Read Библия Церковнославянская Іѡвъ 22 Bible Online

Іѡвъ 22 - Библия Церковнославянская bible

Іѡвъ 22

¹Ѿвѣща́въ же є҆лїфа́зъ ѳемані́тинъ, речѐ:

²не гд҇ь ли є҆́сть наѹча́ѧй ра́зѹмѹ и҆ хи́трости;

³И҆́бо ко́е попече́нїе гд҇ѹ, а҆́ще ты̀ бы́лъ є҆сѝ дѣ́лы непоро́ченъ; и҆лѝ (ка́ѧ) по́льза, ѩ҆́кѡ про́стъ твори́ти бѹ́деши пѹ́ть тво́й;

⁴и҆лѝ ѡ҆пасе́нїе и҆мѣ́ѧ ѿ тебє̀ ѡ҆бличи́тъ тѧ̀ и҆ вни́детъ съ тобо́ю въ сѹ́дъ;

⁵Е҆да̀ ѕло́ба твоѧ̀ є҆́сть не мно́га; безчи́сленнїи же твоѝ сѹ́ть грѣсѝ;

⁶Въ зало́гъ бо и҆ма́лъ є҆сѝ ѿ бра́тїи твоеѧ̀ вотщѐ, ѻ҆де́ждѹ же наги́хъ ѿнима́лъ є҆сѝ,

⁷нижѐ водо́ю жа́ждѹщихъ напои́лъ є҆сѝ, но а҆́лчѹщихъ лиши́лъ є҆сѝ хлѣ́ба:

⁸ѹ҆дивлѧ́лсѧ же є҆сѝ нѣ́кихъ лицѹ̀ и҆ поверга́лъ є҆сѝ ѹ҆бо́гихъ на землѝ:

⁹вдови҄цы же ѿпѹсти́лъ є҆сѝ тщы̀ и҆ сирѡты̀ ѡ҆ѕло́билъ є҆сѝ.

¹⁰Сегѡ̀ ра́ди ѡ҆быдо́ша тѧ̀ сѣ҄ти, и҆ поспѣшѝ на тѧ̀ ра́ть вели́ка:

¹¹свѣ́тъ тебѣ̀ тма̀ бы́сть, ѹ҆снѹ́вшаго же вода́ тѧ покры̀.

¹²Е҆да̀ на высо́кихъ живы́й не призира́етъ; ѹ҆кори́зною же возносѧ́щихсѧ смирѝ.

¹³И҆ ре́клъ є҆сѝ: что̀ разѹмѣ̀ крѣ́пкїй; и҆лѝ во мра́цѣ разсѹ́дитъ;

¹⁴Ѡ҆́блакъ покро́въ є҆гѡ̀, и҆ неѹви́димь бѹ́детъ, и҆ крѹ́гъ небесѐ ѡ҆бхо́дитъ.

¹⁵Е҆да̀ стезю̀ дре́внюю сохрани́ши, въ ню́же ходи́ша мѹ́жїе непра́ведни,

¹⁶и҆̀же ѩ҆́ти бы́ша пре́жде вре́мене; рѣка̀ текѹ́щаѧ ѡ҆снова҄нїѧ и҆́хъ,

¹⁷глаго́лющїи: что̀ сотвори́тъ на́мъ гд҇ь; и҆лѝ что̀ нанесе́тъ на ны̀ вседержи́тель;

¹⁸И҆́же и҆спо́лнилъ є҆́сть до́мы и҆́хъ благи́ми: совѣ́тъ же нечести́выхъ дале́че ѿ негѡ̀.

¹⁹Ви́дѣвше пра́вєдницы возсмѣѧ́шасѧ, непоро́ченъ же глѹмлѧ́шесѧ и҆̀мъ:

²⁰не поги́бе ли и҆мѣ́нїе и҆́хъ, и҆ ѡ҆ста́нки и҆́хъ поѧ́стъ ѻ҆́гнь;

²¹Бѹ́ди ѹ҆̀бо тве́рдъ, а҆́ще претерпи́ши, пото́мъ пло́дъ тво́й бѹ́детъ во благи́хъ.

²²Прїими́ же и҆з̾ ѹ҆́стъ є҆гѡ̀ и҆зрѣче́нїе и҆ воспрїимѝ словеса̀ є҆гѡ̀ въ се́рдце твоѐ.

²³А҆́ще же ѡ҆брати́шисѧ и҆ смири́ши себѐ пред̾ гд҇емъ, и҆ дале́че сотвори́ши ѿ жили́ща твоегѡ̀ непра́вдѹ,

²⁴и҆ положе́нъ бѹ́деши на пе́рсти въ ка́мени, и҆ ѩ҆́коже ка́мень пото́ка ѡ҆фі́рска.

²⁵Бѹ́детъ ѹ҆̀бо тебѣ̀ вседержи́тель помо́щникъ ѿ вра҄гъ, чи́ста же сотвори́тъ тѧ̀ ѩ҆́коже сребро̀ разжже́но,

²⁶пото́мъ дерзнове́нїе воз̾имѣ́еши пред̾ бг҃омъ, воззрѣ́въ ве́селѡ на не́бо.

²⁷Помо́льшѹсѧ же тебѣ̀ къ немѹ̀, ѹ҆слы́шитъ тѧ̀, да́стъ же тѝ ѡ҆бѣ́ты твоѧ҄ возда́ти,

²⁸ѹ҆стро́итъ же тѝ жили́ще пра́вды, на пѹте́хъ же твои́хъ бѹ́детъ свѣ́тъ:

²⁹ѩ҆́кѡ смири́лъ є҆сѝ себѐ, тогда̀ рече́ши: вознесе́сѧ, и҆ пони́кша ѻ҆чи́ма спасе́тъ,

³⁰и҆зба́витъ непови́ннаго, и҆ спасе́шисѧ чи́стыма рѹка́ма твои́ма.