Read Библия Церковнославянская Ѱалти́рь 118 Bible Online

Ѱалти́рь 118 - Библия Церковнославянская bible

Ѱалти́рь 118

¹ Бл҃же́ни непоро́чнїи въ пѹ́ть {въ пѹтѝ}, ходѧ́щїи въ зако́нѣ гд҇ни.

²Бл҃же́ни и҆спыта́ющїи свидѣ҄нїѧ є҆гѡ̀, всѣ́мъ срдцемъ взы́щѹтъ є҆го̀.

³Не дѣ́лающїи бо беззако́нїѧ въ пѹте́хъ є҆гѡ̀ ходи́ша.

⁴Ты̀ заповѣ́далъ є҆сѝ за́пѡвѣди твоѧ҄ сохрани́ти ѕѣлѡ̀:

⁵дабы̀ и҆спра́вилисѧ пѹтїѐ моѝ, сохрани́ти ѡ҆правда҄нїѧ твоѧ҄.

⁶Тогда̀ не постыжѹ́сѧ, внегда̀ призрѣ́ти мѝ на всѧ҄ за́пѡвѣди твоѧ҄.

⁷И҆сповѣ́мсѧ тебѣ̀ въ пра́вости се́рдца, внегда̀ наѹчи́тимисѧ сѹдба́мъ пра́вды твоеѧ̀.

⁸Ѡ҆правда҄нїѧ твоѧ҄ сохраню̀: не ѡ҆ста́ви менѐ до ѕѣла̀.

⁹Въ чесо́мъ и҆спра́витъ ю҆нѣ́йшїй пѹ́ть сво́й; внегда̀ сохрани́ти словеса̀ твоѧ҄.

¹⁰Всѣ́мъ се́рдцемъ мои́мъ взыска́хъ тебѐ: не ѿри́ни менѐ ѿ за́повѣдїй твои́хъ.

¹¹Въ се́рдцы мое́мъ скры́хъ словеса̀ твоѧ҄, ѩ҆́кѡ да не согрѣшѹ̀ тебѣ̀.

¹²Блг҇ве́нъ є҆сѝ, гд҇и: наѹчи́ мѧ ѡ҆правда́нїємъ твои҄мъ.

¹³Ѹ҆стна́ма мои́ма возвѣсти́хъ всѧ҄ сѹдбы҄ ѹ҆́стъ твои́хъ.

¹⁴На пѹтѝ свидѣ́нїй твои́хъ наслади́хсѧ, ѩ҆́кѡ ѡ҆ всѧ́комъ бога́тствѣ.

¹⁵Въ за́повѣдехъ твои́хъ поглѹмлю́сѧ, и҆ ѹ҆разѹмѣ́ю пѹти҄ твоѧ҄.

¹⁶Во ѡ҆правда́нїихъ твои́хъ поѹчѹ́сѧ: не забѹ́дѹ слове́съ твои́хъ.

¹⁷Возда́ждь рабѹ̀ твоемѹ̀: живи́ мѧ, и҆ сохраню̀ словеса̀ твоѧ҄.

¹⁸Ѿкры́й ѻ҆́чи моѝ, и҆ ѹ҆разѹмѣ́ю чѹдеса̀ ѿ зако́на твоегѡ̀.

¹⁹Пришле́цъ а҆́зъ є҆́смь на землѝ: не скры́й ѿ менє̀ за́пѡвѣди твоѧ҄.

²⁰Возлюбѝ дѹша̀ моѧ̀ возжела́ти сѹдбы҄ твоѧ҄ на всѧ́кое вре́мѧ.

²¹Запрети́лъ є҆сѝ гѡ́рдымъ: про́клѧти ѹ҆клонѧ́ющїисѧ ѿ за́повѣдїй твои́хъ.

²²Ѿимѝ ѿ менє̀ поно́съ {поноше́нїе} и҆ ѹ҆ничиже́нїе, ѩ҆́кѡ свидѣ́нїй твои́хъ взыска́хъ.

