Read Библия Церковнославянская И҆схо́дъ 7 Bible Online

И҆схо́дъ 7 - Библия Церковнославянская bible

И҆схо́дъ 7

¹И҆ речѐ гд҇ь къ мѡѷсе́ю, гл҃ѧ: сѐ, да́хъ тѧ̀ бг҃а фараѡ́нѹ, и҆ а҆арѡ́нъ бра́тъ тво́й бѹ́детъ тво́й проро́къ:

²ты́ же возглаго́леши є҆мѹ̀ всѧ҄, є҆ли҄ка тебѣ̀ заповѣ́даю: а҆арѡ́нъ же бра́тъ тво́й возглаго́летъ къ фараѡ́нѹ, да ѿпѹ́ститъ сы́ны ї҆и҃лєвы ѿ землѝ своеѧ̀:

³а҆́зъ же ѡ҆жесточѹ̀ се́рдце фараѡ́ново и҆ ѹ҆мно́жѹ зна́мєнїѧ моѧ҄ и҆ чѹдеса̀ въ землѝ є҆гѵ́петстѣй:

⁴и҆ не послѹ́шаетъ ва́съ фараѡ́нъ, и҆ возложѹ̀ рѹ́кѹ мою̀ на є҆гѵ́петъ и҆ и҆зведѹ̀ съ си́лою мое́ю лю́ди моѧ҄ сы́ны ї҆и҃лєвы ѿ землѝ є҆гѵ́петскїѧ, со ѿмще́нїемъ вели́кимъ:

⁵и҆ ѹ҆вѣ́дѧтъ всѝ є҆гѵ́птѧне, ѩ҆́кѡ а҆́зъ є҆́смь гд҇ь, простира́ѧ рѹ́кѹ мою̀ на є҆гѵ́петъ, и҆ и҆зведѹ̀ сы́ны ї҆и҃лєвы ѿ среды̀ и҆́хъ.

⁶Сотвори́ же мѡѷсе́й и҆ а҆арѡ́нъ, ѩ҆́коже заповѣ́да и҆̀мъ гд҇ь, та́кѡ сотвори́ша.

⁷Мѡѷсе́й же бѣ̀ ѻ҆сми́десѧти лѣ́тъ, а҆арѡ́нъ же бра́тъ є҆гѡ̀ ѻ҆сми́десѧти тре́хъ лѣ́тъ, є҆гда̀ глаго́ласта къ фараѡ́нѹ.

⁸И҆ речѐ гд҇ь къ мѡѷсе́ю и҆ а҆арѡ́нѹ гл҃ѧ:

⁹и҆ а҆́ще рече́тъ къ ва́мъ фараѡ́нъ, глаго́лѧ: дади́те на́мъ зна́менїе и҆лѝ чѹ́до: и҆ рече́ши а҆арѡ́нѹ бра́тѹ твоемѹ̀: возмѝ же́злъ и҆ пове́ржи на зе́млю пред̾ фараѡ́номъ и҆ пред̾ рабы҄ є҆гѡ̀, и҆ бѹ́детъ ѕмі́й.

¹⁰Вни́де же мѡѷсе́й и҆ а҆арѡ́нъ пред̾ фараѡ́на и҆ пред̾ рабы҄ є҆гѡ̀, и҆ сотвори́ша та́кѡ, ѩ҆́коже заповѣ́да и҆̀мъ гд҇ь: и҆ пове́рже а҆арѡ́нъ же́злъ пред̾ фараѡ́номъ и҆ пред̾ рабы҄ є҆гѡ̀, и҆ бы́сть ѕмі́й.

¹¹Созва́ же фараѡ́нъ мѹдрецы̀ є҆гѵ́пєтскїѧ и҆ волхвы̀: и҆ сотвори́ша и҆ волсвѝ є҆гѵ́петстїи чарова́нїѧми свои́ми та́кожде:

¹²и҆ поверго́ша кі́йждо же́злъ сво́й, и҆ бы́ша ѕмі́еве: и҆ пожрѐ же́злъ а҆арѡ́новъ ѻ҆́ныхъ жезлы̀.

¹³И҆ ѹ҆крѣпи́сѧ се́рдце фараѡ́не, и҆ не послѹ́ша и҆́хъ, ѩ҆́коже гл҃а и҆̀мъ гд҇ь.

