Read Библия Церковнославянская Іѡвъ 12 Bible Online

Іѡвъ 12 - Библия Церковнославянская bible

Іѡвъ 12

¹Ѿвѣща́въ же їѡвъ, речѐ:

²ѹ҆́бѡ вы̀ ли є҆ди́ни є҆стѐ человѣ́цы, и҆лѝ съ ва́ми сконча́етсѧ премѹ́дрость;

³И҆ ѹ҆ менє̀ се́рдце є҆́сть ѩ҆́коже и҆ ѹ҆ ва́съ.

⁴Пра́веденъ бо мѹ́жъ и҆ непоро́ченъ бы́сть въ порѹга́нїе:

⁵во вре́мѧ бо ѡ҆предѣле́ное ѹ҆гото́ванъ бы́сть па́сти ѿ и҆ны́хъ, до́мы же є҆гѡ̀ ѡ҆пѹстошє́ны бы́ти беззако́нными. ѻ҆ба́че никто́же да ѹ҆пова́етъ, лѹка́въ сы́й, непови́ненъ бы́ти,

⁶є҆ли́цы разгнѣвлѧ́ютъ гд҇а, а҆́ки и҆ и҆стѧза́нїѧ и҆̀мъ не бѹ́детъ.

⁷Но вопросѝ четвероно́гихъ, а҆́ще тѝ рекѹ́тъ, и҆ пти́цъ небе́сныхъ, а҆́ще тѝ возвѣстѧ́тъ:

⁸повѣ́ждь землѝ, а҆́ще тѝ ска́жетъ, и҆ и҆сповѣ́дѧтъ тѝ ры҄бы мѡрскі́ѧ.

⁹Кто̀ ѹ҆́бѡ не разѹмѣ̀ во всѣ́хъ си́хъ, ѩ҆́кѡ рѹка̀ гд҇нѧ сотворѝ сїѧ҄;

¹⁰Не въ рѹцѣ́ ли є҆гѡ̀ дѹша̀ всѣ́хъ живѹ́щихъ и҆ дѹ́хъ всѧ́кагѡ человѣ́ка;

¹¹Ѹ҆́хо бо словеса̀ разсѹжда́етъ, горта́нь же бра҄шна вкѹша́етъ.

¹²Во мно́зѣмъ вре́мени премѹ́дрость, во мно́зѣ же житїѝ вѣ́дѣнїе.

¹³Ѹ҆ негѡ̀ премѹ́дрость и҆ си́ла, ѹ҆ тогѡ̀ совѣ́тъ и҆ ра́зѹмъ.

¹⁴А҆́ще низложи́тъ, кто̀ сози́ждетъ; а҆́ще затвори́тъ ѿ человѣ́кѡвъ, кто̀ ѿве́рзетъ;

¹⁵А҆́ще возбрани́тъ во́дѹ, и҆зсѹши́тъ зе́млю: а҆́ще же пѹ́ститъ, погѹби́тъ ю҆̀ преврати́въ.

¹⁶Ѹ҆ негѡ̀ держа́ва и҆ крѣ́пость, ѹ҆ тогѡ̀ вѣ́дѣнїе и҆ ра́зѹмъ.

¹⁷Проводѧ́й совѣ́тники плѣнє́ны, сѹдїи҄ же землѝ ѹ҆жасѝ:

¹⁸посажда́ѧй цари҄ на престо́лѣхъ и҆ ѡ҆бвѧзѹ́ѧй по́ѧсомъ чрє́сла и҆́хъ:

¹⁹ѿпѹща́ѧй жерцы̀ плѣ́нники, си́льныхъ же землѝ низвратѝ:

²⁰и҆змѣнѧ́ѧй ѹ҆стнѣ̀ вѣ́рныхъ, ра́зѹмъ же ста́рцєвъ ѹ҆разѹмѣ̀:

²¹и҆злива́ѧй безче́стїе на кнѧ҄зи, смирє́нныѧ же и҆зцѣлѝ:

²²ѿкрыва́ѧй глѹбѡ́каѧ ѿ тмы̀, и҆зведе́ же на свѣ́тъ сѣ́нь сме́ртнѹю:

²³прельща́ѧй ѩ҆зы́ки и҆ погѹблѧ́ѧй и҆̀хъ, низлага́ѧй ѩ҆зы́ки и҆ наставлѧ́ѧй и҆̀хъ:

²⁴и҆змѣнѧ́ѧй сердца̀ кнѧзе́й земны́хъ, прельсти́ же и҆̀хъ на пѹтѝ, є҆гѡ́же не вѣ́дѧхѹ,

²⁵да ѡ҆сѧ́жѹтъ тмѹ̀, а҆ не свѣ́тъ, да заблѹ́дѧтъ же ѩ҆́кѡ пїѧ́ный.