Read Библия Церковнославянская И҆схо́дъ 9 Bible Online

И҆схо́дъ 9 - Библия Церковнославянская bible

И҆схо́дъ 9

¹Рече́ же гд҇ь къ мѡѷсе́ю: вни́ди къ фараѡ́нѹ и҆ рече́ши є҆мѹ̀: сїѧ҄ гл҃етъ гд҇ь бг҃ъ є҆вре́йскїй: ѿпѹстѝ лю́ди моѧ҄, да послѹ́жатъ мнѣ̀:

²а҆́ще ѹ҆́бѡ не восхо́щеши ѿпѹсти́ти люді́й мои́хъ, но и҆ є҆щѐ и҆̀хъ ѹ҆держи́ши:

³сѐ, рѹка̀ гд҇нѧ бѹ́детъ на скоты̀ твоѧ҄ въ полѧ́хъ и҆ на ко́ни, и҆ на ѻ҆слы̀ и҆ на велблю́ды, и҆ на говѧ҄да и҆ на ѻ҆́вцы, сме́рть вели́ка ѕѣлѡ̀:

⁴и҆ ди҄вна сотворю̀ а҆́зъ во вре́мѧ ѻ҆́но междѹ̀ скоты҄ є҆гѵ́петскими и҆ междѹ̀ скоты҄ сынѡ́въ ї҆и҃левыхъ: и҆ не ѹ҆́мретъ ѿ всѣ́хъ скотѡ́въ сынѡ́въ ї҆и҃левыхъ ни є҆ди́но.

⁵И҆ дадѐ бг҃ъ предѣ́лъ гл҃ѧ: во ѹ҆́трїе сотвори́тъ гд҇ь гл҃го́лъ се́й на землѝ.

⁶И҆ сотворѝ гд҇ь гл҃го́лъ се́й на ѹ҆́трїи, и҆ и҆́змре ве́сь ско́тъ є҆гѵ́петскїй: ѿ скота́ же сынѡ́въ ї҆и҃левыхъ не ѹ҆́мре ни є҆ди́но.

⁷Ви́дѣвъ же фараѡ́нъ, ѩ҆́кѡ не ѹ҆́мре ѿ всѣ́хъ скотѡ́въ сынѡ́въ ї҆и҃левыхъ ни є҆ди́но, ѡ҆тѧгчи́сѧ се́рдце фараѡ́нѹ, и҆ не ѿпѹстѝ люді́й.

⁸Рече́ же гд҇ь къ мѡѷсе́ю и҆ а҆арѡ́нѹ, гл҃ѧ: возми́те вы̀ пѡ́лны рѹ́цѣ пе́пела пе́щнагѡ, и҆ да разсы́плетъ мѡѷсе́й къ небесѝ пред̾ фараѡ́номъ и҆ пред̾ рабы҄ є҆гѡ̀:

⁹и҆ да бѹ́детъ пра́хъ по все́й землѝ є҆гѵ́петстѣй, и҆ бѹ́дѹтъ на человѣ́цѣхъ и҆ на скотѣ́хъ гно́йнїи стрѹ́пи, горѧ́щїи на человѣ́цѣхъ и҆ на скотѣ́хъ по все́й землѝ є҆гѵ́петстѣй.

¹⁰И҆ взѧ̀ пе́пелъ пе́щный пред̾ фараѡ́номъ, и҆ разсы́па є҆го̀ мѡѷсе́й къ небесѝ: и҆ бы́ша гно́йнїи стрѹ́пи, горѧ́щїи на человѣ́цѣхъ и҆ на скотѣ́хъ,

¹¹и҆ не можа́хѹ волсвѝ стоѧ́ти пред̾ мѡѷсе́омъ стрѹ́пѡвъ ра́ди: бы́ша бо стрѹ́пи на волсвѣ́хъ и҆ на все́й землѝ є҆гѵ́петстѣй.

¹²Ѡ҆жесточи́ же гд҇ь се́рдце фараѡ́ново, и҆ не послѹ́ша и҆́хъ, ѩ҆́коже повелѣ̀ гд҇ь мѡѷсе́ю.

¹³И҆ речѐ гд҇ь къ мѡѷсе́ю: воста́ни заѹ́тра и҆ ста́ни пред̾ фараѡ́номъ, и҆ рцы̀ къ немѹ̀: си́це гл҃етъ гд҇ь бг҃ъ є҆вре́йскїй: ѿпѹстѝ лю́ди моѧ҄, да послѹ́жатъ мнѣ̀:

¹⁴въ се́й бо ча́съ а҆́зъ и҆спѹщѹ̀ всѧ҄ ка҄зни моѧ҄ въ се́рдце твоѐ и҆ рабѡ́въ твои́хъ и҆ люді́й твои́хъ: да ѹ҆вѣ́си, ѩ҆́кѡ нѣ́сть и҆́нъ, ѩ҆́коже а҆́зъ, во все́й землѝ:

¹⁵нн҃ѣ бо пѹсти́въ рѹ́кѹ мою̀, поражѹ́ тѧ и҆ лю́ди твоѧ҄ ѹ҆мерщвлю̀, и҆ потреби́шисѧ ѿ землѝ:

¹⁶и҆ сегѡ̀ ра́ди пощадѣ́нъ є҆сѝ досе́лѣ, да покажѹ̀ на тебѣ̀ крѣ́пость мою̀, и҆ ѩ҆́кѡ да проповѣ́стсѧ и҆́мѧ моѐ по все́й землѝ:

¹⁷є҆ще́ ли ѹ҆̀бо ты̀ востае́ши на люді́й мои́хъ, є҆́же не ѿпѹсти́ти и҆́хъ;

