Read Библия Церковнославянская Іѡвъ 32 Bible Online

Іѡвъ 32 - Библия Церковнославянская bible

Іѡвъ 32

¹И҆ ѹ҆молча̀ їѡвъ словесы̀. Ѹ҆молча́ша же и҆ трїѐ дрѹ́зїе є҆гѡ̀ ктомѹ̀ прерѣкова́ти їѡвѹ, бѣ̀ бо їѡвъ првднъ пред̾ ни́ми.

²Разгнѣ́васѧ же є҆лїѹ́съ сы́нъ варахїи́левъ вѹзі́тѧнинъ, ѿ ѹ҆́жичества а҆ра́мска а҆ѵсїтїді́йскїѧ страны̀, разгнѣ́васѧ же на їѡва ѕѣлѡ̀, зане́же наречѐ себѐ првдна пред̾ бг҃омъ,

³и҆ на трїе́хъ же дрѹгѡ́въ разгнѣ́васѧ ѕѣлѡ̀, ѩ҆́кѡ не возмого́ша ѿвѣща́ти проти́вѹ їѡвѹ и҆ сѹди́ша є҆го̀ бы́ти нечести́ва.

⁴Е҆лїѹ́съ же терпѧ́ше да́ти ѿвѣ́тъ їѡвѹ, ѩ҆́кѡ старѣ́йшїи є҆гѡ̀ сѹ́ть де́ньми (дрѹ́зїе є҆гѡ̀).

⁵И҆ ви́дѣ є҆лїѹ́съ, ѩ҆́кѡ нѣ́сть ѿвѣ́та во ѹ҆стѣ́хъ трїе́хъ мѹже́й, и҆ воз̾ѧри́сѧ гнѣ́вомъ свои́мъ.

⁶Ѿвѣща́въ же є҆лїѹ́съ сы́нъ варахїи́левъ вѹзі́тѧнинъ, речѐ: ю҆нѣ́йшїй ѹ҆́бѡ є҆́смь лѣ́ты, вы́ же є҆стѐ старѣ́йшїи: тѣ́мже молча́хъ, ѹ҆боѧ́всѧ возвѣсти́ти ва́мъ хи́трость мою̀:

⁷рѣ́хъ же: вре́мѧ є҆́сть глаго́лющее, и҆ во мно́зѣхъ лѣ́тѣхъ вѣ́дѧтъ премѹ́дрость,

⁸но дѹ́хъ є҆́сть въ человѣ́цѣхъ, дыха́нїе же вседержи́телево є҆́сть наѹча́ющее:

⁹не многолѣ́тнїи сѹ́ть премѹ́дри, нижѐ ста́рїи вѣ́дѧтъ сѹ́дъ:

¹⁰тѣ́мже рѣ́хъ: послѹ́шайте менѐ, и҆ возвѣщѹ̀ ва́мъ, ѩ҆̀же вѣ́мъ, внѹши́те глаго́лы моѧ҄:

¹¹рекѹ́ бо ва́мъ послѹ́шающымъ, до́ндеже и҆спыта́ете словеса̀, и҆ да́же ва́съ ѹ҆разѹмѣ́ю,

¹²и҆ сѐ, не бѣ̀ їѡва ѡ҆блича́ѧй, ѿвѣща́ѧй проти́внѡ глаго́лѡмъ є҆гѡ̀ ѿ ва́съ:

¹³да не рече́те: ѡ҆брѣто́хомъ премѹ́дрость, гд҇еви приложи́вшесѧ:

¹⁴человѣ́кѹ же попѹсти́сте глаго́лати такѡва́ѧ словеса̀:

¹⁵ѹ҆жаснѹ́шасѧ, не ѿвѣща́ша ктомѹ̀, ѡ҆бетша́ша ѿ ни́хъ словеса̀:

¹⁶терпѣ́хъ, не глаго́лахъ бо, ѩ҆́кѡ ста́ша, не ѿвѣща́ша, ѩ҆́кѡ да ѿвѣща́ю и҆ а҆́зъ ча́сть.

¹⁷Ѿвѣща́ же є҆лїѹ́съ, глаго́лѧ:

¹⁸па́ки возглаго́лю, и҆спо́лненъ бо є҆́смь слове́съ: ѹ҆бива́етъ бо мѧ̀ дѹ́хъ чре́ва:

¹⁹чре́во же моѐ ѩ҆́кѡ мѣ́хъ мста̀ врѧ́ща завѧ́занъ, и҆лѝ ѩ҆́коже мѣ́хъ кова́ческїй расто́ргнѹтый:

²⁰возглаго́лю, да почі́ю, ѿве́рзъ ѹ҆ста̀:

²¹человѣ́ка бо не постыждѹ́сѧ, но нижѐ бре́ннагѡ посрамлю́сѧ:

²²не вѣ́мъ бо чѹди́тисѧ лицѹ̀: а҆́ще же нѝ, то̀ и҆ менѐ мо́лїе и҆з̾ѧдѧ́тъ.