Read Библия Церковнославянская Іѡвъ 17 Bible Online

Іѡвъ 17 - Библия Церковнославянская bible

Іѡвъ 17

¹Тлѣ́ю дѹ́хомъ носи́мь, прошѹ́ же гро́ба и҆ не ѹ҆лѹча́ю.

²Молю̀ болѣ́знѹѧ, и҆ что̀ сотворю̀; ѹ҆крадо́ша же мѝ и҆мѣ́нїе чѹжді́и.

³Кто́ є҆сть се́й; рѹко́ю мое́ю свѧ́занъ да бѹ́детъ.

⁴ѩ҆́кѡ се́рдце и҆́хъ сокры́лъ є҆сѝ ѿ мѹ́дрости, сегѡ̀ ра́ди да не вознесе́ши и҆́хъ.

⁵Ча́сти возвѣсти́тъ ѕлѡ́бы: ѻ҆́чи же на сынѣ́хъ и҆ста́ѧста.

⁶Положи́лъ же мѧ̀ є҆сѝ въ при́тчѹ во ѩ҆зы́цѣхъ, смѣ́хъ же бы́хъ и҆̀мъ.

⁷Ѡ҆слѣпо́ста бо ѿ гнѣ́ва ѻ҆́чи моѝ, повоева́нъ бы́хъ вельмѝ ѿ всѣ́хъ:

⁸чѹ́до ѡ҆б̾ѧ̀ и҆́стинныхъ ѡ҆ се́мъ, пра́ведникъ же на беззако́нника да воста́нетъ:

⁹да содержи́тъ же вѣ́рный пѹ́ть сво́й, чи́стый же рѹка́ма да прїи́метъ де́рзость.

¹⁰Но ѻ҆ба́че всѝ належи́те и҆ прїиди́те, не бо̀ ѡ҆брѣта́ю въ ва́съ и҆́стины.

¹¹Дні́е моѝ преидо́ша въ тече́нїи, расторго́шасѧ же ѹ҆́дове се́рдца моегѡ̀.

¹²Но́щь въ де́нь преложи́хъ: свѣ́тъ бли́з̾ ѿ лица̀ тмы̀.

¹³А҆́ще бо стерплю̀, а҆́дъ мѝ є҆́сть до́мъ, въ сѹмра́цѣ же постла́сѧ мѝ посте́лѧ.

¹⁴Сме́рть назва́хъ ѻ҆тца̀ моего̀ бы́ти, ма́терь же и҆ сестрѹ́ ми гно́й.

¹⁵Гдѣ̀ ѹ҆́бѡ є҆щѐ є҆́сть мѝ наде́жда, и҆лѝ блага҄ѧ моѧ҄ ѹ҆зрю̀;

¹⁶и҆лѝ со мно́ю во а҆́дъ сни́дѹтъ, и҆лѝ вкѹ́пѣ въ пе́рсть сни́демъ.