²³И҆́бо сѣдо́ша кнѧ҄зи и҆ на мѧ̀ клевета́хѹ, ра́бъ же тво́й глѹмлѧ́шесѧ во ѡ҆правда́нїихъ твои́хъ:

²⁴и҆́бо свидѣ҄нїѧ твоѧ҄ поѹче́нїе моѐ є҆́сть, и҆ совѣ́ти моѝ ѡ҆правда҄нїѧ твоѧ҄.

²⁵Прильпѐ землѝ дѹша̀ моѧ̀: живи́ мѧ по словесѝ твоемѹ̀.

²⁶Пѹти҄ моѧ҄ возвѣсти́хъ, и҆ ѹ҆слы́шалъ мѧ̀ є҆сѝ: наѹчи́ мѧ ѡ҆правда́нїємъ твои҄мъ.

²⁷Пѹ́ть ѡ҆правда́нїй твои́хъ вразѹми́ ми, и҆ поглѹмлю́сѧ въ чѹдесѣ́хъ твои́хъ.

²⁸Воздрема̀ дѹша̀ моѧ̀ ѿ ѹ҆ны́нїѧ: ѹ҆тверди́ мѧ въ словесѣ́хъ твои́хъ.

²⁹Пѹ́ть непра́вды ѿста́ви ѿ менє̀ и҆ зако́номъ твои́мъ поми́лѹй мѧ̀.

³⁰Пѹ́ть и҆́стины и҆зво́лихъ и҆ сѹдбы҄ твоѧ҄ не забы́хъ.

³¹Прилѣпи́хсѧ свидѣ́нїємъ твои҄мъ, гд҇и, не посрамѝ менѐ.

³²Пѹ́ть за́повѣдїй твои́хъ теко́хъ, є҆гда̀ разшири́лъ є҆сѝ се́рдце моѐ.

³³Законоположѝ мнѣ̀, гд҇и, пѹ́ть ѡ҆правда́нїй твои́хъ, и҆ взыщѹ̀ и҆̀ вы́нѹ:

³⁴вразѹми́ мѧ, и҆ и҆спыта́ю зако́нъ тво́й и҆ сохраню̀ и҆̀ всѣ́мъ се́рдцемъ мои́мъ.

³⁵Наста́ви мѧ̀ на стезю̀ за́повѣдїй твои́хъ, ѩ҆́кѡ тѹ́ю восхотѣ́хъ.

³⁶Приклонѝ се́рдце моѐ во свидѣ҄нїѧ твоѧ҄, а҆ не въ лихои́мство.

³⁷Ѿвратѝ ѻ҆́чи моѝ є҆́же не ви́дѣти сѹеты̀: въ пѹтѝ твое́мъ живи́ мѧ.

³⁸Поста́ви рабѹ̀ твоемѹ̀ сло́во твоѐ въ стра́хъ тво́й.

³⁹Ѿимѝ поноше́нїе моѐ, є҆́же непщева́хъ: ѩ҆́кѡ сѹдбы҄ твоѧ҄ бл҃ги.

⁴⁰Сѐ, возжела́хъ за́пѡвѣди твоѧ҄: въ пра́вдѣ твое́й живи́ мѧ.

⁴¹И҆ да прїи́детъ на мѧ̀ мл҇ть твоѧ̀, гд҇и, сп҇нїе твоѐ по словесѝ твоемѹ̀:

⁴²и҆ ѿвѣща́ю поноша́ющымъ мѝ сло́во, ѩ҆́кѡ ѹ҆пова́хъ на словеса̀ твоѧ҄.

⁴³И҆ не ѿимѝ ѿ ѹ҆́стъ мои́хъ словесѐ и҆́стинна до ѕѣла̀, ѩ҆́кѡ на сѹдбы҄ твоѧ҄ ѹ҆пова́хъ:

⁴⁴и҆ сохраню̀ зако́нъ тво́й вы́нѹ, въ вѣ́къ и҆ въ вѣ́къ вѣ́ка.

