Read Библия Церковнославянская Іѡвъ 13 Bible Online

Іѡвъ 13 - Библия Церковнославянская bible

Іѡвъ 13

¹Сѐ, сїѧ҄ ви́дѣ ѻ҆́ко моѐ, и҆ слы́ша ѹ҆́хо моѐ,

²и҆ вѣ́мъ, є҆ли҄ка и҆ вы̀ вѣ́сте: и҆ не неразѹ́мнѣе є҆́смь ва́съ.

³Но ѻ҆ба́че и҆ а҆́зъ ко гд҇ѹ возглаго́лю, ѡ҆бличѹ́ же пред̾ ни́мъ, а҆́ще восхо́щетъ.

⁴Вы́ бо є҆стѐ вра́чеве непра́веднїи и҆ цѣли́телє ѕлы́хъ всѝ,

⁵бѹ́ди же ва́мъ ѡ҆нѣмѣ́ти, и҆ сбѹ́детсѧ ва́мъ въ премѹ́дрость.

⁶Слы́шите же ѡ҆бличе́нїе ѹ҆́стъ мои́хъ, сѹдѹ́ же ѹ҆сте́нъ мои́хъ вонми́те.

⁷Не пред̾ бг҃омъ ли глаго́лете и҆ пред̾ ни́мъ вѣща́ете ле́сть;

⁸и҆лѝ ѹ҆клоните́сѧ, вы́ же са́ми сѹдїи҄ бѹ́дите.

⁹Добро́ бо, а҆́ще и҆зслѣ́дитъ ва́съ: а҆́ще бо всѝ творѧ́щїи приложите́сѧ къ немѹ̀, ѻ҆ба́че ѡ҆бличи́тъ вы̀.

¹⁰А҆́ще же и҆ та́й ли́цамъ ѹ҆дивите́сѧ,

¹¹не движе́нїе ли є҆гѡ̀ смѧте́тъ ва́съ, боѧ́знь же ѿ негѡ̀ нападе́тъ на вы̀;

¹²Ѿи́детъ же велича́нїе ва́ше ра́внѡ пе́пелѹ, тѣ́ло же бре́нно.

¹³Ѹ҆молчи́те, да возглаго́лю и҆ почі́ю ѿ гнѣ́ва.

¹⁴Взе́млѧ плѡ́ти моѧ҄ зѹба́ми, дѹ́шѹ же мою̀ положѹ̀ въ рѹцѣ̀ мое́й.

¹⁵А҆́ще мѧ̀ ѹ҆бїе́тъ си́льный, поне́же и҆ нача̀, ѻ҆ба́че возглаго́лю и҆ ѡ҆бличѹ̀ пред̾ ни́мъ:

¹⁶и҆ сїѐ мѝ сбѹ́детсѧ во спасе́нїе: не вни́детъ бо пред̾ ни́мъ ле́сть.

¹⁷Послѹ́шайте, послѹ́шайте глагѡ́лъ мои́хъ: возвѣщѹ́ бо ва́мъ слы́шащымъ.

¹⁸Сѐ, а҆́зъ бли́з̾ є҆́смь сѹда̀ моегѡ̀, вѣ́мъ а҆́зъ, ѩ҆́кѡ пра́веденъ ѩ҆влю́сѧ.

¹⁹Кто́ бо є҆́сть сѹдѧ́йсѧ со мно́ю, да нн҃ѣ ѹ҆молчѹ̀ и҆ и҆зче́знѹ;

²⁰Дво́е же мѝ сотвори́ши, тогда̀ ѿ лица̀ твоегѡ̀ не скры́юсѧ:

²¹рѹ́кѹ ѿ менє̀ ѿимѝ, стра́хъ же тво́й да не ѹ҆жаса́етъ мѧ̀:

²²посе́мъ призове́ши, а҆́зъ же тѧ̀ послѹ́шаю, и҆лѝ возглаго́леши, а҆́зъ же тѝ да́мъ ѿвѣ́тъ.

²³Коли́цы сѹ́ть грѣсѝ моѝ и҆ беззакѡ́нїѧ моѧ҄; наѹчѝ мѧ̀, ка҄ѧ сѹ́ть;

²⁴Почто̀ кры́ешисѧ ѿ менє̀; мни́ши же мѧ̀ проти́вна сѹ́ща тебѣ̀;

²⁵И҆лѝ ѩ҆́кѡ ли́стъ дви́жимь вѣ́тромъ ѹ҆бои́шисѧ; и҆лѝ ѩ҆́кѡ сѣ́нѹ носи́мѹ вѣ́тромъ противлѧ́ешимисѧ;

²⁶ѩ҆́кѡ написа́лъ є҆сѝ на мѧ̀ ѕла҄ѧ, ѡ҆бложи́лъ же мѝ є҆сѝ ю҆́нѡстныѧ грѣхѝ:

²⁷положи́лъ же є҆сѝ но́гѹ мою̀ въ возбране́нїе: сохрани́лъ же є҆сѝ дѣла̀ моѧ҄ всѧ҄: въ корє́нїѧ же но́гъ мои́хъ прише́лъ є҆сѝ:

²⁸и҆̀же ѡ҆бетша́ютъ ѩ҆́коже мѣ́хъ, и҆лѝ ѩ҆́коже ри́за мо́лїемъ и҆з̾ѧде́на.