¹⁴И҆ речѐ гд҇ь къ мѡѷсе́ю: ѡ҆тѧгчи́сѧ се́рдце фараѡ́не, є҆́же не ѿпѹсти́ти люді́й:

¹⁵и҆дѝ къ фараѡ́нѹ заѹ́тра: сѐ, то́й и҆схо́дитъ на во́ды, и҆ бѹ́ди срѣта́ѧ є҆го̀ на бре́зѣ рѣ́чнѣмъ: и҆ же́злъ ѡ҆браще́йсѧ въ ѕмі́ѧ возмѝ въ рѹ́кѹ твою̀,

¹⁶и҆ рече́ши къ немѹ̀: гд҇ь бг҃ъ є҆вре́йскїй посла́ мѧ къ тебѣ̀, гл҃ѧ: ѿпѹстѝ лю́ди моѧ҄, да мѝ послѹ́жатъ въ пѹсты́ни: и҆ сѐ, не послѹ́шалъ є҆сѝ досе́лѣ:

¹⁷сїѧ҄ гл҃етъ гд҇ь: по семѹ̀ ѹ҆вѣ́си, ѩ҆́кѡ а҆́зъ гд҇ь: сѐ, а҆́зъ ѹ҆да́рю жезло́мъ, и҆́же въ рѹцѣ̀ мое́й, по водѣ̀ рѣ́чнѣй, и҆ преложи́тсѧ въ кро́вь:

¹⁸и҆ ры҄бы, ѩ҆̀же въ рѣцѣ̀, и҆зо́мрѹтъ, и҆ возсмерди́тсѧ рѣка̀, и҆ не возмо́гѹтъ є҆гѵ́птѧне пи́ти воды̀ ѿ рѣкѝ.

¹⁹Рече́ же гд҇ь къ мѡѷсе́ю: рцы̀ а҆арѡ́нѹ бра́тѹ твоемѹ̀: возмѝ же́злъ тво́й въ рѹ́кѹ твою̀, и҆ прострѝ рѹ́кѹ твою̀ на во́ды є҆гѵ́пєтскїѧ и҆ на рѣ́ки и҆́хъ и҆ на кла҄дѧзи и҆́хъ и҆ на є҆зе́ра и҆́хъ и҆ на всѧ́кое собра́нїе во́дъ и҆́хъ, и҆ бѹ́детъ кро́вь, и҆ бы́сть кро́вь по все́й землѝ є҆гѵ́петстѣй, въ древесѣ́хъ же и҆ въ ка́менїихъ.

²⁰И҆ сотвори́ша та́кѡ мѡѷсе́й и҆ а҆арѡ́нъ, ѩ҆́коже заповѣ́да и҆̀мъ гд҇ь: и҆ взе́мъ а҆арѡ́нъ же́злъ сво́й, ѹ҆да́ри во́дѹ рѣ́чнѹю пред̾ фараѡ́номъ и҆ пред̾ рабы҄ є҆гѡ̀, и҆ преложѝ всю̀ во́дѹ рѣ́чнѹю въ кро́вь:

²¹и҆ ры҄бы ѩ҆̀же въ рѣцѣ̀ и҆зомро́ша, и҆ возсмердѣ́сѧ рѣка̀, и҆ не можа́хѹ є҆гѵ́птѧне пи́ти воды̀ ѿ рѣкѝ, и҆ бѧ́ше кро́вь по все́й землѝ є҆гѵ́петстѣй.

²²Сотвори́ша же и҆ волсвѝ є҆гѵ́петстїи волхвова́нїѧми свои́ми та́кожде: и҆ ѡ҆жесточи́сѧ се́рдце фараѡ́ново, и҆ не послѹ́ша и҆́хъ, ѩ҆́коже речѐ гд҇ь.

²³Возврати́всѧ же фараѡ́нъ вни́де въ до́мъ сво́й, и҆ не положѝ себѣ̀ и҆ сегѡ̀ во ѹ҆мѣ̀.

²⁴И҆скопа́ша же всѝ є҆гѵ́птѧне ѡ҆́крестъ рѣкѝ, да пїю́тъ во́дѹ: и҆ не можа́хѹ пи́ти воды̀ ѿ рѣкѝ.

²⁵И҆ и҆спо́лнишасѧ се́дмь дні́й, по ѹ҆даре́нїи гд҇ни въ рѣкѹ̀.