⁴⁵И҆ хожда́хъ въ широтѣ̀, ѩ҆́кѡ за́пѡвѣди твоѧ҄ взыска́хъ:

⁴⁶и҆ глаго́лахъ ѡ҆ свидѣ́нїихъ твои́хъ пред̾ цари҄ и҆ не стыдѧ́хсѧ:

⁴⁷и҆ поѹча́хсѧ въ за́повѣдехъ твои́хъ, ѩ҆̀же возлюби́хъ ѕѣлѡ̀:

⁴⁸и҆ воздвиго́хъ рѹ́цѣ моѝ къ за́повѣдемъ твои҄мъ, ѩ҆̀же возлюби́хъ, и҆ глѹмлѧ́хсѧ во ѡ҆правда́нїихъ твои́хъ.

⁴⁹Помѧнѝ словеса̀ твоѧ҄ рабѹ̀ твоемѹ̀, и҆́хже ѹ҆пова́нїе да́лъ мѝ є҆сѝ.

⁵⁰То́ мѧ ѹ҆тѣ́ши во смире́нїи мое́мъ, ѩ҆́кѡ сло́во твоѐ живи́ мѧ.

⁵¹Го́рдїи законопрестѹпова́хѹ до ѕѣла̀: ѿ зако́на же твоегѡ̀ не ѹ҆клони́хсѧ.

⁵²Помѧнѹ́хъ сѹдбы҄ твоѧ҄ ѿ вѣ́ка, гд҇и, и҆ ѹ҆тѣ́шихсѧ.

⁵³Печа́ль прїѧ́тъ мѧ̀ ѿ грѣ҄шникъ, ѡ҆ставлѧ́ющихъ зако́нъ тво́й.

⁵⁴Пѣ҄та бѧ́хѹ мнѣ̀ ѡ҆правда҄нїѧ твоѧ҄ на мѣ́стѣ прише́лствїѧ моегѡ̀.

⁵⁵Помѧнѹ́хъ въ нощѝ и҆́мѧ твоѐ, гд҇и, и҆ сохрани́хъ зако́нъ тво́й.

⁵⁶Се́й бы́сть мнѣ̀, ѩ҆́кѡ ѡ҆правда́нїй твои́хъ взыска́хъ.

⁵⁷Ча́сть моѧ̀ є҆сѝ, гд҇и: рѣ́хъ сохрани́ти зако́нъ тво́й.

⁵⁸Помоли́хсѧ лицѹ̀ твоемѹ̀ всѣ́мъ се́рдцемъ мои́мъ: поми́лѹй мѧ̀ по словесѝ твоемѹ̀.

⁵⁹Помы́слихъ пѹти҄ твоѧ҄ и҆ возврати́хъ но́зѣ моѝ во свидѣ҄нїѧ твоѧ҄.

⁶⁰Ѹ҆гото́вихсѧ и҆ не смѹти́хсѧ сохрани́ти за́пѡвѣди твоѧ҄.

⁶¹Ѹ҆́жѧ грѣ҄шникъ ѡ҆бѧза́шасѧ мнѣ̀, и҆ зако́на твоегѡ̀ не забы́хъ.

⁶²Полѹ́нощи воста́хъ и҆сповѣ́датисѧ тебѣ̀ ѡ҆ сѹдба́хъ пра́вды твоеѧ̀.

⁶³Прича́стникъ а҆́зъ є҆́смь всѣ҄мъ боѧ́щымсѧ тебє̀ и҆ хранѧ́щымъ за́пѡвѣди твоѧ҄.

⁶⁴Мл҇ти твоеѧ̀, гд҇и, и҆спо́лнь землѧ̀: ѡ҆правда́нїємъ твои҄мъ наѹчи́ мѧ.

⁶⁵Бл҃гость сотвори́лъ є҆сѝ съ рабо́мъ твои́мъ, гд҇и, по словесѝ твоемѹ̀:

⁶⁶бл҃гости и҆ наказа́нїю и҆ ра́зѹмѹ наѹчи́ мѧ, ѩ҆́кѡ за́повѣдемъ твои҄мъ вѣ́ровахъ.

⁶⁷Пре́жде да́же не смири́тимисѧ, а҆́зъ прегрѣши́хъ: сегѡ̀ ра́ди сло́во твоѐ сохрани́хъ.

