Read Библия Церковнославянская Іѡвъ 29 Bible Online

Іѡвъ 29 - Библия Церковнославянская bible

Іѡвъ 29

¹Е҆ще́ же приложи́въ їѡвъ, речѐ въ при́тчахъ:

²кто́ мѧ ѹ҆стро́итъ по мц҇амъ пре́жднихъ дні́й, въ ни́хже мѧ̀ бг҃ъ хранѧ́ше,

³ѩ҆́коже є҆гда̀ свѣтѧ́шесѧ свѣти́лникъ є҆гѡ̀ над̾ главо́ю мое́ю, є҆гда̀ свѣ́томъ є҆гѡ̀ хожда́хъ во тмѣ̀,

⁴є҆гда̀ бѣ́хъ тѧ́жекъ въ пѹте́хъ, є҆гда̀ бг҃ъ посѣще́нїе творѧ́ше до́мѹ моемѹ̀,

⁵є҆гда̀ бѣ́хъ бога́тъ ѕѣлѡ̀, ѡ҆́крестъ же менє̀ рабѝ,

⁶є҆гда̀ ѡ҆блива́хѹсѧ пѹтїѐ моѝ ма́сломъ кра́вїимъ, го́ры же моѧ҄ ѡ҆блива́хѹсѧ млеко́мъ,

⁷є҆гда̀ и҆схожда́хъ и҆з̾ѹ́тра во гра́дъ, на сто́гнахъ же поставлѧ́шесѧ мѝ престо́лъ;

⁸Ви́дѧще мѧ̀ ю҆́нѡши скрыва́шасѧ, старѣ҄йшины же всѝ востава́ша:

⁹вельмѡ́жи же престава́хѹ глаго́лати, пе́рстъ возло́жше на ѹ҆ста̀ своѧ҄.

¹⁰Слы́шавшїи же блажи́ша мѧ̀, и҆ ѧ҆зы́къ и҆́хъ прильпѐ горта́ни и҆́хъ:

¹¹ѩ҆́кѡ ѹ҆́хо слы́ша и҆ ѹ҆блажи́ мѧ, ѻ҆́ко же ви́дѣвъ мѧ̀ ѹ҆клони́сѧ.

¹²Спасо́хъ бо ѹ҆бо́гаго ѿ рѹкѝ си́льнагѡ, и҆ сиротѣ̀, є҆мѹ́же не бѣ̀ помо́щника, помого́хъ.

¹³Благослове́нїе погиба́ющагѡ на мѧ̀ да прїи́детъ, ѹ҆ста́ же вдѡви́ча благослови́ша мѧ̀.

¹⁴Въ пра́вдѹ же ѡ҆блача́хсѧ, ѡ҆дѣва́хсѧ же въ сѹ́дъ ѩ҆́кѡ въ ри́зѹ.

¹⁵Ѻ҆́ко бѣ́хъ слѣпы҄мъ, нога́ же хромы́мъ:

¹⁶а҆́зъ бы́хъ ѻ҆те́цъ немѡщны́мъ, ра́спрю же, є҆ѧ́же не вѣ́дѧхъ, и҆зслѣ́дихъ:

¹⁷сотро́хъ же членѡ́вныѧ непра́ведныхъ, ѿ среды́ же зѹбѡ́въ и҆́хъ грабле́нїе и҆з̾ѧ́хъ.

¹⁸Рѣ́хъ же: во́зрастъ мо́й состарѣ́етсѧ ѩ҆́коже стебло̀ фі́нїково, мнѡ́га лѣ҄та поживѹ̀.

¹⁹Ко́рень разве́рзесѧ при водѣ̀, и҆ роса̀ пребѹ́детъ на жа́твѣ мое́й.

²⁰Сла́ва моѧ̀ но́ва со мно́ю, и҆ лѹ́къ мо́й въ рѹцѣ̀ мое́й по́йдетъ.

²¹(Старѣ҄йшины) слы́шавшїи мѧ̀ внима́хѹ, молча́хѹ же ѡ҆ мое́мъ совѣ́тѣ.

²²Къ моемѹ̀ глаго́лѹ не прилага́хѹ, ра́довахѹсѧ же, є҆гда̀ къ ни҄мъ глаго́лахъ:

²³ѩ҆́коже землѧ̀ жа́ждѹщаѧ ѡ҆жида́етъ дождѧ̀, та́кѡ сі́и моегѡ̀ глаго́ланїѧ.

²⁴А҆́ще возсмѣю́сѧ къ ни҄мъ, не вѣ́риша: и҆ свѣ́тъ лица̀ моегѡ̀ не ѿпада́ше.

²⁵И҆збра́хъ пѹ́ть и҆́хъ, и҆ сѣдѣ́хъ кнѧ́зь, и҆ вселѧ́хсѧ ѩ҆́коже ца́рь посредѣ̀ хра́брыхъ, а҆́ки ѹ҆тѣша́ѧй печа́льныхъ.