Read Библия Церковнославянская Іѡвъ 19 Bible Online

Іѡвъ 19 - Библия Церковнославянская bible

Іѡвъ 19

¹Ѿвѣща́въ же їѡвъ, речѐ:

²доко́лѣ притрѹ́днѹ творитѐ дѹ́шѹ мою̀ и҆ низлага́ете мѧ̀ словесы̀; ѹ҆разѹмѣ́йте то́кмѡ, ѩ҆́кѡ гд҇ь сотвори́ мѧ си́це.

³Клеве́щете на мѧ̀, не стыдѧ́щесѧ менє̀ належите́ ми.

⁴Бѹ́ди, ѩ҆́кѡ вои́стиннѹ а҆́зъ прельсти́хсѧ, и҆ ѹ҆ менє̀ водворѧ́етсѧ погрѣше́нїе, глаго́лати словеса̀, ѩ҆̀же не подоба́ше, словеса́ же моѧ҄ погрѣша́ютъ, и҆ не во вре́мѧ:

⁵бѹ́ди же, ѩ҆́кѡ на мѧ̀ велича́етесѧ, наскака́ете же мѝ поноше́нїемъ:

⁶разѹмѣ́йте ѹ҆̀бо, ѩ҆́кѡ гд҇ь є҆́сть и҆́же смѧте́ мѧ и҆ ѡ҆гра́дѹ свою̀ на мѧ̀ вознесѐ.

⁷Сѐ, смѣю́сѧ поноше́нїю, не возглаго́лю: возопїю̀, и҆ нигдѣ́же сѹ́дъ.

⁸Ѡ҆́крестъ ѡ҆гражде́нъ є҆́смь и҆ не могѹ̀ прейтѝ: пред̾ лице́мъ мои́мъ тмѹ̀ положѝ,

⁹сла́вѹ же съ менє̀ совлечѐ и҆ ѿѧ̀ вѣне́цъ ѿ главы̀ моеѧ̀:

¹⁰растерза́ мѧ ѡ҆́крестъ, и҆ ѿидо́хъ: посѣче́ же ѩ҆́кѡ дре́во наде́ждѹ мою̀.

¹¹Лю́тѣ же гнѣ́ва ѹ҆потребѝ на мѧ̀ и҆ возмнѣ́ мѧ ѩ҆́кѡ врага̀.

¹²Вкѹ́пѣ же прїидо́ша и҆скѹшє́нїѧ є҆гѡ̀ на мѧ̀, на пѹте́хъ же мои́хъ ѡ҆быдо́ша мѧ̀ навѣ҄тницы.

¹³Бра́тїѧ моѧ҄ ѿстѹпи́ша ѿ менє̀, позна́ша чѹжди́хъ па́че менє̀, и҆ дрѹ́зїе моѝ неми́лостиви бы́ша:

¹⁴не снабдѣ́ша мѧ̀ бли́жнїи моѝ, и҆ вѣ́дѧщїи и҆́мѧ моѐ забы́ша мѧ̀.

¹⁵Сосѣ́ди до́мѹ и҆ рабы҄ни моѧ҄, (ѩ҆́кѡ) и҆ноплеме́нникъ бы́хъ пред̾ ни́ми:

¹⁶раба̀ моего̀ зва́хъ, и҆ не послѹ́ша, ѹ҆ста́ же моѧ҄ молѧ́хѹсѧ:

¹⁷и҆ проси́хъ женѹ̀ мою̀, призыва́хъ же ласка́ѧ сы́ны подло́жницъ мои́хъ:

¹⁸ѻ҆ни́ же менѐ въ вѣ́къ ѿри́нѹша, є҆гда̀ воста́нѹ, на мѧ̀ глаго́лютъ.

¹⁹Гнѹша́хѹсѧ менє̀ ви́дѧщїи мѧ̀, и҆ и҆̀хже люби́хъ, воста́ша на мѧ̀.

²⁰Въ ко́жи мое́й согни́ша плѡ́ти моѧ҄, кѡ́сти же моѧ҄ въ зѹбѣ́хъ содержа́тсѧ.

²¹Поми́лѹйте мѧ̀, поми́лѹйте мѧ̀, ѽ, дрѹ́зїе! рѹка́ бо гд҇нѧ коснѹ́вшаѧсѧ мѝ є҆́сть.

²²Почто́ мѧ го́ните ѩ҆́коже и҆ гд҇ь; ѿ пло́тей же мои́хъ не насыща́етесѧ;

²³Кто́ бо да́лъ бы, да напи́шѹтсѧ словеса̀ моѧ҄, и҆ положа́тсѧ ѡ҆́наѧ въ кни́зѣ во вѣ́къ;

²⁴и҆ на дщи́цѣ желѣ́знѣ и҆ ѻ҆́ловѣ, и҆лѝ на ка́менїихъ и҆зваѧ́ютсѧ;

²⁵Вѣ́мъ бо, ѩ҆́кѡ пр҇носѹ́щенъ є҆́сть, и҆́же и҆́мать и҆скѹпи́ти мѧ̀,

²⁶(и҆) на землѝ воскреси́ти ко́жѹ мою̀ терпѧ́щѹю сїѧ҄, ѿ гд҇а бо мѝ сїѧ҄ соверши́шасѧ,

²⁷ѩ҆̀же а҆́зъ въ себѣ̀ свѣ́мъ, ѩ҆̀же ѻ҆́чи моѝ ви́дѣста, а҆ не и҆́нъ: всѧ҄ же мѝ соверши́шасѧ въ нѣ́дрѣ.

²⁸А҆́ще же и҆ рече́те: что̀ рече́мъ проти́вѹ є҆мѹ̀; и҆ ко́рень словесѐ ѡ҆брѧ́щемъ въ не́мъ.

²⁹Ѹ҆бо́йтесѧ же и҆ вы̀ ѿ меча̀: ѩ҆́рость бо на беззакѡ́нныѧ на́йдетъ, и҆ тогда̀ ѹ҆ви́дѧтъ, гдѣ̀ є҆́сть и҆́хъ вещество̀.