⁶⁸Бл҃гъ є҆сѝ ты̀, гд҇и: и҆ бл҃гостїю твое́ю наѹчи́ мѧ ѡ҆правда́нїємъ твои҄мъ.

⁶⁹Ѹ҆мно́жисѧ на мѧ̀ непра́вда го́рдыхъ: а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ҄.

⁷⁰Ѹ҆сыри́сѧ ѩ҆́кѡ млеко̀ се́рдце и҆́хъ: а҆́зъ же зако́нѹ твоемѹ̀ поѹчи́хсѧ.

⁷¹Бл҃го мнѣ̀, ѩ҆́кѡ смири́лъ мѧ̀ є҆сѝ, ѩ҆́кѡ да наѹчѹ́сѧ ѡ҆правда́нїємъ твои҄мъ.

⁷²Бл҃гъ мнѣ̀ зако́нъ ѹ҆́стъ твои́хъ па́че ты́сѧщъ зла́та и҆ сребра̀.

⁷³Рѹ́це твоѝ сотвори́стѣ мѧ̀ и҆ созда́стѣ мѧ̀: вразѹми́ мѧ, и҆ наѹчѹ́сѧ за́повѣдемъ твои҄мъ.

⁷⁴Боѧ́щїисѧ тебє̀ ѹ҆́зрѧтъ мѧ̀ и҆ возвеселѧ́тсѧ, ѩ҆́кѡ на словеса̀ твоѧ҄ ѹ҆пова́хъ.

⁷⁵Разѹмѣ́хъ, гд҇и, ѩ҆́кѡ пра́вда сѹдбы҄ твоѧ҄, и҆ вои́стиннѹ смири́лъ мѧ̀ є҆сѝ.

⁷⁶Бѹ́ди же мл҇ть твоѧ̀, да ѹ҆тѣ́шитъ мѧ̀, по словесѝ твоемѹ̀ рабѹ̀ твоемѹ̀:

⁷⁷да прїи́дѹтъ мнѣ̀ щедрѡ́ты твоѧ҄, и҆ жи́въ бѹ́дѹ, ѩ҆́кѡ зако́нъ тво́й поѹче́нїе моѐ є҆́сть.

⁷⁸Да постыдѧ́тсѧ го́рдїи, ѩ҆́кѡ непра́веднѡ беззако́нноваша на мѧ̀: а҆́зъ же поглѹмлю́сѧ {размышлѧ́ти бѹ́дѹ} въ за́повѣдехъ твои́хъ.

⁷⁹Да ѡ҆братѧ́тъ мѧ̀ боѧ́щїисѧ тебє̀ и҆ вѣ́дѧщїи свидѣ҄нїѧ твоѧ҄.

⁸⁰Бѹ́ди се́рдце моѐ непоро́чно во ѡ҆правда́нїихъ твои́хъ, ѩ҆́кѡ да не постыжѹ́сѧ.

⁸¹И҆зчеза́етъ во сп҇нїе твоѐ дѹша̀ моѧ̀, на словеса̀ твоѧ҄ ѹ҆пова́хъ:

⁸²и҆зчезо́ша ѻ҆́чи моѝ въ сло́во твоѐ, глаго́люще: когда̀ ѹ҆тѣ́шиши мѧ̀;

⁸³занѐ бы́хъ ѩ҆́кѡ мѣ́хъ на сла́нѣ: ѡ҆правда́нїй твои́хъ не забы́хъ.

⁸⁴Коли́кѡ є҆́сть дні́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сѹ́дъ;

⁸⁵Повѣ́даша мнѣ̀ законопрестѹ҄пницы глѹмлє́нїѧ, но не ѩ҆́кѡ зако́нъ тво́й, гд҇и.

⁸⁶Всѧ҄ за́пѡвѣди твоѧ҄ и҆́стина: непра́веднѡ погна́ша мѧ̀, помози́ ми.

⁸⁷Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдїй твои́хъ.

⁸⁸По мл҇ти твое́й живи́ мѧ, и҆ сохраню̀ свидѣ҄нїѧ ѹ҆́стъ твои́хъ.

