Read Библия Церковнославянская Іѡвъ 7 Bible Online

Іѡвъ 7 - Библия Церковнославянская bible

Іѡвъ 7

¹Не и҆скѹше́нїе ли житїѐ человѣ́кѹ на землѝ, и҆ ѩ҆́коже нае́мника повседне́внагѡ жи́знь є҆гѡ̀;

²и҆лѝ ѩ҆́коже ра́бъ боѧ́йсѧ гд҇а своегѡ̀ и҆ ѹ҆лѹчи́въ сѣ́нь; и҆лѝ ѩ҆́коже нае́мникъ жды́й мзды̀ своеѧ̀;

³та́кожде и҆ а҆́зъ жда́хъ мц҇ы тщы̀, нѡ́щи же болѣ́зней даны̀ мѝ сѹ́ть.

⁴А҆́ще ѹ҆снѹ̀, глаго́лю: когда̀ де́нь; є҆гда́ же воста́нѹ, па́ки: когда̀ ве́черъ; и҆спо́лненъ же быва́ю болѣ́зней ѿ ве́чера до ѹ҆́тра.

⁵Мѣ́ситсѧ же моѐ тѣ́ло въ гноѝ черве́й, ѡ҆блива́ю же грѹ́дїе землѝ, гно́й стрѹжа̀.

⁶Житїе́ же моѐ є҆́сть скорѧ́е бесѣ́ды, поги́бе же во тще́й наде́жди.

⁷Помѧнѝ ѹ҆̀бо, ѩ҆́кѡ дѹ́хъ мо́й живо́тъ, и҆ ктомѹ̀ не возврати́тсѧ ѻ҆́ко моѐ ви́дѣти блага҄ѧ.

⁸Не ѹ҆́зритъ менѐ ѻ҆́ко ви́дѧщагѡ мѧ̀: ѻ҆́чи твоѝ на мнѣ̀, и҆ ктомѹ̀ нѣ́смь,

⁹ѩ҆́коже ѡ҆́блакъ ѡ҆чище́нъ ѿ небесѐ: а҆́ще бо человѣ́къ сни́детъ во а҆́дъ, ктомѹ̀ не взы́детъ,

¹⁰ни возврати́тсѧ во сво́й до́мъ, нижѐ и҆́мать є҆го̀ позна́ти ктомѹ̀ мѣ́сто є҆гѡ̀.

¹¹Ѹ҆́бѡ нижѐ а҆́зъ пощажѹ̀ ѹ҆́стъ мои́хъ, возглаго́лю въ нѹ́жди сы́й, ѿве́рзѹ ѹ҆ста̀ моѧ҄ го́рестїю дѹшѝ моеѧ̀ сотѣсне́нъ.

¹²Е҆да̀ мо́ре є҆́смь, и҆лѝ ѕмі́й, ѩ҆́кѡ ѹ҆чини́лъ є҆сѝ на мѧ̀ хране́нїе;

¹³Реко́хъ, ѩ҆́кѡ ѹ҆тѣ́шитъ мѧ̀ ѻ҆́дръ мо́й, произнесѹ́ же ко мнѣ̀ на є҆ди́нѣ сло́во на ло́жи мое́мъ:

¹⁴ѹ҆страша́еши мѧ̀ со́нїѧми и҆ видѣ́нїѧми ѹ҆жаса́еши мѧ̀:

¹⁵свободи́ши ѿ дѹ́ха моегѡ̀ дѹ́шѹ мою̀, ѿ сме́рти же кѡ́сти моѧ҄.

¹⁶Не поживѹ́ бо во вѣ́къ, да долготерплю̀: ѿстѹпѝ ѿ менє̀, тще́ бо житїѐ моѐ.

¹⁷Что́ бо є҆́сть человѣ́къ, ѩ҆́кѡ возвели́чилъ є҆сѝ є҆го̀; и҆лѝ ѩ҆́кѡ внима́еши ѹ҆мо́мъ къ немѹ̀;

¹⁸и҆лѝ посѣще́нїе твори́ши є҆мѹ̀ по всѧ́ко ѹ҆́тро и҆ въ поко́и сѹди́ти є҆го̀ и҆́маши;

¹⁹Доко́лѣ не ѡ҆ста́виши менѐ, нижѐ ѿпѹска́еши мѧ̀, до́ндеже поглощѹ̀ сли҄ны моѧ҄ въ болѣ́зни;

²⁰А҆́ще а҆́зъ согрѣши́хъ, что̀ тебѣ̀ возмогѹ̀ содѣ́лати, свѣ́дый ѹ҆́мъ человѣ́чь; почто́ мѧ є҆сѝ положи́лъ прекосло́вна тебѣ̀, и҆ є҆́смь тебѣ̀ бре́менемъ;

²¹почто̀ нѣ́си сотвори́лъ беззако́нїю моемѹ̀ забве́нїѧ, и҆ ѡ҆чище́нїѧ грѣха̀ моегѡ̀; нн҃ѣ же въ зе́млю ѿидѹ̀, ѹ҆́тренюѧй же нѣ́смь ктомѹ̀.