Read Библия Церковнославянская Іѡвъ 11 Bible Online

Іѡвъ 11 - Библия Церковнославянская bible

Іѡвъ 11

¹Ѿвѣща́въ же сѡфа́ръ мїне́йскїй, речѐ:

²глаго́лѧй мно́гѡ, и҆ противоѹслы́шитъ: и҆лѝ многорѣ́чивъ мни́тсѧ бы́ти пра́веденъ; благослове́нъ рожде́нный ѿ жены̀ малолѣ́тенъ.

³Не мно́гъ во словесѣ́хъ бѹ́ди: нѣ́сть бо противовѣща́ѧй тѝ.

⁴Не глаго́ли бо, ѩ҆́кѡ чи́стъ є҆́смь дѣ́лы и҆ безпоро́ченъ пред̾ ни́мъ:

⁵но ка́кѡ гд҇ь возгл҃етъ къ тебѣ̀ и҆ ѿве́рзетъ ѹ҆стнѣ̀ своѝ съ тобо́ю;

⁶Пото́мъ возвѣсти́тъ тѝ си́лѹ премѹ́дрости, ѩ҆́кѡ сѹгѹ́бъ бѹ́детъ въ си́хъ, ѩ҆̀же проти́вѹ тебє̀: и҆ тогда̀ ѹ҆разѹмѣ́еши, ѩ҆́кѡ достѡ́йнаѧ тебѣ̀ сбы́шасѧ ѿ гд҇а, и҆́миже согрѣши́лъ є҆сѝ,

⁷И҆лѝ слѣ́дъ гд҇ень ѡ҆брѧ́щеши; и҆лѝ въ послѣ҄днѧѧ дости́глъ є҆сѝ, ѩ҆̀же сотворѝ вседержи́тель;

⁸Высо́ко не́бо, и҆ что̀ сотвори́ши; глѹбоча́е же сѹ́щихъ во а҆́дѣ что̀ вѣ́си;

⁹не должа́е ли мѣ́ры земны́ѧ, и҆лѝ широты̀ морскі́ѧ;

¹⁰А҆́ще же преврати́тъ всѧ҄, кто̀ рече́тъ є҆мѹ̀: что̀ сотвори́лъ є҆сѝ;

¹¹То́й бо вѣ́сть дѣла̀ беззако́нныхъ: ви́дѣвъ же нелѣ҄паѧ, не пре́зритъ.

¹²Человѣ́къ же и҆́накѡ ѡ҆би́лѹетъ словесы̀: земны́й же рожде́нный ѿ жены̀ ра́венъ ѻ҆слѹ̀ пѹсты́нномѹ.

¹³А҆́ще бо ты̀ чи́сто положи́лъ є҆сѝ се́рдце твоѐ, воздѣва́еши же рѹ́цѣ твоѝ къ немѹ̀,

¹⁴а҆́ще беззако́нно что̀ є҆́сть въ рѹкѹ̀ твоє́ю, дале́че сотворѝ є҆̀ ѿ тебє̀, непра́вда же въ жили́щи твое́мъ да не всели́тсѧ:

¹⁵та́кѡ бо тѝ возсїѧ́етъ лицѐ, ѩ҆́коже вода̀ чиста̀: совлече́шисѧ же скве́рны, и҆ не ѹ҆бои́шисѧ,

¹⁶и҆ трѹда̀ забѹ́деши, ѩ҆́коже волны̀ мимоше́дшїѧ, и҆ не ѹ҆страши́шисѧ.

¹⁷Моли́тва же твоѧ̀, а҆́ки денни́ца, и҆ па́че полѹ́дне возсїѧ́етъ тѝ жи́знь:

¹⁸ѹ҆пова́ѧ же бѹ́деши, ѩ҆́кѡ бѹ́детъ тѝ наде́жда: ѿ тѹги́ же и҆ попече́нїѧ ѩ҆ви́тсѧ тѝ ми́ръ:

¹⁹ѹ҆поко́ишисѧ бо, и҆ не бѹ́детъ борѧ́й тѧ̀: премѣнѧ́ющїисѧ же мно́зи и҆́мѹтъ проси́ти тѧ̀,

²⁰спасе́нїе же ѡ҆ста́витъ и҆̀хъ: наде́жда бо и҆́хъ па́гѹба, ѻ҆́чи же нечести́выхъ и҆ста́ютъ.