⁸⁹Во вѣ́къ, гд҇и, сло́во твоѐ пребыва́етъ на нб҃сѝ.

⁹⁰Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ.

⁹¹Ѹ҆чине́нїемъ твои́мъ пребыва́етъ де́нь: ѩ҆́кѡ всѧ́чєскаѧ рабѡ́тна тебѣ̀.

⁹²ѩ҆́кѡ а҆́ще бы не зако́нъ тво́й поѹче́нїе моѐ бы́лъ, тогда̀ ѹ҆́бѡ поги́блъ бы́хъ во смире́нїи мое́мъ:

⁹³во вѣ́къ не забѹ́дѹ ѡ҆правда́нїй твои́хъ, ѩ҆́кѡ въ ни́хъ ѡ҆живи́лъ мѧ̀ є҆сѝ.

⁹⁴Тво́й є҆́смь а҆́зъ, сп҃си́ мѧ: ѩ҆́кѡ ѡ҆правда́нїй твои́хъ взыска́хъ.

⁹⁵Менѐ жда́ша грѣ҄шницы погѹби́ти мѧ̀: свидѣ҄нїѧ твоѧ҄ разѹмѣ́хъ.

⁹⁶Всѧ́кїѧ кончи́ны ви́дѣхъ коне́цъ: широка̀ за́повѣдь твоѧ̀ ѕѣлѡ̀.

⁹⁷Ко́ль возлюби́хъ зако́нъ тво́й, гд҇и: ве́сь де́нь поѹче́нїе моѐ є҆́сть.

⁹⁸Па́че вра҄гъ мои́хъ ѹ҆мѹдри́лъ мѧ̀ є҆сѝ за́повѣдїю твое́ю, ѩ҆́кѡ въ вѣ́къ моѧ̀ є҆́сть.

⁹⁹Па́че всѣ́хъ ѹ҆ча́щихъ мѧ̀ разѹмѣ́хъ, ѩ҆́кѡ свидѣ҄нїѧ твоѧ҄ поѹче́нїе моѐ є҆́сть.

¹⁰⁰Па́че ста́рєцъ разѹмѣ́хъ, ѩ҆́кѡ за́пѡвѣди твоѧ҄ взыска́хъ.

¹⁰¹Ѿ всѧ́кагѡ пѹтѝ лѹка́ва возбрани́хъ нога́мъ мои҄мъ, ѩ҆́кѡ да сохраню̀ словеса̀ твоѧ҄:

¹⁰²ѿ сѹде́бъ твои́хъ не ѹ҆клони́хсѧ, ѩ҆́кѡ ты̀ законоположи́лъ мѝ є҆сѝ.

¹⁰³Ко́ль сладка҄ горта́ни моемѹ̀ словеса̀ твоѧ҄: па́че ме́да ѹ҆стѡ́мъ мои҄мъ.

¹⁰⁴Ѿ за́повѣдїй твои́хъ разѹмѣ́хъ: сегѡ̀ ра́ди возненави́дѣхъ всѧ́къ пѹ́ть непра́вды.

¹⁰⁵Свѣти́лникъ нога́ма мои́ма зако́нъ тво́й, и҆ свѣ́тъ стезѧ́мъ мои҄мъ.

¹⁰⁶Клѧ́хсѧ и҆ поста́вихъ сохрани́ти сѹдбы҄ пра́вды твоеѧ̀.

¹⁰⁷Смири́хсѧ до ѕѣла̀: гд҇и, живи́ мѧ по словесѝ твоемѹ̀.

¹⁰⁸Вѡ́льнаѧ ѹ҆́стъ мои́хъ бл҃говоли́ же, гд҇и, и҆ сѹдба́мъ твои҄мъ наѹчи́ мѧ.

¹⁰⁹Дѹша̀ моѧ̀ въ рѹкѹ̀ твоє́ю {А҆леѯ.: моє́ю} вы́нѹ, и҆ зако́на твоегѡ̀ не забы́хъ.

¹¹⁰Положи́ша грѣ҄шницы сѣ́ть мнѣ̀: и҆ ѿ за́повѣдїй твои́хъ не заблѹди́хъ.

