Read Библия Церковнославянская Іѡвъ 33 Bible Online

Іѡвъ 33 - Библия Церковнославянская bible

Іѡвъ 33

¹Но послѹ́шай, їѡве, слове́съ мои́хъ и҆ бесѣ́дѹ мою̀ внѹшѝ:

²сѐ бо, ѿверзо́хъ ѹ҆ста̀ моѧ҄, и҆ возглаго́ла ѧ҆зы́къ мо́й:

³чи́сто се́рдце моѐ во словесѣ́хъ, ра́зѹмъ же ѹ҆стнѹ̀ моє́ю чи҄стаѧ ѹ҆разѹмѣ́етъ:

⁴дх҃ъ бж҃їй сотвори́вый мѧ̀, дыха́нїе же вседержи́телево поѹча́ющее мѧ̀:

⁵а҆́ще мо́жеши, да́ждь мѝ ѿвѣ́тъ къ си҄мъ: потерпѝ, ста́ни проти́вѹ менє̀, и҆ а҆́зъ проти́вѹ тебє̀.

⁶Ѿ бре́нїѧ сотворе́нъ є҆сѝ ты̀, ѩ҆́коже и҆ а҆́зъ: ѿ тогѡ́жде сотворе́нїѧ є҆смы̀:

⁷не стра́хъ мо́й тѧ̀ смѧте́тъ, нижѐ рѹка̀ моѧ̀ тѧжка̀ бѹ́детъ на тѧ̀.

⁸Ѻ҆ба́че ре́клъ є҆сѝ во ѹ҆́шы моѝ, и҆ гла́съ глагѡ́лъ твои́хъ ѹ҆слы́шахъ, зане́же глаго́леши:

⁹чи́стъ є҆́смь а҆́зъ, не согрѣша́ѧ, непоро́ченъ же є҆́смь, и҆́бо не беззако́нновахъ:

¹⁰зазо́ръ же на мѧ̀ ѡ҆брѣ́те и҆ мни́тъ мѧ̀, ѩ҆́кѡ проти́вника себѣ̀:

¹¹вложи́ же но́гѹ мою̀ въ дре́во и҆ надсмотрѧ́лъ пѹти҄ моѧ҄ всѧ҄.

¹²Ка́кѡ бо глаго́леши, ѩ҆́кѡ пра́въ є҆́смь, и҆ не послѹ́ша менѐ; Вѣ́ченъ бо є҆́сть, и҆́же над̾ зємны́ми.

¹³Глаго́леши бо: чесѡ̀ ра́ди пра́вды моеѧ̀ не ѹ҆слы́ша всѧ́ко сло́во;

¹⁴Е҆ди́ною бо возглаго́летъ гд҇ь, второ́е же во снѣ̀, и҆лѝ въ поѹче́нїи нощнѣ́мъ,

¹⁵и҆лѝ, ѩ҆́кѡ є҆гда̀ напа́даетъ стра́хъ лю́тъ на человѣ́ки, во дрема́нїихъ на ло́жи:

¹⁶тогда̀ ѿкры́етъ ѹ҆́мъ человѣ́ческїй, видѣ́ньми стра́ха тацѣ́ми и҆̀хъ ѹ҆страши́тъ,

¹⁷да возврати́тъ человѣ́ка ѿ непра́вды, тѣ́ло же є҆гѡ̀ѿ паде́нїѧ и҆зба́ви,

¹⁸пощадѣ́ же дѹ́шѹ є҆гѡ̀ ѿ сме́рти, є҆́же не па́сти є҆мѹ̀ на бра́ни.

¹⁹Па́ки же ѡ҆бличѝ є҆го̀ болѣ́знїю на ло́жи и҆ мно́жество косте́й є҆гѡ̀ разсла́би:

²⁰всѧ́кагѡ же бра́шна пшени́чна не возмо́жетъ прїѧ́ти, а҆ дѹша̀ є҆гѡ̀ ѩ҆́ди хо́щетъ,

²¹до́ндеже согнїю́тъ плѡ́ти є҆гѡ̀, и҆ пока́жетъ кѡ́сти є҆гѡ̀ то́щѧ:

²²прибли́жисѧ же на сме́рть дѹша̀ є҆гѡ̀, и҆ живо́тъ є҆гѡ̀ во а҆́дѣ.

²³А҆́ще бѹ́детъ ты́сѧща а҆́гг҃лъ смертоно́сныхъ, є҆ди́нъ ѿ ни́хъ не ѹ҆ѧзви́тъ є҆го̀: а҆́ще помы́слитъ се́рдцемъ ѡ҆брати́тисѧ ко гд҇ѹ, повѣ́сть же человѣ́кѹ сво́й зазо́ръ, и҆ безѹ́мїе своѐ пока́жетъ,

²⁴застѹ́питъ є҆̀, є҆́же не впа́сти є҆мѹ̀ въ сме́рть, ѡ҆бнови́тъ же тѣ́ло є҆гѡ̀ ѩ҆́коже повапле́нїе на стѣнѣ̀, кѡ́сти же є҆гѡ̀ и҆спо́лнитъ мо́зга:

²⁵ѹ҆мѧгчи́тъ же є҆гѡ̀ пло́ть ѩ҆́коже младе́нца, и҆ ѹ҆стро́итъ є҆го̀ возмѹжа́вша въ человѣ́цѣхъ.

²⁶Помо́литсѧ же ко гд҇ѹ и҆ прїѧ́тъ и҆́мъ бѹ́детъ, вни́детъ же лице́мъ весе́лымъ со и҆сповѣ́данїемъ, возда́стъ же человѣ́кѡмъ пра́вдѹ свою̀.

²⁷Посе́мъ тогда̀ за́зритъ человѣ́къ са́мъ себѣ̀, глаго́лѧ: ѩ҆кова҄ѧ содѣва́хъ; и҆ не по досто́инствѹ и҆стѧза́ мѧ, ѡ҆ ни́хже согрѣши́хъ:

²⁸спасѝ дѹ́шѹ мою̀, є҆́же не вни́ти во и҆стлѣ́нїе, и҆ жи́знь моѧ̀ свѣ́тъ ѹ҆́зритъ.

²⁹Сѐ, сїѧ҄ всѧ҄ твори́тъ крѣ́пкїй (бг҃ъ) пѹти҄ трѝ съ мѹ́жемъ:

³⁰но и҆зба́ви дѹ́шѹ мою̀ ѿ сме́рти, да живо́тъ мо́й во свѣ́тѣ хва́литъ є҆го̀.

³¹Внима́й, їѡве, и҆ послѹ́шай менѐ, премолчѝ, и҆ а҆́зъ возглаго́лю:

³²и҆ а҆́ще тебѣ̀ сѹ́ть словеса̀, ѿвѣща́й мѝ: глаго́ли, хощѹ́ бо ѡ҆правди́тисѧ тебѣ̀:

³³а҆́ще же нѝ, ты̀ послѹ́шай менѐ, ѹ҆молчѝ, и҆ наѹчѹ́ тѧ премѹ́дрости.