Read Библия Церковнославянская Іѡвъ 14 Bible Online

Іѡвъ 14 - Библия Церковнославянская bible

Іѡвъ 14

¹Человѣ́къ бо рожде́нъ ѿ жены̀ малолѣ́тенъ и҆ и҆спо́лнь гнѣ́ва:

²и҆лѝ ѩ҆́коже цвѣ́тъ процвѣты́й ѿпадѐ, ѿбѣже́ же ѩ҆́кѡ сѣ́нь, и҆ не постои́тъ.

³Не и҆ ѡ҆ се́мъ ли сло́во сотвори́лъ є҆сѝ, и҆ семѹ̀ сотвори́лъ є҆сѝ вни́ти на сѹ́дъ пред̾ тѧ̀;

⁴Кто́ бо чи́стъ бѹ́детъ ѿ скве́рны; никто́же,

⁵а҆́ще и҆ є҆ди́нъ де́нь житїѐ є҆гѡ̀ на землѝ: и҆зочте́ни же мц҇ы є҆гѡ̀ ѿ тебє̀, на вре́мѧ положи́лъ є҆сѝ, и҆ не престѹ́питъ.

⁶Ѿстѹпѝ ѿ негѡ̀, да ѹ҆мо́лкнетъ и҆ и҆збере́тъ житїѐ ѩ҆́коже нае́мникъ.

⁷Е҆́сть бо дре́вѹ наде́жда: а҆́ще бо посѣ́чено бѹ́детъ, па́ки процвѣте́тъ, и҆ лѣ́торасль є҆гѡ̀ не ѡ҆скѹдѣ́етъ:

⁸а҆́ще бо состарѣ́етсѧ въ землѝ ко́рень є҆гѡ̀, на ка́мени же сконча́етсѧ стебло̀ є҆гѡ̀,

⁹ѿ вонѝ воды̀ процвѣте́тъ, сотвори́тъ же жа́твѹ, ѩ҆́коже новосажде́нное.

¹⁰Мѹ́жъ же ѹ҆ме́рый ѿи́де, па́дъ же человѣ́къ, ктомѹ̀ нѣ́сть.

¹¹Вре́менемъ бо ѡ҆скѹдѣва́етъ мо́ре, рѣка́ же ѡ҆пѹстѣ́вши и҆́зсше:

¹²человѣ́къ же ѹ҆снѹ́въ не воста́нетъ, до́ндеже не бѹ́детъ не́бо сошве́но, и҆ не возбѹдѧ́тсѧ ѿ сна̀ своегѡ̀.

¹³Ѹ҆́бѡ, ѽ, дабы̀ во а҆́дѣ мѧ̀ сохрани́лъ є҆сѝ, скры́лъ же мѧ́ бы є҆сѝ, до́ндеже преста́нетъ гнѣ́въ тво́й, и҆ вчини́ши мѝ вре́мѧ, въ не́же па́мѧть сотвори́ши мѝ.

¹⁴А҆́ще бо ѹ҆́мретъ человѣ́къ, жи́въ бѹ́детъ: сконча́въ дни҄ житїѧ̀ своегѡ̀, потерплю̀, до́ндеже па́ки бѹ́дѹ.

¹⁵Посе́мъ воззове́ши, а҆́зъ же послѹ́шаю тѧ̀: дѣ́лъ же рѹкѹ̀ твоє́ю не ѿвраща́йсѧ:

¹⁶и҆зчи́слилъ же є҆сѝ начина҄нїѧ моѧ҄, и҆ ничто́же тѧ̀ мимои́детъ ѿ грѣ҄хъ мои́хъ:

¹⁷запечатлѣ́лъ же мѝ є҆сѝ беззакѡ́нїѧ въ мѣшцѣ̀, назна́меналъ же є҆сѝ, а҆́ще что̀ нево́лею престѹпи́хъ.

¹⁸Ѻ҆ба́че и҆ гора̀ па́дающи распаде́тсѧ, и҆ ка́мень ѡ҆бетша́етъ ѿ мѣ́ста своегѡ̀:

¹⁹ка́менїе ѡ҆гла́диша во́ды, и҆ потопи́ша во́ды взна́къ хо́лмы земны҄ѧ, и҆ ѡ҆жида́нїе человѣ́ческо погѹби́лъ є҆сѝ.

²⁰Ѿри́нѹлъ є҆сѝ є҆го̀ до конца̀, и҆ ѿи́де: и҆змѣни́лъ є҆сѝ є҆мѹ̀ лицѐ и҆ и҆спѹсти́лъ є҆сѝ.

²¹Мнѡ́гимъ же бы́вшымъ сынѡ́мъ є҆гѡ̀, не вѣ́сть: а҆́ще же и҆ ма́лѡ и҆́хъ бѹ́детъ, не зна́етъ:

²²но плѡ́ти є҆гѡ̀ болѣ́ша, дѹша́ же є҆гѡ̀ ѡ҆ себѣ̀ сѣ́това.