¹¹¹Наслѣ́довахъ свидѣ҄нїѧ твоѧ҄ во вѣ́къ, ѩ҆́кѡ ра́дованїе се́рдца моегѡ̀ сѹ́ть:

¹¹²приклони́хъ се́рдце моѐ сотвори́ти ѡ҆правда҄нїѧ твоѧ҄ въ вѣ́къ за воздаѧ́нїе.

¹¹³Законопрестѹ҄пныѧ возненави́дѣхъ, зако́нъ же тво́й возлюби́хъ.

¹¹⁴Помо́щникъ мо́й и҆ застѹ́пникъ мо́й є҆сѝ ты̀: на словеса̀ твоѧ҄ ѹ҆пова́хъ.

¹¹⁵Ѹ҆клони́тесѧ ѿ менє̀, лѹка́внѹющїи, и҆ и҆спыта́ю за́пѡвѣди бг҃а моегѡ̀.

¹¹⁶Застѹпи́ мѧ по словесѝ твоемѹ̀, и҆ жи́въ бѹ́дѹ: и҆ не посрамѝ менѐ ѿ ча́ѧнїѧ моегѡ̀:

¹¹⁷помози́ ми, и҆ сп҃сѹ́сѧ, и҆ поѹчѹ́сѧ во ѡ҆правда́нїихъ твои́хъ вы́нѹ.

¹¹⁸Ѹ҆ничижи́лъ є҆сѝ всѧ҄ ѿстѹпа́ющыѧ ѿ ѡ҆правда́нїй твои́хъ: ѩ҆́кѡ непра́ведно помышле́нїе и҆́хъ.

¹¹⁹Престѹпа́ющыѧ непщева́хъ всѧ҄ грѣ҄шныѧ землѝ: сегѡ̀ ра́ди возлюби́хъ свидѣ҄нїѧ твоѧ҄.

¹²⁰Пригвоздѝ стра́хѹ твоемѹ̀ плѡ́ти моѧ҄: ѿ сѹде́бъ бо твои́хъ ѹ҆боѧ́хсѧ.

¹²¹Сотвори́хъ сѹ́дъ и҆ пра́вдѹ: не преда́ждь менѐ ѡ҆би́дѧщымъ мѧ̀.

¹²²Воспрїимѝ раба̀ твоего̀ во бл҃го, да не ѡ҆клевета́ютъ менѐ го́рдїи.

¹²³Ѻ҆́чи моѝ и҆зчезо́стѣ во сп҇нїе твоѐ и҆ въ сло́во пра́вды твоеѧ̀:

¹²⁴сотворѝ съ рабо́мъ твои́мъ по мл҇ти твое́й, и҆ ѡ҆правда́нїємъ твои҄мъ наѹчи́ мѧ.

¹²⁵Ра́бъ тво́й є҆́смь а҆́зъ: вразѹми́ мѧ, и҆ ѹ҆вѣ́мъ свидѣ҄нїѧ твоѧ҄.

¹²⁶Вре́мѧ сотвори́ти гд҇еви: разори́ша зако́нъ тво́й.

¹²⁷Сегѡ̀ ра́ди возлюби́хъ за́пѡвѣди твоѧ҄ па́че зла́та и҆ топа́зїа.

¹²⁸Сегѡ̀ ра́ди ко всѣ҄мъ за́повѣдемъ твои҄мъ направлѧ́хсѧ, всѧ́къ пѹ́ть непра́вды возненави́дѣхъ.

¹²⁹Ди҄вна свидѣ҄нїѧ твоѧ҄: сегѡ̀ ра́ди и҆спыта̀ ѧ҆̀ дѹша̀ моѧ̀.

¹³⁰ѩ҆вле́нїе слове́съ твои́хъ просвѣща́етъ и҆ вразѹмлѧ́етъ младе́нцы.

¹³¹Ѹ҆ста̀ моѧ҄ ѿверзо́хъ и҆ привлеко́хъ дѹ́хъ, ѩ҆́кѡ за́повѣдїй твои́хъ жела́хъ.

