Read Библия Церковнославянская Ѱалти́рь 108 Bible Online

Ѱалти́рь 108 - Библия Церковнославянская bible

Ѱалти́рь 108

¹ Бж҃е, хвалы̀ моеѧ̀ не премолчѝ:

²ѩ҆́кѡ ѹ҆ста̀ грѣ҄шнича и҆ ѹ҆ста̀ льсти́вагѡ на мѧ̀ ѿверзо́шасѧ, глаго́лаша на мѧ̀ ѧ҆зы́комъ льсти́вымъ,

³и҆ словесы̀ ненави́стными ѡ҆быдо́ша мѧ̀, и҆ бра́шасѧ со мно́ю тѹ́не.

⁴Вмѣ́стѡ є҆́же люби́ти мѧ̀, ѡ҆болга́хѹ мѧ̀, а҆́зъ же молѧ́хсѧ:

⁵и҆ положи́ша на мѧ̀ ѕла҄ѧ за бл҃га҄ѧ, и҆ не́нависть за возлюбле́нїе моѐ.

⁶Поста́ви на него̀ грѣ́шника, и҆ дїа́волъ да ста́нетъ ѡ҆деснѹ́ю є҆гѡ̀:

⁷внегда̀ сѹди́тисѧ є҆мѹ̀, да и҆зы́детъ ѡ҆сѹжде́нъ, и҆ моли́тва є҆гѡ̀ да бѹ́детъ въ грѣ́хъ.

⁸Да бѹ́дѹтъ дні́е є҆гѡ̀ ма́ли, и҆ є҆пі́скопство є҆гѡ̀ да прїи́метъ и҆́нъ:

⁹да бѹ́дѹтъ сы́нове є҆гѡ̀ си́ри, и҆ жена̀ є҆гѡ̀ вдова̀:

¹⁰дви́жѹщесѧ да преселѧ́тсѧ сы́нове є҆гѡ̀ и҆ воспро́сѧтъ, да и҆згна́ни бѹ́дѹтъ и҆з̾ домѡ́въ свои́хъ.

¹¹Да взы́щетъ заимода́вецъ всѧ҄, є҆ли҄ка сѹ́ть є҆гѡ̀: и҆ да восхи́тѧтъ чѹжді́и трѹды̀ є҆гѡ̀.

¹²Да не бѹ́детъ є҆мѹ̀ застѹ́пника, нижѐ да бѹ́детъ ѹ҆щедрѧ́ѧй сирѡты̀ є҆гѡ̀:

¹³да бѹ́дѹтъ ча҄да є҆гѡ̀ въ погѹбле́нїе, въ ро́дѣ є҆ди́нѣмъ да потреби́тсѧ и҆́мѧ є҆гѡ̀.

¹⁴Да воспомѧне́тсѧ беззако́нїе ѻ҆тє́цъ є҆гѡ̀ пред̾ гд҇емъ, и҆ грѣ́хъ ма́тере є҆гѡ̀ да не ѡ҆чи́ститсѧ:

¹⁵да бѹ́дѹтъ пред̾ гд҇емъ вы́нѹ, и҆ да потреби́тсѧ ѿ землѝ па́мѧть и҆́хъ:

¹⁶зане́же не помѧнѹ̀ сотвори́ти ми́лость, и҆ погна̀ человѣ́ка ни́ща и҆ ѹ҆бо́га, и҆ ѹ҆миле́на се́рдцемъ ѹ҆мертви́ти.

¹⁷И҆ возлюбѝ клѧ́твѹ, и҆ прїи́детъ є҆мѹ̀: и҆ не восхотѣ̀ блг҇ве́нїѧ, и҆ ѹ҆дали́тсѧ ѿ негѡ̀.

¹⁸И҆ ѡ҆блече́сѧ въ клѧ́твѹ ѩ҆́кѡ въ ри́зѹ, и҆ вни́де ѩ҆́кѡ вода̀ во ѹ҆тро́бѹ є҆гѡ̀ и҆ ѩ҆́кѡ є҆ле́й въ кѡ́сти є҆гѡ̀:

¹⁹да бѹ́детъ є҆мѹ̀ ѩ҆́кѡ ри́за, въ ню́же ѡ҆блачи́тсѧ, и҆ ѩ҆́кѡ по́ѧсъ, и҆́мже вы́нѹ ѡ҆поѧсѹ́етсѧ.

²⁰Сїѐ дѣ́ло ѡ҆болга́ющихъ мѧ̀ ѹ҆ гд҇а и҆ глаго́лющихъ лѹка҄ваѧ на дѹ́шѹ мою̀.

²¹И҆ ты̀, гд҇и, гд҇и, сотворѝ со мно́ю и҆́мене ра́ди твоегѡ̀, ѩ҆́кѡ бл҃га мл҇ть твоѧ̀:

²²и҆зба́ви мѧ̀, ѩ҆́кѡ ни́щъ и҆ ѹ҆бо́гъ є҆́смь а҆́зъ, и҆ се́рдце моѐ смѧте́сѧ внѹ́трь менє̀.

²³ѩ҆́кѡ сѣ́нь, внегда̀ ѹ҆клони́тисѧ є҆́й, ѿѧ́хсѧ: стрѧсо́хсѧ ѩ҆́кѡ прѹ́зи.

²⁴Кѡлѣ́на моѧ҄ и҆знемо́госта ѿ поста̀, и҆ пло́ть моѧ̀ и҆змѣни́сѧ є҆ле́а ра́ди.

²⁵И҆ а҆́зъ бы́хъ поноше́нїе и҆̀мъ: ви́дѣша мѧ̀, покива́ша глава́ми свои́ми.

²⁶Помози́ ми, гд҇и бж҃е мо́й, и҆ сп҃си́ мѧ по мл҇ти твое́й:

²⁷и҆ да разѹмѣ́ютъ, ѩ҆́кѡ рѹка̀ твоѧ̀ сїѧ̀, и҆ ты̀, гд҇и, сотвори́лъ є҆сѝ ю҆̀.

²⁸Прокленѹ́тъ ті́и, и҆ ты̀ блг҇ви́ши: востаю́щїи на мѧ̀ да постыдѧ́тсѧ, ра́бъ же тво́й возвесели́тсѧ.

²⁹Да ѡ҆блекѹ́тсѧ ѡ҆болга́ющїи мѧ̀ въ срамотѹ̀ и҆ ѡ҆де́ждѹтсѧ ѩ҆́кѡ ѻ҆де́ждою стѹдо́мъ свои́мъ.

³⁰И҆сповѣ́мсѧ гд҇еви ѕѣлѡ̀ ѹ҆сты҄ мои́ми и҆ посредѣ̀ мно́гихъ восхвалю̀ є҆го̀:

³¹ѩ҆́кѡ преста̀ ѡ҆деснѹ́ю ѹ҆бо́гагѡ, є҆́же сп҇тѝ ѿ гонѧ́щихъ дѹ́шѹ мою̀.