Read Библия Церковнославянская Ѱалти́рь 106 Bible Online

Ѱалти́рь 106 - Библия Церковнославянская bible

Ѱалти́рь 106

¹ И҆сповѣ́дайтесѧ гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.

²Да рекѹ́тъ и҆зба́вленнїи гд҇емъ, и҆̀хже и҆зба́ви и҆з̾ рѹкѝ врага̀,

³и҆ ѿ стра́нъ собра̀ и҆́хъ, ѿ востѡ́къ и҆ за҄падъ, и҆ сѣ́вера и҆ мо́рѧ:

⁴заблѹди́ша въ пѹсты́ни безво́днѣй, пѹтѝ гра́да ѡ҆би́телнагѡ не ѡ҆брѣто́ша:

⁵а҆́лчѹще и҆ жа́ждѹще, дѹша̀ и҆́хъ въ ни́хъ и҆зчезѐ.

⁶И҆ воззва́ша ко гд҇ѹ, внегда̀ скорбѣ́ти и҆̀мъ, и҆ ѿ нѹ́ждъ и҆́хъ и҆зба́ви ѧ҆̀:

⁷и҆ наста́ви ѧ҆̀ на пѹ́ть пра́въ, вни́ти во гра́дъ ѡ҆би́телный.

⁸Да и҆сповѣ́дѧтсѧ {да и҆сповѣ́дѧтъ} гд҇еви мл҇ти є҆гѡ̀ и҆ чѹдеса̀ є҆гѡ̀ сыновѡ́мъ человѣ́чєскимъ:

⁹ѩ҆́кѡ насы́тилъ є҆́сть дѹ́шѹ тщѹ̀, и҆ дѹ́шѹ а҆́лчѹщѹ и҆спо́лни бла҄гъ:

¹⁰сѣдѧ́щыѧ во тмѣ̀ и҆ сѣ́ни сме́ртнѣй, ѡ҆кова҄нныѧ нището́ю и҆ желѣ́зомъ,

¹¹ѩ҆́кѡ преѡгорчи́ша словеса̀ бж҃їѧ, и҆ совѣ́тъ вы́шнѧгѡ раздражи́ша.

¹²И҆ смири́сѧ въ трѹдѣ́хъ се́рдце и҆́хъ, и҆ и҆знемого́ша, и҆ не бѣ̀ помага́ѧй.

¹³И҆ воззва́ша ко гд҇ѹ, внегда̀ скорбѣ́ти и҆̀мъ, и҆ ѿ нѹ́ждъ и҆́хъ сп҃сѐ ѧ҆̀:

¹⁴и҆ и҆зведѐ ѧ҆̀ и҆з̾ тмы̀ и҆ сѣ́ни сме́ртныѧ, и҆ ѹ҆́зы и҆́хъ растерза̀.

¹⁵Да и҆сповѣ́дѧтсѧ {да и҆сповѣ́дѧтъ} гд҇еви мл҇ти є҆гѡ̀ и҆ чѹдеса̀ є҆гѡ̀ сыновѡ́мъ человѣ́чєскимъ:

¹⁶ѩ҆́кѡ сокрѹшѝ врата̀ мѣ҄днаѧ, и҆ верєѝ желѣ҄зныѧ сломѝ.

¹⁷Воспрїѧ́тъ ѧ҆̀ ѿ пѹтѝ беззако́нїѧ и҆́хъ: беззако́нїй бо ра́ди свои́хъ смири́шасѧ.

¹⁸Всѧ́кагѡ бра́шна возгнѹша́сѧ дѹша̀ и҆́хъ, и҆ прибли́жишасѧ до вра́тъ сме́ртныхъ.

¹⁹И҆ воззва́ша ко гд҇ѹ, внегда̀ скорбѣ́ти и҆̀мъ, и҆ ѿ нѹ́ждъ и҆́хъ сп҃сѐ ѧ҆̀:

²⁰посла̀ сло́во своѐ, и҆ и҆зцѣлѝ ѧ҆̀, и҆ и҆зба́ви ѧ҆̀ ѿ растлѣ́нїй и҆́хъ.

²¹Да и҆сповѣ́дѧтсѧ {да и҆сповѣ́дѧтъ} гд҇еви мл҇ти є҆гѡ̀ и҆ чѹдеса̀ є҆гѡ̀ сыновѡ́мъ человѣ́чєскимъ:

²²и҆ да пожрѹ́тъ є҆мѹ̀ же́ртвѹ хвалы̀ и҆ да возвѣстѧ́тъ дѣла̀ є҆гѡ̀ въ ра́дости.

