Read Библия Церковнославянская Ѱалти́рь 117 Bible Online

Ѱалти́рь 117 - Библия Церковнославянская bible

Ѱалти́рь 117

¹ И҆сповѣ́дайтесѧ гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.

²Да рече́тъ ѹ҆́бѡ до́мъ ї҆и҃левъ: ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.

³Да рече́тъ ѹ҆́бѡ до́мъ а҆арѡ́нь: ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.

⁴Да рекѹ́тъ ѹ҆́бѡ всѝ боѧ́щїисѧ гд҇а: ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.

⁵Ѿ ско́рби призва́хъ гд҇а, и҆ ѹ҆слы́ша мѧ̀ въ простра́нство.

⁶Гд҇ь мнѣ̀ помо́щникъ, и҆ не ѹ҆бою́сѧ: что̀ сотвори́тъ мнѣ̀ человѣ́къ;

⁷гд҇ь мнѣ̀ помо́щникъ, и҆ а҆́зъ воззрю̀ на врагѝ моѧ҄.

⁸Бл҃го є҆́сть надѣ́ѧтисѧ на гд҇а, не́жели надѣ́ѧтисѧ на человѣ́ка:

⁹бл҃го є҆́сть ѹ҆пова́ти на гд҇а, не́жели ѹ҆пова́ти на кнѧ҄зи.

¹⁰Всѝ ѩ҆зы́цы ѡ҆быдо́ша мѧ̀, и҆ и҆́менемъ гд҇нимъ противлѧ́хсѧ и҆̀мъ:

¹¹ѡ҆быше́дше ѡ҆быдо́ша мѧ̀, и҆ и҆́менемъ гд҇нимъ противлѧ́хсѧ и҆̀мъ:

¹²ѡ҆быдо́ша мѧ̀ ѩ҆́кѡ пче́лы со́тъ, и҆ разгорѣ́шасѧ ѩ҆́кѡ ѻ҆́гнь въ те́рнїи: и҆ и҆́менемъ гд҇нимъ противлѧ́хсѧ и҆̀мъ.

¹³Ѿринове́нъ преврати́хсѧ па́сти, и҆ гд҇ь прїѧ́тъ мѧ̀.

¹⁴Крѣ́пость моѧ̀ и҆ пѣ́нїе моѐ гд҇ь, и҆ бы́сть мѝ во сп҇нїе.

¹⁵Гла́съ ра́дости и҆ сп҇нїѧ въ селе́нїихъ првдныхъ: десни́ца гд҇нѧ сотворѝ си́лѹ.

¹⁶Десни́ца гд҇нѧ вознесе́ мѧ, десни́ца гд҇нѧ сотворѝ си́лѹ.

¹⁷Не ѹ҆мрѹ̀, но жи́въ бѹ́дѹ и҆ повѣ́мъ дѣла̀ гд҇нѧ.

¹⁸Наказѹ́ѧ наказа́ мѧ гд҇ь, сме́рти же не предаде́ мѧ.

¹⁹Ѿве́рзите мнѣ̀ врата̀ пра́вды: вше́дъ въ нѧ̀, и҆сповѣ́мсѧ гд҇еви.

²⁰Сїѧ҄ врата̀ гд҇нѧ: првднїи вни́дѹтъ въ нѧ̀.

²¹И҆сповѣ́мсѧ тебѣ̀, ѩ҆́кѡ ѹ҆слы́шалъ мѧ̀ є҆сѝ и҆ бы́лъ є҆сѝ мнѣ̀ во сп҇нїе.

²²Ка́мень, є҆го́же небрего́ша зи́ждѹщїи, се́й бы́сть во главѹ̀ ѹ҆́гла:

²³ѿ гд҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.

²⁴Се́й де́нь, є҆го́же сотворѝ гд҇ь, возра́дѹемсѧ и҆ возвесели́мсѧ въ ѻ҆́нь.

²⁵Ѽ, гд҇и, сп҃си́ же, ѽ, гд҇и, поспѣши́ же.

²⁶Блг҇ве́нъ грѧды́й во и҆́мѧ гд҇не: благослови́хомъ вы̀ и҆з̾ до́мѹ гд҇нѧ.

²⁷Бг҃ъ гд҇ь, и҆ ѩ҆ви́сѧ на́мъ: соста́вите пра́здникъ во ѹ҆чаща́ющихъ до рѡ́гъ ѻ҆лтаре́выхъ.

²⁸Бг҃ъ мо́й є҆сѝ ты̀, и҆ и҆сповѣ́мсѧ тебѣ̀: бг҃ъ мо́й є҆сѝ ты̀, и҆ вознесѹ́ тѧ: и҆сповѣ́мсѧ тебѣ̀, ѩ҆́кѡ ѹ҆слы́шалъ мѧ̀ є҆сѝ и҆ бы́лъ є҆сѝ мнѣ̀ во сп҇нїе.

²⁹И҆сповѣ́дайтесѧ гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀.