Read Библия Церковнославянская Іѡвъ 21 Bible Online

Іѡвъ 21 - Библия Церковнославянская bible

Іѡвъ 21

¹Ѿвѣща́въ же їѡвъ, речѐ:

²послѹ́шайте, послѹ́шайте слове́съ мои́хъ, да не бѹ́детъ мѝ ѿ ва́съ сїѐ ѹ҆тѣше́нїе:

³потерпи́те мѝ, а҆́зъ же возглаго́лю, та́же не посмѣе́темисѧ.

⁴Что́ бо; є҆да̀ человѣ́ческо мѝ ѡ҆бличе́нїе; и҆лѝ почто̀ не воз̾ѧрю́сѧ;

⁵Воззрѣ́вшїи на мѧ̀ ѹ҆диви́тесѧ, рѹ́кѹ поло́жше на лани́тѣ.

⁶А҆́ще бо воспомѧнѹ̀, ѹ҆жаснѹ́сѧ: ѡ҆бдержа́тъ бо пло́ть мою̀ болѣ҄зни.

⁷Почто̀ нечести́вїи живѹ́тъ, ѡ҆бетша́ша же въ бога́тствѣ;

⁸Сѣ́мѧ и҆́хъ по дѹшѝ, ча҄да же и҆́хъ пред̾ ѻ҆чи́ма.

⁹До́мове и҆́хъ ѻ҆би́лнїи сѹ́ть, стра́хъ же нигдѣ̀, ра́ны же ѿ гд҇а нѣ́сть на ни́хъ.

¹⁰Говѧ́до и҆́хъ не и҆зве́рже: спасе́на же бы́сть и҆́хъ и҆мѹ́щаѧ во чре́вѣ и҆ не лиши́сѧ.

¹¹Пребыва́ютъ же ѩ҆́кѡ ѻ҆́вцы вѣ҄чныѧ, дѣ́ти же и҆́хъ пред̾игра́ютъ,

¹²взе́мше ѱалти́рь и҆ гѹ́сли, и҆ веселѧ́тсѧ гла́сомъ пѣ́сни.

¹³Сконча́ша во благи́хъ житїѐ своѐ, въ поко́и же а҆́довѣ ѹ҆спо́ша.

¹⁴Глаго́лютъ же гд҇еви: ѿстѹпѝ ѿ на́съ, пѹті́й твои́хъ вѣ́дѣти не хо́щемъ:

¹⁵что̀ досто́инъ, ѩ҆́кѡ да порабо́таемъ є҆мѹ̀; и҆ ка́ѧ по́льза, ѩ҆́кѡ да взы́щемъ є҆го̀;

¹⁶Въ рѹка́хъ бо и҆́хъ бѧ́хѹ блага҄ѧ, дѣ́лъ же нечести́выхъ не надзира́етъ.

¹⁷Ѻ҆ба́че же и҆ нечести́выхъ свѣти́лникъ ѹ҆га́снетъ, на́йдетъ же и҆̀мъ развраще́нїе, бѡлѣ́зни же и҆̀хъ ѡ҆б̾и́мѹтъ ѿ гнѣ́ва:

¹⁸бѹ́дѹтъ же а҆́ки плє́вы пред̾ вѣ́тромъ, и҆лѝ ѩ҆́коже пра́хъ, є҆го́же взѧ̀ ви́хръ.

¹⁹Да ѡ҆скѹдѣ́ютъ сынѡ́мъ и҆мѣ҄нїѧ є҆гѡ̀: возда́стъ проти́вѹ є҆мѹ̀, и҆ ѹ҆разѹмѣ́етъ.

²⁰Да ѹ҆́зрѧтъ ѻ҆́чи є҆гѡ̀ своѐ ѹ҆бїе́нїе, ѿ гд҇а же да не спасе́тсѧ.

²¹ѩ҆́кѡ во́лѧ є҆гѡ̀ съ ни́мъ въ домѹ̀ є҆гѡ̀, и҆ чи́сла мц҇ей є҆гѡ̀ раздѣли́шасѧ.

²²Не гд҇ь ли є҆́сть наѹча́ѧй ра́зѹмѹ и҆ хи́трости; то́йже мѹ́дрыхъ разсѹжда́етъ.

²³То́й ѹ҆́мретъ въ си́лѣ простоты̀ своеѧ̀, всецѣ́лъ же благодѹ́шествѹѧй и҆ благоѹспѣва́ѧй,

²⁴ѹ҆тро́ба же є҆гѡ̀ и҆спо́лнена тѹ́ка, мо́згъ же є҆гѡ̀ разлива́етсѧ.

²⁵Ѻ҆́въ же ѹ҆мира́етъ въ го́рести дѹшѝ, не ѩ҆ды́й ничто́же бла́га.

²⁶Вкѹ́пѣ же на землѝ спѧ́тъ, гни́лость же и҆̀хъ покры̀.

²⁷Тѣ́мже вѣ́мъ ва́съ, ѩ҆́кѡ де́рзостїю належите́ ми,

²⁸ѩ҆́кѡ рече́те: гдѣ́ є҆сть до́мъ кнѧ́жь; и҆ гдѣ́ є҆сть покро́въ селе́нїй нечести́выхъ;

²⁹Вопроси́те мимоходѧ́щихъ пѹте́мъ, и҆ зна́мєнїѧ и҆́хъ не чѹ҄жда сотвори́те.

³⁰ѩ҆́кѡ на де́нь па́гѹбы соблюда́етсѧ нечести́вый, и҆ въ де́нь гнѣ́ва є҆гѡ̀ ѿведе́нъ бѹ́детъ.

³¹Кто̀ возвѣсти́тъ пред̾ лице́мъ є҆гѡ̀ пѹ́ть є҆гѡ̀, и҆ є҆́же то́й сотворѝ, кто̀ возда́стъ є҆мѹ̀;

³²И҆ то́й во гро́бъ ѿнесе́нъ бы́сть, и҆ на гроби́щихъ побдѣ̀.

³³Ѹ҆слади́сѧ є҆мѹ̀ дро́бное ка́менїе пото́ка, и҆ в̾слѣ́дъ є҆гѡ̀ всѧ́къ человѣ́къ ѿи́детъ, и҆ пред̾ ни́мъ безчи́сленнїи.

³⁴Ка́кѡ же мѧ̀ ѹ҆тѣша́ете сѹ́етными; а҆ є҆́же бы мнѣ̀ почи́ти ѿ ва́съ, ничто́же.