Read Библия Церковнославянская Іѡвъ 37 Bible Online

Іѡвъ 37 - Библия Церковнославянская bible

Іѡвъ 37

¹И҆ ѿ си́хъ возмѧте́сѧ се́рдце моѐ и҆ ѿто́ржесѧ ѿ мѣ́ста своегѡ̀.

²Послѹ́шай слѹ́ха во гнѣ́вѣ ѩ҆́рости гд҇ни, и҆ поѹче́нїе и҆зо ѹ҆́стъ є҆гѡ̀ и҆зы́детъ.

³Под̾ всѣ́мъ не́бомъ нача́лство є҆гѡ̀, и҆ свѣ́тъ є҆гѡ̀ на крилѹ҄ землѝ.

⁴Вслѣ́дъ є҆гѡ̀ возопїе́тъ гла́сомъ, возгреми́тъ гла́сомъ вели́чїѧ своегѡ̀, и҆ не и҆змѣни́тъ и҆́хъ, ѩ҆́кѡ ѹ҆слы́шитъ гла́съ є҆гѡ̀.

⁵Возгреми́тъ крѣ́пкїй гла́сомъ свои́мъ ди҄внаѧ: сотвори́ бо вє́лїѧ, и҆́хже не вѣ́дахомъ.

⁶Повелѣва́ѧй снѣ́гѹ: бѹ́ди на землѝ, и҆ бѹ́рѧ дождѧ̀, и҆ бѹ́рѧ дождє́въ могѹ́тства є҆гѡ̀.

⁷Въ рѹцѣ̀ всѧ́кагѡ человѣ́ка зна́менаетъ, да позна́етъ всѧ́къ человѣ́къ свою̀ не́мощь.

⁸Внидо́ша же ѕвѣ́рїе под̾ кро́въ и҆ ѹ҆молко́ша на ло́жи.

⁹И҆з̾ храни́лищъ внѹ́треннихъ нахо́дѧтъ бѡлѣ́зни, и҆ ѿ внѣ́шнихъ стра́нъ стѹ́день.

¹⁰И҆ ѿ дыха́нїѧ крѣ́пка да́стъ ле́дъ: ѹ҆правлѧ́етъ же во́дѹ, ѩ҆́коже хо́щетъ,

¹¹и҆ и҆збра́нное ѹ҆строѧ́етъ ѡ҆́блакъ: разжене́тъ ѡ҆́блакъ свѣ́тъ є҆гѡ̀,

¹²и҆ са́мъ ѡ҆крє́стнаѧ преврати́тъ, ѩ҆́коже хо́щетъ, въ дѣла̀ и҆́хъ: всѧ҄, є҆ли҄ка заповѣ́сть и҆̀мъ, сїѧ҄ чиноположє́на сѹ́ть ѿ негѡ̀ на землѝ,

¹³а҆́ще въ наказа́нїе, а҆́ще на зе́млю свою̀, а҆́ще на ми́лость ѡ҆брѧ́щетъ и҆̀.

¹⁴Внѹшѝ сїѧ҄, їѡве: ста́ни ѹ҆ча́йсѧ си́лѣ гд҇ни.

¹⁵Вѣ́мы, ѩ҆́кѡ гд҇ь положѝ дѣла̀ своѧ҄, свѣ́тъ сотвори́въ и҆з̾ тмы̀.

¹⁶Вѣ́сть же разли́чїе ѡ҆блакѡ́въ и҆ вє́лїѧ падє́нїѧ ѕлы́хъ.

¹⁷Твоѧ́ же ѻ҆де́жда тепла̀, почива́етъ же на землѝ ѿ ю҆́га.

¹⁸Ѹ҆тверждє́нїѧ съ ни́мъ въ дре́вности, крѣпка҄ ѩ҆́коже видѣ́нїе сли́тїѧ.

¹⁹Чесѡ̀ ра́ди, наѹчи́ мѧ, что̀ рече́мъ є҆мѹ̀; и҆ преста́немъ мнѡ́га глаго́люще.

²⁰Е҆да̀ кни́га, и҆лѝ книго́чїа мѝ предстои́тъ; да стоѧ́щь сотворю̀ человѣ́кѹ молча́ти.

²¹Не всѣ҄мъ же ви́димь свѣ́тъ: свѣ́тлый є҆́сть въ дре́вностехъ, ѩ҆́коже є҆́же ѿ негѡ̀ на ѡ҆́блацѣхъ.

²²Ѿ сѣ́вера ѡ҆́блацы златоза́рни: въ си́хъ ве́лїѧ сла́ва и҆ че́сть вседержи́телева.

²³И҆ не ѡ҆брѣта́емъ и҆но́го подо́бна крѣ́пости є҆гѡ̀: и҆́же сѹ́дитъ првднѡ, мни́ши ли, ѩ҆́кѡ не слы́шитъ то́й;

²⁴Тѣ́мже ѹ҆боѧ́тсѧ є҆гѡ̀ человѣ́цы: ѹ҆боѧ́тсѧ же є҆гѡ̀ и҆ премѹ́дрїи се́рдцемъ.