ малодѹ́шїѧ и҆ ѿ дѣ́лъ жесто́кихъ.

¹⁰Рече́ же гд҇ь къ мѡѷсе́ю, гл҃ѧ:

¹¹вни́ди, глаго́ли фараѡ́нѹ царю̀ є҆гѵ́петскомѹ, да ѿпѹ́ститъ сы́ны ї҆и҃лєвы и҆з̾ землѝ своеѧ̀.

¹²Рече́ же мѡѷсе́й пред̾ гд҇емъ глаго́лѧ: сѐ, сы́нове ї҆и҃лєвы не послѹ́шаша менѐ, и҆ ка́кѡ послѹ́шаетъ менѐ фараѡ́нъ; а҆́зъ же неслове́сенъ є҆́смь.

¹³Рече́ же гд҇ь къ мѡѷсе́ю и҆ а҆арѡ́нѹ и҆ завѣща̀ и҆̀мъ вни́ти къ фараѡ́нѹ царю̀ є҆гѵ́петскомѹ, да ѿпѹ́ститъ сы́ны ї҆и҃лєвы ѿ землѝ є҆гѵ́петскїѧ.

¹⁴И҆ сі́и старѣ҄йшины домѡ́въ ѻ҆те́чествъ и҆́хъ: сы́нове рѹви́ма, пе́рвенца ї҆и҃лева, є҆нѡ́хъ и҆ фалло́съ, а҆срѡ́нъ и҆ хармї̀: сїѐ пле́мѧ рѹви́мово.

¹⁵Сы́нове же сѷмеѡ́нѡвы: ї҆емѹи́лъ и҆ ї҆амі́нъ, и҆ а҆ѡ́дъ и҆ а҆хі́нъ, и҆ саа́ръ и҆ саѹ́лъ, и҆̀же ѿ фїнїсси́ны: сїѧ҄ рождє́нїѧ сынѡ́въ сѷмеѡ́новыхъ.

¹⁶И҆ сїѧ҄ и҆мена̀ сынѡ́въ леѵі́иныхъ по сродствѡ́мъ и҆́хъ: гирсѡ́нъ, каа́ѳъ и҆ мера́рї: лѣ́тъ же житїѧ̀ леѵі́ина сто̀ три́десѧть се́дмь.

¹⁷Сі́и же сы́нове гирсѡ҄ни: ловенї̀ и҆ семе́й: до́мове рожде́нїѧ и҆́хъ.

¹⁸Сы́нове же каа́ѳѡвы: а҆мвра́мъ и҆ ї҆ссаа́ръ, хеврѡ́нъ и҆ ѻ҆зїи́лъ: лѣ́тъ же житїѧ̀ каа́ѳова сто̀ три́десѧть трѝ.

¹⁹Сы́нове же мера҄рїны: моолї̀ и҆ ѻ҆мѹсї̀: сі́и до́мове рожде́нїѧ леѵі́ина по сродствѡ́мъ и҆́хъ.

²⁰И҆ поѧ̀ а҆мвра́мъ ї҆ѡхаве́дѹ, дще́рь бра́та ѻ҆тца̀ своегѡ̀, себѣ̀ въ женѹ̀, и҆ родѝ є҆мѹ̀ а҆арѡ́на и҆ мѡѷсе́а и҆ марїа́мь сестрѹ̀ и҆́хъ: лѣ́тъ же житїѧ̀ а҆мвра́мова сто̀ три́десѧть се́дмь.

²¹Сы́нове же ї҆ссаа́рѡвы: корѐ и҆ нафе́къ и҆ зе́хрї.

²²Сы́нове же ѻ҆зїи́лѡвы: мїсаи́лъ и҆ є҆лїсафа́нъ и҆ сегрї̀.

²³Поѧ́ же а҆арѡ́нъ є҆лїсаве́тѹ, дще́рь а҆мїнада́вовѹ, сестрѹ̀ наассѡ́новѹ, себѣ̀ въ женѹ̀, и҆ родѝ є҆мѹ̀ нада́ва и҆ а҆вїѹ́да, и҆ є҆леаза́ра и҆ ї҆ѳама́ра.

²⁴Сы́нове же коре́ѡвы: а҆си́ръ и҆ є҆лкана̀ и҆ а҆вїаса́ръ: сїѧ҄ рождє́нїѧ коре́ѡва.

²⁵И҆ є҆леаза́ръ, сы́нъ а҆арѡ́новъ, поѧ̀ ѿ дще́рей фѹтїи́ловыхъ себѣ̀ въ женѹ̀, и҆ родѝ є҆мѹ̀ фїнее́са: сїѧ҄ старѣ҄йшинства ѻ҆те́чества леѵі́тска по сродствѡ́мъ и҆́хъ.

²⁶Се́й а҆арѡ́нъ и҆ мѡѷсе́й, и҆̀мже речѐ бг҃ъ и҆звестѝ сы́ны ї҆и҃лєвы и҆з̾ землѝ є҆гѵ́петскїѧ съ си́лою и҆́хъ.

²⁷Сі́и сѹ́ть, и҆̀же глаго́ласта къ фараѡ́нѹ царю̀ є҆гѵ́петскомѹ, є҆́же и҆звестѝ сы́ны ї҆и҃лєвы ѿ землѝ є҆гѵ́петскїѧ: се́й а҆арѡ́нъ и҆ мѡѷсе́й,

²⁸въ ѻ҆́ньже де́нь гл҃а гд҇ь къ мѡѷсе́ю въ землѝ є҆гѵ́петстѣй.

²⁹И҆ речѐ гд҇ь къ мѡѷсе́ю гл҃ѧ: а҆́зъ гд҇ь: глаго́ли къ фараѡ́нѹ царю̀ є҆гѵ́петскомѹ, є҆ли҄ка а҆́зъ гл҃ю къ тебѣ̀.

³⁰И҆ речѐ мѡѷсе́й пред̾ гд҇емъ: сѐ, а҆́зъ хѹдогла́сенъ є҆́смь, и҆ ка́кѡ послѹ́шаетъ менѐ фараѡ́нъ;