Read Библия Церковнославянская Іѡвъ 38 Bible Online

Іѡвъ 38 - Библия Церковнославянская bible

Іѡвъ 38

¹Преста́вшѹ же є҆лїѹ́сѹ ѿ бесѣ́ды, речѐ гд҇ьїѡвѹ сквозѣ̀ бѹ́рю и҆ ѡ҆́блаки:

²кто̀ се́й скрыва́ѧй ѿ менє̀ совѣ́тъ, содержа́й же глаго́лы въ се́рдцы, мене́ же ли мни́тсѧ ѹ҆таи́ти;

³Препоѧ́ши ѩ҆́кѡ мѹ́жъ чрє́сла твоѧ҄: вопрошѹ́ же тѧ̀, ты́ же мѝ ѿвѣща́й.

⁴Гдѣ̀ бы́лъ є҆сѝ, є҆гда̀ ѡ҆снова́хъ зе́млю; возвѣсти́ ми, а҆́ще вѣ́си ра́зѹмъ.

⁵Кто̀ положѝ мѣ҄ры є҆ѧ̀, а҆́ще вѣ́си; и҆лѝ кто̀ наведы́й ве́рвь на ню̀;

⁶На че́мже столпѝ є҆ѧ̀ ѹ҆твержде́ни сѹ́ть; кто́же є҆́сть положи́вый ка́мень краеѹго́лный на не́й;

⁷Е҆гда̀ (сотворє́ны) бы́ша ѕвѣ́зды, восхвали́ша мѧ̀ гла́сомъ ве́лїимъ всѝ а҆́гг҃ли моѝ.

⁸Загради́хъ же мо́ре враты̀, є҆гда̀ и҆злива́шесѧ и҆з̾ чре́ва ма́тере своеѧ̀ и҆сходѧ́щее:

⁹положи́хъ же є҆мѹ̀ ѡ҆́блакъ во ѡ҆дѣѧ́нїе, мгло́ю же пови́хъ є҆̀:

¹⁰и҆ положи́хъ є҆мѹ̀ предѣ́лы, ѡ҆бложи́въ затво́ры и҆ врата̀:

¹¹рѣ́хъ же є҆мѹ̀: до сегѡ̀ до́йдеши и҆ не пре́йдеши, но въ тебѣ̀ сокрѹша́тсѧ во́лны твоѧ҄.

¹²И҆лѝ при тебѣ̀ соста́вихъ свѣ́тъ ѹ҆́треннїй, денни́ца же вѣ́сть чи́нъ сво́й,

¹³ѩ҆́тисѧ кри́лъ землѝ, ѿтрѧстѝ нечести҄выѧ ѿ неѧ̀;

¹⁴И҆лѝ ты̀, бре́нїе взе́мъ, ѿ землѝ созда́лъ є҆сѝ живо́тно, и҆ глаго́ливаго сего̀ посади́лъ є҆сѝ на землѝ;

¹⁵Ѿѧ́лъ же ли є҆сѝ ѿ нечести́выхъ свѣ́тъ, мы́шцѹ же го́рдыхъ сокрѹши́лъ ли є҆сѝ;

¹⁶Прише́лъ же ли є҆сѝ на и҆сто́чники мо́рѧ, во слѣда́хъ же бе́здны ходи́лъ ли є҆сѝ;

¹⁷Ѿверза́ютсѧ же ли тебѣ̀ стра́хомъ врата̀ смє́ртнаѧ, вра́тницы же а҆́дѡвы ви́дѣвше тѧ̀ ѹ҆боѧ́шасѧ ли;

¹⁸Навы́клъ же ли є҆сѝ широты̀ поднебе́сныѧ; Повѣ́ждь ѹ҆̀бо мѝ, коли́ка є҆́сть;

¹⁹Въ ко́ей же землѝ вселѧ́етсѧ свѣ́тъ, тмѣ́ же ко́е є҆́сть мѣ́сто;

²⁰А҆́ще ѹ҆̀бо введе́ши мѧ̀ въ предѣ́лы и҆́хъ, а҆́ще же ли и҆ вѣ́си стєзѝ и҆́хъ;

²¹Вѣ́мъ ѹ҆̀бо, ѩ҆́кѡ тогда̀ рожде́нъ є҆сѝ, число́ же лѣ́тъ твои́хъ мно́го.