¹⁸сѐ, а҆́зъ ѡ҆дождю̀ въ се́й же ча́съ заѹ́тра гра́дъ мно́гъ ѕѣлѡ̀, ѩ҆ко́въ не бѧ́ше во є҆гѵ́птѣ, ѿ негѡ́же днѐ созда́сѧ, да́же до днѐ сегѡ̀:

¹⁹нн҃ѣ ѹ҆̀бо потщи́сѧ собра́ти ско́тъ тво́й, и҆ є҆ли҄ка тѝ сѹ́ть на по́ли: вси́ бо человѣ́цы и҆ ско́ти, є҆ли́цы а҆́ще ѡ҆брѧ́щѹтсѧ на полѧ́хъ и҆ не вни́дѹтъ въ до́мъ, паде́тъ же на нѧ̀ гра́дъ, и҆́змрѹтъ.

²⁰И҆́же ѹ҆боѧ́сѧ сло́ва гд҇нѧ ѿ рабѡ́въ фараѡ́новыхъ, собра̀ скоты̀ своѧ҄ въ до́мы:

²¹а҆ и҆́же не внѧ̀ мы́слїю сло́вѹ гд҇ню, ѡ҆ста́ви скоты̀ на полѧ́хъ.

²²Рече́ же гд҇ь къ мѡѷсе́ю: прострѝ рѹ́кѹ твою̀ на не́бо, и҆ бѹ́детъ гра́дъ по все́й землѝ є҆гѵ́петстѣй, на человѣ́ки и҆ на скоты̀ и҆ на всю̀ травѹ̀ земнѹ́ю.

²³Простре́ же мѡѷсе́й рѹ́кѹ на не́бо, и҆ гд҇ь дадѐ гро́мы и҆ гра́дъ, и҆ теча́ше ѻ҆́гнь по землѝ, и҆ ѡ҆дождѝ гд҇ь гра́дъ по все́й землѝ є҆гѵ́петстѣй:

²⁴бѧ́ше же гра́дъ и҆ ѻ҆́гнь горѧ́щь со гра́домъ, гра́дъ же мно́гъ ѕѣлѡ̀ ѕѣлѡ̀, ѩ҆ко́въ не бы́сть во є҆гѵ́птѣ, ѿне́лѣже бы́ша лю́ди въ не́мъ.

²⁵Порази́ же гра́дъ во все́й землѝ є҆гѵ́петстѣй ѿ человѣ́ка до скота̀, и҆ всѧ́кѹ травѹ̀ ѩ҆́же на по́ли поразѝ гра́дъ, и҆ всѧ҄ древа̀ ѩ҆̀же на полѧ́хъ сотрѐ гра́дъ:

²⁶то́кмѡ въ землѝ гесе́мстѣй, и҆дѣ́же бѧ́хѹ сы́нове ї҆и҃лєвы, не бы́сть гра́дъ.

²⁷Посла́въ же фараѡ́нъ, призва̀ мѡѷсе́а и҆ а҆арѡ́на и҆ речѐ и҆̀мъ: согрѣши́хъ нн҃ѣ: гд҇ь првднъ, а҆́зъ же и҆ лю́дїе моѝ нечести́ви:

²⁸помоли́тесѧ ѹ҆̀бо ѡ҆ мнѣ̀ ко гд҇ѹ, и҆ да преста́нѹтъ бы́ти гро́ми бж҃їи и҆ гра́дъ и҆ ѻ҆́гнь на землѝ, и҆ ѿпѹщѹ̀ вы̀, и҆ ктомѹ̀ не приложитѐ ме́длити.

²⁹Рече́ же є҆мѹ̀ мѡѷсе́й: є҆гда̀ и҆зы́дѹ и҆з̾ гра́да, прострѹ̀ рѹ́цѣ моѝ на не́бо ко гд҇ѹ, и҆ гро́ми преста́нѹтъ, и҆ гра́дъ и҆ до́ждь не бѹ́детъ ктомѹ̀, да ѹ҆вѣ́си, ѩ҆́кѡ гд҇нѧ є҆́сть землѧ̀:

³⁰ты́ же и҆ рабѝ твоѝ, вѣ́мъ, ѩ҆́кѡ є҆щѐ не ѹ҆боѧ́стесѧ гд҇а.

³¹Ле́нъ же и҆ ѩ҆чме́нь поби́тъ є҆́сть, ѩ҆чме́нь бо и҆спѹща́ше кла́сы, а҆ ле́нъ сѣ́мѧ:

³²пшени́ца же и҆ жи́то не поби҄ты, пѡ́здны бо бѧ́хѹ.

³³И҆зы́де же мѡѷсе́й ѿ фараѡ́на и҆з̾ гра́да и҆ прострѐ рѹ́цѣ своѝ ко гд҇ѹ, и҆ гро́мове преста́ша, и҆ гра́дъ и҆ до́ждь не ѹ҆ка́нѹ на зе́млю ктомѹ̀.

³⁴Ви́дѣвъ же фараѡ́нъ, ѩ҆́кѡ преста̀ до́ждь и҆ гра́дъ и҆ гро́ми, приложѝ согрѣша́ти є҆щѐ, и҆ ѡ҆тѧгчѝ се́рдце своѐ и҆ рабѡ́въ свои́хъ:

³⁵и҆ ѡ҆жесточи́сѧ се́рдце фараѡ́ново и҆ рабѡ́въ є҆гѡ̀, и҆ не ѿпѹстѝ сынѡ́въ ї҆и҃левыхъ, ѩ҆́коже гл҃а гд҇ь къ мѡѷсе́ю.