²³Сходѧ́щїи въ мо́ре въ корабле́хъ, творѧ́щїи дѣ҄ланїѧ въ вода́хъ мно́гихъ,

²⁴ті́и ви́дѣша дѣла̀ гд҇нѧ и҆ чѹдеса̀ є҆гѡ̀ во глѹбинѣ̀.

²⁵Речѐ, и҆ ста̀ дѹ́хъ бѹ́ренъ, и҆ вознесо́шасѧ вѡ́лны є҆гѡ̀:

²⁶восхо́дѧтъ до небе́съ и҆ низхо́дѧтъ до бе́зднъ: дѹша̀ и҆́хъ въ ѕлы́хъ та́ѧше:

²⁷смѧто́шасѧ, подвиго́шасѧ ѩ҆́кѡ пїѧ́ный, и҆ всѧ̀ мѹ́дрость и҆́хъ поглощена̀ бы́сть.

²⁸И҆ воззва́ша ко гд҇ѹ, внегда̀ скорбѣ́ти и҆̀мъ, и҆ ѿ нѹ́ждъ и҆́хъ и҆зведѐ ѧ҆̀:

²⁹и҆ повелѣ̀ бѹ́ри, и҆ ста̀ въ тишинѹ̀, и҆ ѹ҆молко́ша вѡ́лны є҆гѡ̀.

³⁰И҆ возвесели́шасѧ, ѩ҆́кѡ ѹ҆молко́ша, и҆ наста́ви ѧ҆̀ въ приста́нище хотѣ́нїѧ своегѡ̀.

³¹Да и҆сповѣ́дѧтсѧ {да и҆сповѣ́дѧтъ} гд҇еви мл҇ти є҆гѡ̀ и҆ чѹдеса̀ є҆гѡ̀ сыновѡ́мъ человѣ́чєскимъ:

³²да вознесѹ́тъ є҆го̀ въ цр҃кви людстѣ́й, и҆ на сѣда́лищи ста́рєцъ восхва́лѧтъ є҆го̀.

³³Положи́лъ є҆́сть рѣ́ки въ пѹсты́ню и҆ и҆схѡ́диша вѡдна́ѧ въ жа́ждѹ,

³⁴зе́млю плодоно́снѹю въ сла́ность, ѿ ѕло́бы живѹ́щихъ на не́й.

³⁵Положи́лъ є҆́сть пѹсты́ню во є҆зе́ра вѡдна́ѧ и҆ зе́млю безво́днѹю во и҆схѡ́дища вѡдна́ѧ.

³⁶И҆ населѝ та́мѡ а҆́лчѹщыѧ, и҆ соста́виша гра́ды ѡ҆би́тєлны:

³⁷и҆ насѣ́ѧша се́ла, и҆ насади́ша вїногра́ды, и҆ сотвори́ша пло́дъ жи́тенъ.

³⁸И҆ блг҇вѝ ѧ҆̀, и҆ ѹ҆мно́жишасѧ ѕѣлѡ̀: и҆ скоты̀ и҆́хъ не ѹ҆ма́ли.

³⁹И҆ ѹ҆ма́лишасѧ и҆ ѡ҆ѕло́бишасѧ ѿ ско́рби ѕѡ́лъ и҆ болѣ́зни:

⁴⁰и҆злїѧ́сѧ ѹ҆ничиже́нїе на кнѧ҄зи и҆́хъ, и҆ ѡ҆блазнѝ {заблѹжда́ти сотворѝ} ѧ҆̀ по непрохо́днѣй, а҆ не по пѹтѝ.

⁴¹И҆ помо́же ѹ҆бо́гѹ ѿ нищеты̀ и҆ положѝ ѩ҆́кѡ ѻ҆́вцы ѻ҆те́чєствїѧ.

⁴²Ѹ҆́зрѧтъ пра́вїи и҆ возвеселѧ́тсѧ, и҆ всѧ́кое беззако́нїе загради́тъ ѹ҆ста̀ своѧ҄.

⁴³Кто̀ премѹ́дръ и҆ сохрани́тъ сїѧ҄; и҆ ѹ҆разѹмѣ́ютъ мл҇ти гд҇ни.