²²Прише́лъ же ли є҆сѝ въ сокрѡ́вища снѣ҄жнаѧ, и҆ сокрѡ́вища гра҄днаѧ ви́дѣлъ ли є҆сѝ;

²³подлежа́тъ же ли тебѣ̀ въ ча́съ врагѡ́въ, въ де́нь бра́ней и҆ ра́ти;

²⁴Ѿкѹ́дѹ же и҆схо́дитъ сла́на, и҆лѝ разсыпа́етсѧ ю҆́гъ на поднебе́снѹю;

²⁵Кто́ же ѹ҆гото́ва дождю̀ ве́лїю пролїѧ́нїе, и҆ пѹ́ть мо́лнїи и҆ гро́ма,

²⁶ѡ҆дожди́ти на зе́млю, на не́йже нѣ́сть мѹ́жа, пѹсты́ню, и҆дѣ́же человѣ́ка нѣ́сть въ не́й,

²⁷насы́тити непроходи́мѹ и҆ ненаселе́нѹ, и҆ прозѧ́бнѹти и҆схо́дъ ѕла́ка;

²⁸Кто́ є҆сть дождю̀ ѻ҆те́цъ; кто́ же є҆́сть роди́вый ка҄пли рѡ́сныѧ;

²⁹И҆з̾ чїегѡ̀ чре́ва и҆схо́дитъ ле́дъ; Сла́нѹ же на небесѝ кто̀ роди́лъ,

³⁰ѩ҆́же нисхо́дитъ ѩ҆́кѡ вода̀ текѹ́щаѧ; Лицѐ нечести́ва кто̀ ѹ҆страшѝ;

³¹Разѹмѣ́лъ же ли є҆сѝ соѹ́зъ плїа́дъ, и҆ ѡ҆гражде́нїе ѡ҆рїѡ́ново ѿве́рзлъ ли є҆сѝ;

³²И҆лѝ ѿве́рзеши зна́мєнїѧ небє́снаѧ во вре́мѧ своѐ; и҆ вече́рнюю ѕвѣздѹ̀ за власы̀ є҆ѧ̀ привлече́ши ли;

³³Вѣ́си же ли премѣнє́нїѧ небє́снаѧ, и҆лѝ быва҄ющаѧ вкѹ́пѣ под̾ небесе́мъ;

³⁴Призове́ши же ли ѡ҆́блакъ гла́сомъ; и҆ тре́петомъ воды̀ вели́кїѧ послѹ́шаетъ ли тѧ̀;

³⁵По́слеши же ли мѡ́лнїи, и҆ по́йдѹтъ; рекѹ́тъ же ли тѝ: что́ є҆сть;

³⁶Кто́ же да́лъ є҆́сть жена́мъ тка́нїѧ мѹ́дрость, и҆лѝ и҆спещре́нїѧ хи́трость;

³⁷Кто́ же и҆зчислѧ́ѧй ѡ҆́блаки премѹ́дростїю, не́бо же на зе́млю преклони́лъ,

³⁸разлїѧ́сѧ же ѩ҆́кѡ землѧ̀ пра́хъ, спаѧ́хъ же є҆̀, а҆́ки ка́менемъ, на четы́ри ѹ҆́глы;

³⁹Ѹ҆лови́ши же ли льва́мъ ѩ҆́дь, и҆ дѹ́шы ѕмїє́въ насы́тиши ли;

⁴⁰ѹ҆боѧ́шасѧ бо на ло́жахъ свои́хъ и҆ сѣдѧ́тъ въ де́брехъ ѹ҆ловлѧ́юще.

⁴¹Кто́ же вра́нѹ ѹ҆гото́ва пи́щѹ; пти҄чищи бо є҆гѡ̀ ко гд҇ѹ воззва́ша, ѡ҆блета́юще бра҄шна и҆́щѹще.