Read Библия Церковнославянская Іѡвъ 9 Bible Online

Іѡвъ 9 - Библия Церковнославянская bible

Іѡвъ 9

¹Ѿвѣща́въ же їѡвъ, речѐ:

²вои́стиннѹ вѣ́мъ, ѩ҆́кѡ та́кѡ є҆́сть: ка́кѡ бо бѹ́детъ пра́веденъ человѣ́къ ѹ҆ гд҇а;

³а҆́ще бо восхо́щетъ сѹди́тисѧ съ ни́мъ, не послѹ́шаетъ є҆гѡ̀, да не пререче́тъ ко є҆ди́номѹ словесѝ є҆гѡ̀ ѿ ты́сѧщи.

⁴Премдръ бо є҆́сть мы́слїю, крѣ́покъ же и҆ вели́къ: кто̀ же́стокъ бы́въ проти́вѹ є҆гѡ̀, пребы́сть;

⁵Ѡ҆бетша́ѧй го́ры, и҆ не вѣ́дѧтъ, превраща́ѧй ѧ҆̀ гнѣ́вомъ:

⁶трѧсы́й поднебе́снѹю и҆з̾ ѡ҆снова́нїй, столпи́ же є҆ѧ̀ коле́блютсѧ:

⁷гл҃ѧй со́лнцѹ, и҆ не восхо́дитъ, ѕвѣ́зды же печа́тствѹетъ:

⁸простры́й є҆ди́нъ не́бо и҆ ходѧ́й но мо́рю, ѩ҆́кѡ по землѝ:

⁹творѧ́й плїа҄ды и҆ є҆спе́ра, и҆ а҆рктѹ́ра и҆ сокрѡ́вища ю҆́жнаѧ:

¹⁰творѧ́й вє́лїѧ и҆ неизслѣ́дѡваннаѧ, сла҄внаѧ же и҆ и҆зрѧ҄днаѧ, и҆̀мже нѣ́сть числа̀.

¹¹А҆́ще прїи́детъ ко мнѣ̀, не и҆́мамъ ви́дѣти: и҆ а҆́ще мимои́детъ менє̀, ника́кѡ ѹ҆разѹмѣ́хъ.

¹²А҆́ще во́зметъ, кто̀ возврати́тъ; и҆лѝ кто̀ рече́тъ є҆мѹ̀: что̀ сотвори́лъ є҆сѝ;

¹³Са́мъ бо ѿвраща́етъ гнѣ́въ, слѧко́шасѧ под̾ ни́мъ ки́ти поднебе́снїи.

¹⁴А҆́ще же мѧ̀ ѹ҆слы́шитъ, и҆лѝ разсѹ́дитъ глаго́лы моѧ҄;

¹⁵А҆́ще бо и҆ пра́веденъ бѹ́дѹ, не ѹ҆слы́шитъ менѐ, сѹдѹ̀ є҆гѡ̀ помолю́сѧ:

¹⁶а҆́ще же воззовѹ̀, и҆ ѹ҆слы́шитъ мѧ̀, не и҆мѹ̀ вѣ́ры, ѩ҆́кѡ ѹ҆слы́ша гла́съ мо́й.

¹⁷Да не мгло́ю мѧ̀ потреби́тъ, мнѡ́га же мѝ сотрє́нїѧ сотворѝ всѹ́е,

¹⁸не ѡ҆ставлѧ́етъ бо мѧ̀ ѿдохнѹ́ти, и҆спо́лни же мѧ̀ го́рести.

¹⁹Поне́же си́ленъ є҆́сть крѣ́постїю: кто̀ ѹ҆̀бо сѹдѹ̀ є҆гѡ̀ воспроти́витсѧ;

²⁰А҆́ще бо бѹ́дѹ пра́веденъ, ѹ҆ста̀ моѧ҄ нечє́стїѧ сотворѧ́тъ: а҆́ще же бѹ́дѹ непоро́ченъ, стро́потенъ бѹ́дѹ.

²¹А҆́ще бо нече́стїе сотвори́хъ, не вѣ́мъ дѹше́ю мое́ю: ѻ҆ба́че ѿе́млетсѧ мѝ живо́тъ.

²²Тѣ́мже рѣ́хъ: вели́ка и҆ си́льна гѹби́тъ гнѣ́въ.

²³ѩ҆́кѡ лѹка́вїи сме́ртїю лю́тою поги́бнѹтъ, ѻ҆ба́че пра́вєднымъ посмѣва́ютсѧ.

²⁴Предана̀ є҆́сть землѧ̀ въ рѹ́цѣ нечести́вагѡ, ли́ца сѹді́й є҆ѧ̀ покрыва́етъ: а҆́ще же не са́мъ є҆́сть, кто̀ є҆́сть;

²⁵Житїе́ же моѐ є҆́сть легча́е скороте́чца: ѿбѣго́ша и҆ не ви́дѣша.

²⁶И҆лѝ є҆́сть кораблє́мъ слѣ́дъ пѹтѝ, и҆лѝ ѻ҆рла̀ летѧ́ща, и҆́щѹща ѩ҆́ди;

²⁷А҆́ще бо рекѹ̀: забѹ́дѹ глаго́лѧ, прини́кнѹвъ лице́мъ воздохнѹ̀,

²⁸трѧсѹ́сѧ всѣ́ми ѹ҆десы̀: вѣ́мъ бо, ѩ҆́кѡ не безви́нна мѧ̀ ѡ҆ста́виши.

²⁹А҆́ще же нечести́въ є҆́смь, почто̀ не ѹ҆мро́хъ;

³⁰А҆́ще бо и҆змы́юсѧ снѣ́гомъ и҆ ѡ҆чи́щѹсѧ рѹка́ми чи́стыми,

³¹дово́лнѡ во скве́рнѣ ѡ҆мочи́лъ мѧ̀ є҆сѝ, возгнѹша́сѧ же мно́ю ѻ҆де́жда моѧ̀.

³²Нѣ́си бо человѣ́къ, ѩ҆́коже а҆́зъ, є҆мѹ́же противопрю́сѧ, да прїи́демъ вкѹ́пѣ на сѹ́дъ.

³³Ѽ, дабы̀ хода́тай на́мъ бы́лъ, и҆ ѡ҆блича́ѧй и҆ разслѹ́шаѧй междѹ̀ ѻ҆бѣ́ма.

³⁴Да ѿи́метъ ѿ менє̀ же́злъ, стра́хъ же є҆гѡ̀ да не смѹща́етъ менѐ:

³⁵и҆ не ѹ҆бою́сѧ, но возглаго́лю, и҆́бо та́кѡ не вѣ́мъ са́мъ себѐ.