Read Библия Церковнославянская Ѱалти́рь 13 Bible Online

Ѱалти́рь 13 - Библия Церковнославянская bible

Ѱалти́рь 13

¹Речѐ безѹ́менъ въ се́рдцы свое́мъ: нѣ́сть бг҃ъ. Растлѣ́ша и҆ ѡ҆мерзи́шасѧ въ начина́нїихъ: нѣ́сть творѧ́й бл҃госты́ню.

²Гд҇ь съ нб҃сѐ прини́че на сы́ны человѣ́чєскїѧ, ви́дѣти, а҆́ще є҆́сть разѹмѣва́ѧй, и҆лѝ взыска́ѧй бг҃а.

³Всѝ ѹ҆клони́шасѧ, вкѹ́пѣ неключи́ми бы́ша: нѣ́сть творѧ́й бл҃госты́ню, нѣ́сть до є҆ди́нагѡ.

⁴Ни лѝ ѹ҆разѹмѣ́ютъ всѝ дѣ́лающїи беззако́нїе, снѣда́ющїи лю́ди моѧ҄ въ снѣ́дь хлѣ́ба; гд҇а не призва́ша.

⁵Та́мѡ ѹ҆боѧ́шасѧ стра́ха, и҆дѣ́же не бѣ̀ стра́хъ: ѩ҆́кѡ гд҇ь въ ро́дѣ првдныхъ.

⁶Совѣ́тъ ни́щагѡ посрами́сте: гд҇ь же ѹ҆пова́нїе є҆гѡ̀ є҆́сть.

⁷Кто̀ да́стъ ѿ сїѡ́на сп҇нїе ї҆и҃лево;

⁸Внегда̀ возврати́тъ гд҇ь плѣне́нїе люді́й свои́хъ, возра́дѹетсѧ ї҆а́кѡвъ, и҆ возвесели́тсѧ ї҆и҃ль.