Read Библия Церковнославянская Іѡвъ 10 Bible Online

Іѡвъ 10 - Библия Церковнославянская bible

Іѡвъ 10

¹Трѹжда́юсѧ дѹше́ю мое́ю, стенѧ̀ и҆спѹщѹ̀ на мѧ̀ глаго́лы моѧ҄, возглаго́лю го́рестїю дѹшѝ моеѧ̀ ѡ҆держи́мь

²и҆ рекѹ̀ ко гд҇еви: не ѹ҆чи́ мѧ нече́ствовати, и҆ почто́ ми си́це сѹди́лъ є҆сѝ;

³и҆лѝ добро́ ти є҆́сть, а҆́ще вознепра́вдѹю, ѩ҆́кѡ презрѣ́лъ є҆сѝ дѣла̀ рѹкѹ̀ твоє́ю, совѣ́тѹ же нечести́выхъ внѧ́лъ є҆сѝ;

⁴и҆лѝ ѩ҆́коже человѣ́къ ви́дитъ, ви́диши; и҆лѝ ѩ҆́коже зри́тъ человѣ́къ, ѹ҆́зриши;

⁵и҆лѝ житїѐ твоѐ человѣ́ческо є҆́сть; и҆лѝ лѣ҄та твоѧ҄ ѩ҆́кѡ дні́е мѹ́жа;

⁶ѩ҆́кѡ и҆стѧза́лъ є҆сѝ беззако́нїе моѐ и҆ грѣхѝ моѧ҄ и҆зслѣ́дилъ є҆сѝ.

⁷Вѣ́си бо, ѩ҆́кѡ не нече́ствовахъ: но кто̀ є҆́сть и҆з̾има́ѧй и҆з̾ рѹкѹ̀ твоє́ю;

⁸Рѹ́цѣ твоѝ сотвори́стѣ мѧ̀ и҆ созда́стѣ мѧ̀: пото́мъ же преложи́въ, порази́лъ мѧ̀ є҆сѝ.

⁹Помѧнѝ, ѩ҆́кѡ бре́нїе мѧ̀ созда́лъ є҆сѝ, въ зе́млю же па́ки возвраща́еши мѧ̀.

¹⁰И҆лѝ не ѩ҆́коже млеко̀ и҆змелзи́лъ мѧ̀ є҆сѝ, ѹ҆сыри́лъ же мѧ̀ є҆сѝ ра́внѡ сы́рѹ;

¹¹Ко́жею же и҆ пло́тїю мѧ̀ ѡ҆бле́клъ є҆сѝ, костьми́ же и҆ жи́лами сши́лъ мѧ̀ є҆сѝ:

¹²живо́тъ же и҆ ми́лость положи́лъ є҆сѝ ѹ҆ менє̀, посѣще́нїе же твоѐ сохранѝ мо́й дѹ́хъ.

¹³Сїѧ҄ и҆мѣ́ѧй въ тебѣ̀, вѣ́мъ, ѩ҆́кѡ всѧ҄ мо́жеши, и҆ невозмо́жно тебѣ̀ ничто́же.

¹⁴А҆́ще бо согрѣшѹ̀, храни́ши мѧ̀, ѿ беззако́нїѧ же не безви́нна мѧ̀ сотвори́лъ є҆сѝ.

¹⁵А҆́ще бо нечести́въ бѹ́дѹ, лю́тѣ мнѣ̀, а҆́ще же бѹ́дѹ пра́веденъ, не могѹ̀ возни́кнѹти: и҆спо́лненъ бо є҆́смь безче́стїѧ,

¹⁶лови́мь бо є҆́смь а҆́ки ле́въ на ѹ҆бїе́нїе: па́ки же преложи́въ, лю́тѣ ѹ҆бива́еши мѧ̀.

¹⁷Ѡ҆бновлѧ́ѧй на мѧ̀ и҆спыта́нїе моѐ, гнѣ́ва бо вели́кагѡ на мѧ̀ ѹ҆потреби́лъ є҆сѝ и҆ наве́лъ є҆сѝ на мѧ̀ и҆скѹшє́нїѧ.

¹⁸Почто̀ ѹ҆̀бо мѧ̀ и҆з̾ чре́ва и҆зве́лъ є҆сѝ, и҆ не ѹ҆мро́хъ, ѻ҆́ко же менѐ не ви́дѣло бы,

¹⁹и҆ бы́хъ бы а҆́ки не бы́лъ; почто̀ ѹ҆̀бо и҆з̾ чре́ва во гро́бъ не снидо́хъ;

²⁰и҆лѝ не ма́ло є҆́сть вре́мѧ жи́зни моеѧ̀; ѡ҆ста́ви менѐ почи́ти ма́лѡ,

²¹пре́жде да́же ѿидѹ̀, ѿню́дѹже не возвращѹ́сѧ, въ зе́млю те́мнѹ и҆ мра́чнѹ,

²²въ зе́млю тмы̀ вѣ́чныѧ, и҆дѣ́же нѣ́сть свѣ́та, нижѐ ви́дѣти живота̀ человѣ́ческагѡ.