Read Библия Церковнославянская Іѡвъ 6 Bible Online

Іѡвъ 6 - Библия Церковнославянская bible

Іѡвъ 6

¹Ѿвѣща́въ же їѡвъ, речѐ:

²а҆́ще бы кто̀ вѣ́сѧ и҆звѣ́силъ гнѣ́въ мо́й, бѡлѣ́зни же моѧ҄ взѧ́лъ бы на мѣ́рило вкѹ́пѣ,

³то̀ песка̀ морска́гѡ тѧжча́йшїи бы́ли бы: но, ѩ҆́коже мни́тсѧ, словеса̀ моѧ҄ ѕла҄ сѹ́ть.

⁴Стрѣ́лы бо гд҇ни въ тѣ́лѣ мое́мъ сѹ́ть, и҆́хже ѩ҆́рость и҆спива́етъ кро́вь мою̀: є҆гда̀ начнѹ̀ глаго́лати, бодѹ́тъ мѧ̀.

⁵Что́ бо; є҆да̀ вотщѐ возреве́тъ ди́вїй ѻ҆се́лъ, ра́звѣ бра҄шна просѧ̀; и҆лѝ возреве́тъ гла́сомъ во́лъ, въ ѩ҆́слехъ и҆мѣ́ѧй бра́шно;

⁶Снѣ́стсѧ ли хлѣ́бъ без̾ со́ли; и҆лѝ є҆́сть вкѹ́съ во тщи́хъ словесѣ́хъ;

⁷Не мо́жетъ бо ѹ҆тиши́тисѧ дѹша̀ моѧ̀: смра́дъ бо зрю̀ бра҄шна моѧ҄, ѩ҆́коже воню̀ льво́вѹ.

⁸А҆́ще бо да́лъ бы, да прїи́детъ проше́нїе моѐ, и҆ наде́ждѹ мою̀ да́лъ бы гд҇ь.

⁹Наче́нъ гд҇ь да ѹ҆ѧзвлѧ́етъ мѧ̀, до конца́ же да не ѹ҆бїе́тъ мѧ̀.

¹⁰Бѹ́ди же мѝ гра́дъ гро́бъ, на є҆гѡ́же стѣна́хъ скака́хъ въ не́мъ: не пощажѹ̀: не солга́хъ бо во словесѣ́хъ ст҃ы́хъ бг҃а моегѡ̀.

¹¹Ка́ѧ бо крѣ́пость моѧ̀, ѩ҆́кѡ терплю̀; и҆лѝ ко́е мѝ вре́мѧ, ѩ҆́кѡ терпи́тъ моѧ̀ дѹша̀;

¹²є҆да̀ крѣ́пость ка́менїѧ крѣ́пость моѧ̀; и҆лѝ плѡ́ти моѧ҄ сѹ́ть мѣ҄дѧны;

¹³и҆лѝ не ѹ҆пова́хъ на него̀; по́мощь же ѿ менє̀ ѿстѹпѝ,

¹⁴ѿрече́сѧ ѿ менє̀ ми́лость, посѣще́нїе же гд҇не презрѣ́ мѧ.

¹⁵Не воззрѣ́ша на мѧ̀ бли́жнїи моѝ: ѩ҆́коже пото́къ ѡ҆скѹдѣва́ѧй, и҆лѝ ѩ҆́коже вѡ́лны преидо́ша мѧ̀:

¹⁶и҆̀же менє̀ боѧ́хѹсѧ, нн҃ѣ нападо́ша на мѧ̀:

¹⁷ѩ҆́коже снѣ́гъ и҆лѝ ле́дъ сме́рзлый, є҆гда̀ и҆ста́етъ теплотѣ̀ бы́вшей, не ктомѹ̀ познава́етсѧ, что̀ бѣ̀:

¹⁸та́кѡ и҆ а҆́зъ ѡ҆ста́вленъ є҆́смь ѿ всѣ́хъ, погибо́хъ же и҆ бездо́мокъ бы́хъ:

¹⁹ви́дите пѹти҄ ѳема҄нскїѧ, на стєзѝ савѡ҄нскїѧ смотрѧ́щїи,

²⁰и҆ стѹда̀ и҆спо́лнени бѹ́дѹтъ на гра́ды и҆ на и҆мѣ҄нїѧ надѣ́ющїисѧ.

²¹Нн҃ѣ же и҆ вы̀ наидо́сте на мѧ̀ неми́лостивнѡ: ѹ҆̀бо ви́дѣвше мо́й стрѹ́пъ ѹ҆бо́йтесѧ.

²²Что́ бо; є҆да̀ что̀ ѹ҆ ва́съ проси́хъ, и҆лѝ ва́шеѧ крѣ́пости тре́бѹю,

²³да спасе́те мѧ̀ ѿ врагѡ́въ, и҆лѝ и҆з̾ рѹкѝ си́льныхъ и҆зба́вите мѧ̀;

²⁴Наѹчи́те мѧ̀, а҆́зъ же ѹ҆молчѹ̀: а҆́ще что̀ погрѣши́хъ, скажи́те мѝ.

²⁵Но, ѩ҆́коже мни́тсѧ, ѕла҄ (сѹ́ть) мѹ́жа и҆́стиннагѡ словеса̀, не ѿ ва́съ бо крѣ́пости прошѹ̀:

²⁶нижѐ ѡ҆бличе́нїе ва́ше словесы̀ мѧ̀ ѹ҆толи́тъ, ниже́ бо вѣща́нїѧ ва́шегѡ слове́съ стерплю̀.

²⁷Ѻ҆ба́че ѩ҆́кѡ на си́ра напа́даете, наска́чете же на дрѹ́га ва́шего.

²⁸Нн҃ѣ же воззрѣ́въ на ли́ца ва҄ша, не солжѹ̀.

²⁹Сѧ́дите нн҃ѣ, и҆ да не бѹ́детъ непра́ведно, и҆ па́ки ко пра́ведномѹ сни́дитесѧ.

³⁰И҆́бо нѣ́сть въ ѧ҆зы́цѣ мое́мъ непра́вды, и҆ горта́нь мо́йне ра́зѹмѹ ли поѹча́етсѧ;