Read Библия Церковнославянская Ѱалти́рь 103 Bible Online

Ѱалти́рь 103 - Библия Церковнославянская bible

Ѱалти́рь 103

¹Ѱало́мъ дв҃дѹ, ѡ҆ мїрстѣ́мъ бытїѝ, Благословѝ, дѹшѐ моѧ̀, гд҇а. Гд҇и бж҃е мо́й, возвели́чилсѧ є҆сѝ ѕѣлѡ̀: во и҆сповѣ́данїе и҆ въ велелѣ́потѹ ѡ҆бле́клсѧ є҆сѝ:

²ѡ҆дѣѧ́йсѧ свѣ́томъ ѩ҆́кѡ ри́зою, простира́ѧй не́бо ѩ҆́кѡ ко́жѹ:

³покрыва́ѧй вода́ми превы́спрєннѧѧ своѧ҄, полага́ѧй ѡ҆́блаки на восхожде́нїе своѐ, ходѧ́й на крилѹ҄ вѣ́трєню:

⁴творѧ́й а҆́гг҃лы своѧ҄ дѹ́хи, и҆ слѹги҄ своѧ҄ пла́мень ѻ҆́гненный:

⁵ѡ҆снова́ѧй зе́млю на тве́рди є҆ѧ̀: не преклони́тсѧ въ вѣ́къ вѣ́ка.

⁶Бе́здна ѩ҆́кѡ ри́за ѡ҆дѣѧ́нїе є҆ѧ̀, на гора́хъ ста́нѹтъ во́ды:

⁷ѿ запреще́нїѧ твоегѡ̀ побѣ́гнѹтъ, ѿ гла́са гро́ма твоегѡ̀ ѹ҆боѧ́тсѧ.

⁸Восхо́дѧтъ го́ры, и҆ низхо́дѧтъ полѧ̀, въ мѣ́сто є҆́же ѡ҆снова́лъ є҆сѝ и҆̀мъ.

⁹Предѣ́лъ положи́лъ є҆сѝ, є҆гѡ́же не пре́йдѹтъ, нижѐ ѡ҆братѧ́тсѧ покры́ти зе́млю.

¹⁰Посыла́ѧй и҆сто́чники въ де́брехъ, посредѣ̀ го́ръ про́йдѹтъ во́ды.

¹¹Напаѧ́ютъ всѧ҄ ѕвѣ҄ри сє́лныѧ, ждѹ́тъ {воспрїи́мѹтъ} ѻ҆на́гри въ жа́ждѹ свою̀.

¹²На ты́хъ пти҄цы небє́сныѧ привита́ютъ: ѿ среды̀ ка́менїѧ дадѧ́тъ гла́съ.

¹³Напаѧ́ѧй го́ры ѿ превы́спреннихъ свои́хъ: ѿ плода̀ дѣ́лъ твои́хъ насы́титсѧ землѧ̀.

¹⁴Прозѧба́ѧй травѹ̀ скотѡ́мъ, и҆ ѕла́къ на слѹ́жбѹ человѣ́кѡмъ, и҆звестѝ хлѣ́бъ ѿ землѝ:

¹⁵и҆ вїно̀ весели́тъ се́рдце человѣ́ка, ѹ҆ма́стити лицѐ є҆ле́емъ: и҆ хлѣ́бъ се́рдце человѣ́ка ѹ҆крѣпи́тъ.

¹⁶Насы́тѧтсѧ древа̀ пѡльска́ѧ, ке́дри лїва́нстїи, и҆̀хже є҆сѝ насади́лъ:

¹⁷та́мѡ пти҄цы вогнѣздѧ́тсѧ, є҆рѡді́ево жили́ще предводи́телствѹетъ и҆́ми.

¹⁸Го́ры высѡ́кїѧ є҆ле́нємъ, ка́мень прибѣ́жище за́ѧцємъ.

¹⁹Сотвори́лъ є҆́сть лѹнѹ̀ во времена̀: со́лнце позна̀ за́падъ сво́й.

²⁰Положи́лъ є҆сѝ тмѹ̀, и҆ бы́сть но́щь, въ не́йже про́йдѹтъ всѝ ѕвѣ́рїе дѹбра́внїи,

²¹скѵ́мни рыка́ющїи восхи́тити и҆ взыска́ти ѿ бг҃а пи́щѹ себѣ̀.

²²Возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гѹтъ.

²³И҆зы́детъ человѣ́къ на дѣ́ло своѐ и҆ на дѣ́ланїе своѐ до ве́чера.

²⁴ѩ҆́кѡ возвели́чишасѧ дѣла̀ твоѧ҄, гд҇и: всѧ҄ премдростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀.

²⁵Сїѐ мо́ре вели́кое и҆ простра́нное: та́мѡ га́ди, и҆́хже нѣ́сть числа̀, живѡ́тнаѧ ма҄лаѧ съ вели́кими:

²⁶та́мѡ корабли҄ препла́ваютъ, ѕмі́й се́й, є҆го́же созда́лъ є҆сѝ рѹга́тисѧ є҆мѹ̀.

²⁷Всѧ҄ къ тебѣ̀ ча́ютъ, да́ти пи́щѹ и҆̀мъ во бла́го вре́мѧ.

²⁸Да́вшѹ тебѣ̀ и҆̀мъ, соберѹ́тъ: ѿве́рзшѹ тебѣ̀ рѹ́кѹ, всѧ́чєскаѧ и҆спо́лнѧтсѧ бла́гости:

²⁹ѿвра́щшѹ же тебѣ̀ лицѐ, возмѧтѹ́тсѧ: ѿи́меши дѹ́хъ и҆́хъ, и҆ и҆зче́знѹтъ и҆ въ пе́рсть свою̀ возвратѧ́тсѧ:

³⁰по́слеши дх҃а твоего̀, и҆ сози́ждѹтсѧ, и҆ ѡ҆бнови́ши лицѐ землѝ.

³¹Бѹ́ди сла́ва гд҇нѧ во вѣ́ки: возвесели́тсѧ гд҇ь ѡ҆ дѣ́лѣхъ свои́хъ:

³²призира́ѧй на зе́млю и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ.

³³Воспою̀ гд҇еви въ животѣ̀ мое́мъ, пою̀ бг҃ѹ моемѹ̀, до́ндеже є҆́смь:

³⁴да ѹ҆слади́тсѧ є҆мѹ̀ бесѣ́да моѧ̀, а҆́зъ же возвеселю́сѧ ѡ҆ гд҇ѣ.

³⁵Да и҆зче́знѹтъ грѣ҄шницы ѿ землѝ, и҆ беззакѡ́нницы, ѩ҆́коже не бы́ти и҆̀мъ. Благословѝ, дѹшѐ моѧ̀, гд҇а.