¹³²При́зри на мѧ̀ и҆ поми́лѹй мѧ̀, по сѹдѹ̀ лю́бѧщихъ и҆́мѧ твоѐ.

¹³³Стѡпы̀ моѧ҄ напра́ви по словесѝ твоемѹ̀, и҆ да не ѡ҆блада́етъ мно́ю всѧ́кое беззако́нїе:

¹³⁴и҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ҄.

¹³⁵Лицѐ твоѐ просвѣтѝ на раба̀ твоего̀ и҆ наѹчи́ мѧ ѡ҆правда́нїємъ твои҄мъ.

¹³⁶И҆схѡ́дища водна҄ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀.

¹³⁷Првднъ є҆сѝ, гд҇и, и҆ пра́ви сѹдѝ твоѝ:

¹³⁸заповѣ́далъ є҆сѝ пра́вдѹ свидѣ҄нїѧ твоѧ҄, и҆ и҆́стинѹ ѕѣлѡ̀.

¹³⁹И҆ста́ѧла мѧ̀ є҆́сть ре́вность твоѧ̀: ѩ҆́кѡ забы́ша словеса̀ твоѧ҄ вразѝ моѝ.

¹⁴⁰Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀.

¹⁴¹Ю҆нѣ́йшїй а҆́зъ є҆́смь и҆ ѹ҆ничиже́нъ: ѡ҆правда́нїй твои́хъ не забы́хъ.

¹⁴²Пра́вда твоѧ̀ пра́вда во вѣ́къ, и҆ зако́нъ тво́й и҆́стина.

¹⁴³Скѡ́рби и҆ нѹ́жди ѡ҆брѣто́ша мѧ̀: за́пѡвѣди твоѧ҄ поѹче́нїе моѐ.

¹⁴⁴Пра́вда свидѣ҄нїѧ твоѧ҄ въ вѣ́къ: вразѹми́ мѧ, и҆ жи́въ бѹ́дѹ.

¹⁴⁵Воззва́хъ всѣ́мъ се́рдцемъ мои́мъ, ѹ҆слы́ши мѧ̀, гд҇и: ѡ҆правда҄нїѧ твоѧ҄ взыщѹ̀.

¹⁴⁶Воззва́хъ тѝ, сп҃си́ мѧ, и҆ сохраню̀ свидѣ҄нїѧ твоѧ҄.

¹⁴⁷Предвари́хъ въ безго́дїи и҆ воззва́хъ: на словеса̀ твоѧ҄ ѹ҆пова́хъ.

¹⁴⁸Предвари́стѣ ѻ҆́чи моѝ ко ѹ҆́трѹ, поѹчи́тисѧ словесє́мъ твои҄мъ.

¹⁴⁹Гла́съ мо́й ѹ҆слы́ши, гд҇и, по мл҇ти твое́й: по сѹдбѣ̀ твое́й живи́ мѧ.

¹⁵⁰Прибли́жишасѧ гонѧ́щїи мѧ̀ беззако́нїемъ: ѿ зако́на же твоегѡ̀ ѹ҆дали́шасѧ.

¹⁵¹Бли́з̾ є҆сѝ ты̀, гд҇и, и҆ всѝ пѹтїѐ твоѝ и҆́стина.

¹⁵²И҆спе́рва позна́хъ ѿ свидѣ́нїй твои́хъ, ѩ҆́кѡ въ вѣ́къ ѡ҆снова́лъ ѧ҆̀ є҆сѝ.

¹⁵³Ви́ждь смире́нїе моѐ и҆ и҆зми́ мѧ: ѩ҆́кѡ зако́на твоегѡ̀ не забы́хъ.

¹⁵⁴Сѹдѝ сѹ́дъ мо́й и҆ и҆зба́ви мѧ̀: словесѐ ра́ди твоегѡ̀ живи́ мѧ.

¹⁵⁵Дале́че ѿ грѣ҄шникъ сп҇нїе, ѩ҆́кѡ ѡ҆правда́нїй твои́хъ не взыска́ша.

