Read Библия Церковнославянская Іѡвъ 26 Bible Online

Іѡвъ 26 - Библия Церковнославянская bible

Іѡвъ 26

¹Ѿвѣща́въ же їѡвъ, речѐ:

²комѹ̀ прилѣжи́ши, и҆лѝ комѹ̀ хо́щеши помога́ти; не семѹ́ ли, є҆мѹ́же мно́га крѣ́пость и҆ є҆мѹ́же мы́шца крѣпка̀ є҆́сть;

³Комѹ̀ совѣ́тъ да́лъ є҆сѝ; не є҆мѹ́же ли всѧ̀ премѹ́дрость; Кого̀ пожене́ши; не є҆мѹ́же ли преве́лїѧ си́ла;

⁴Комѹ̀ возвѣсти́лъ є҆сѝ глаго́лы; дыха́нїе же чїе́ є҆сть и҆сходѧ́щее и҆з̾ тебє̀;

⁵Е҆да̀ и҆споли́ни родѧ́тсѧ под̾ водо́ю и҆ сосѣ́дми є҆ѧ̀;

⁶На́гъ а҆́дъ пред̾ ни́мъ, и҆ нѣ́сть покрыва́ла па́гѹбѣ.

⁷Простира́ѧй сѣ́веръ ни на че́мже, повѣ́шаѧй зе́млю ни наче́мже,

⁸свѧзѹ́ѧй во́дѹ на ѡ҆́блацѣхъ свои́хъ, и҆ не расто́ржесѧ ѡ҆́блакъ под̾ не́ю:

⁹держа́й лицѐ престо́ла, простира́ѧ над̾ ни́мъ ѡ҆́блакъ сво́й:

¹⁰повелѣ́нїе ѡ҆крѹжѝ на лицѐ воды̀ да́же до сконча́нїѧ свѣ́та со тмо́ю.

¹¹Столпѝ небе́снїи простро́шасѧ и҆ ѹ҆жасо́шасѧ ѿ запреще́нїѧ є҆гѡ̀.

¹²Крѣ́постїю ѹ҆кротѝ мо́ре, и҆ хи́тростїю є҆гѡ̀ низложе́нъ бы́сть ки́тъ:

¹³верєи́ же небє́сныѧ ѹ҆боѧ́шасѧ є҆гѡ̀: повелѣ́нїемъ же ѹ҆мертвѝ ѕмі́а ѿстѹ́пника.

¹⁴Сѐ, сїѧ҄ ча҄сти пѹтѝ є҆гѡ̀: и҆ ѡ҆ ка́пли сло́ва ѹ҆слы́шимъ въ не́мъ: си́лѹ же гро́ма є҆гѡ̀ кто̀ ѹ҆вѣ́да, когда̀ сотвори́тъ;