Read Библия Церковнославянская Іѡвъ 8 Bible Online

Іѡвъ 8 - Библия Церковнославянская bible

Іѡвъ 8

¹Ѿвѣща́въ же валда́дъ саѵхе́йскїй, речѐ: доко́лѣ глаго́лати бѹ́деши сїѧ҄;

²дѹ́хъ многоглаго́ливъ во ѹ҆стѣ́хъ твои́хъ.

³Е҆да̀ гд҇ь ѡ҆би́дитъ сѹдѧ́й; и҆лѝ всѧ҄ сотвори́вый возмѧте́тъ пра́вдѹ;

⁴А҆́ще сы́нове твоѝ согрѣши́ша пред̾ ни́мъ, посла̀ рѹ́кѹ на беззакѡ́нїѧ и҆́хъ:

⁵ты́ же ѹ҆́тренюй ко гд҇ѹ вседержи́телю молѧ́сѧ:

⁶а҆́ще чи́стъ є҆сѝ и҆ и҆́стиненъ, моли́твѹ твою̀ ѹ҆слы́шитъ, ѹ҆стро́итъ же тѝ па́ки житїѐ пра́вды:

⁷бѹ́дѹтъ ѹ҆̀бо пє́рваѧ твоѧ҄ ма҄ла, послѣ҄днѧѧ же твоѧ҄ без̾ числа̀.

⁸Вопроси́ бо ро́да пе́рваго, и҆зслѣ́ди же по ро́дѹ ѻ҆тцє́въ:

⁹вчера́шни бо є҆смы̀ и҆ не вѣ́мы, сѣ́нь бо є҆́сть на́ше житїѐ на землѝ:

¹⁰не сі́и ли наѹча́тъ тѧ̀ и҆ возвѣстѧ́тъ тѝ и҆ ѿ се́рдца и҆знесѹ́тъ словеса̀;

¹¹Е҆да̀ произни́четъ ро́гозъ без̾ воды̀, и҆лѝ расте́тъ си́тникъ без̾ напаѧ́нїѧ;

¹²є҆щѐ сѹ́щѹ на ко́рени, и҆ не по́жнетсѧ ли; пре́жде напаѧ́нїѧ всѧ́кое бы́лїе не и҆зсыха́етъ ли;

¹³та́кѡ ѹ҆̀бо бѹ́дѹтъ послѣ҄днѧѧ всѣ́хъ забыва́ющихъ гд҇а: наде́жда бо нечести́вагѡ поги́бнетъ:

¹⁴не населе́нъ бо бѹ́детъ до́мъ є҆гѡ̀, паѹчи́на же сбѹ́детсѧ селе́нїе є҆гѡ̀.

¹⁵А҆́ще подпре́тъ хра́минѹ свою̀, не ста́нетъ: є҆́мшѹсѧ же є҆мѹ̀ за ню̀, не пребѹ́детъ.

¹⁶Вла́жный бо є҆́сть под̾ со́лнцемъ, и҆ ѿ тлѣ́нїѧ є҆гѡ̀ лѣ́торасль є҆гѡ̀ и҆зы́детъ:

¹⁷на собра́нїи ка́менїѧ спи́тъ, посредѣ́ же креме́нїѧ поживе́тъ:

¹⁸а҆́ще поглоти́тъ мѣ́сто, солже́тъ є҆мѹ̀, не ви́дѣлъ є҆сѝ такова҄ѧ,

¹⁹ѩ҆́кѡ превраще́нїе нечести́вагѡ таково̀, и҆з̾ земли́ же и҆на́го произрасти́тъ.

²⁰Гд҇ь бо не ѿри́нетъ неѕло́бивагѡ: всѧ́кагѡ же да́ра ѿ нечести́вагѡ не прїи́метъ.

²¹И҆́стиннымъ же ѹ҆ста̀ и҆спо́лнитъ смѣ́ха, ѹ҆стнѣ́ же и҆́хъ и҆сповѣ́данїѧ.

²²Врази́ же и҆́хъ ѡ҆блекѹ́тсѧ въ стѹ́дъ: жили́ще же нечести́вагѡ не бѹ́детъ.