¹⁵⁶Щедрѡ́ты твоѧ҄ мнѡ́ги, гд҇и: по сѹдбѣ̀ твое́й живи́ мѧ.

¹⁵⁷Мно́зи и҆згонѧ́щїи мѧ̀ и҆ стѹжа́ющїи мѝ: ѿ свидѣ́нїй твои́хъ не ѹ҆клони́хсѧ.

¹⁵⁸Ви́дѣхъ неразѹмѣва́ющыѧ и҆ и҆ста́ѧхъ: ѩ҆́кѡ слове́съ твои́хъ не сохрани́ша.

¹⁵⁹Ви́ждь, ѩ҆́кѡ за́пѡвѣди твоѧ҄ возлюби́хъ: гд҇и, по мл҇ти твое́й живи́ мѧ.

¹⁶⁰Нача́ло слове́съ твои́хъ и҆́стина, и҆ во вѣ́къ всѧ҄ сѹдбы҄ пра́вды твоеѧ̀.

¹⁶¹Кнѧ҄зи погна́ша мѧ̀ тѹ́не: и҆ ѿ слове́съ твои́хъ ѹ҆боѧ́сѧ се́рдце моѐ.

¹⁶²Возра́дѹюсѧ а҆́зъ ѡ҆ словесѣ́хъ твои́хъ, ѩ҆́кѡ ѡ҆брѣта́ѧй коры́сть мно́гѹ.

¹⁶³Непра́вдѹ возненави́дѣхъ и҆ ѡ҆мерзи́хъ: зако́нъ же тво́й возлюби́хъ.

¹⁶⁴Седмери́цею дне́мъ хвали́хъ тѧ̀ ѡ҆ сѹдба́хъ пра́вды твоеѧ̀.

¹⁶⁵Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.

¹⁶⁶Ча́ѧхъ сп҇нїѧ твоегѡ̀, гд҇и, и҆ за́пѡвѣди твоѧ҄ возлюби́хъ.

¹⁶⁷Сохранѝ дѹша̀ моѧ̀ свидѣ҄нїѧ твоѧ҄ и҆ возлюбѝ ѧ҆̀ ѕѣлѡ̀.

¹⁶⁸Сохрани́хъ за́пѡвѣди твоѧ҄ и҆ свидѣ҄нїѧ твоѧ҄, ѩ҆́кѡ всѝ пѹтїѐ моѝ пред̾ тобо́ю, гд҇и.

¹⁶⁹Да прибли́житсѧ моле́нїе моѐ пред̾ тѧ̀, гд҇и: по словесѝ твоемѹ̀ вразѹми́ мѧ.

¹⁷⁰Да вни́детъ проше́нїе моѐ пред̾ тѧ̀: гд҇и, по словесѝ твоемѹ̀ и҆зба́ви мѧ̀.

¹⁷¹Ѿры́гнѹтъ ѹ҆стнѣ̀ моѝ пѣ́нїе, є҆гда̀ наѹчи́ши мѧ̀ ѡ҆правда́нїємъ твои҄мъ.

¹⁷²Провѣща́етъ ѧ҆зы́къ мо́й словеса̀ твоѧ҄, ѩ҆́кѡ всѧ҄ за́пѡвѣди твоѧ҄ пра́вда.

¹⁷³Да бѹ́детъ рѹка̀ твоѧ̀ є҆́же сп҇ти́ мѧ, ѩ҆́кѡ за́пѡвѣди твоѧ҄ и҆зво́лихъ.

¹⁷⁴Возжела́хъ сп҇нїе твоѐ, гд҇и, и҆ зако́нъ тво́й поѹче́нїе моѐ є҆́сть.

¹⁷⁵Жива̀ бѹ́детъ дѹша̀ моѧ̀ и҆ восхва́литъ тѧ̀: и҆ сѹдбы҄ твоѧ҄ помо́гѹтъ мнѣ̀.

¹⁷⁶Заблѹди́хъ ѩ҆́кѡ ѻ҆вча̀ поги́бшее: взыщѝ раба̀ твоего̀, ѩ҆́кѡ за́повѣдїй твои́хъ не забы́хъ.