Read Библия Церковнославянская Ѱалти́рь 131 Bible Online

Ѱалти́рь 131 - Библия Церковнославянская bible

Ѱалти́рь 131

¹ Помѧнѝ, гд҇и, дв҃да и҆ всю̀ кро́тость є҆гѡ̀:

²ѩ҆́кѡ клѧ́тсѧ гд҇еви, ѡ҆бѣща́сѧ бг҃ѹ ї҆а́кѡвлю:

³а҆́ще вни́дѹ въ селе́нїе до́мѹ моегѡ̀, и҆лѝ взы́дѹ на ѻ҆́дръ посте́ли моеѧ̀:

⁴а҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма:

⁵до́ндеже ѡ҆брѧ́щѹ мѣ́сто гд҇еви, селе́нїе бг҃ѹ ї҆а́кѡвлю.

⁶Сѐ, слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дѹбра́вы:

⁷вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀.

⁸Воскр҇нѝ, гд҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀.

⁹Сщ҃е́нницы твоѝ ѡ҆блекѹ́тсѧ пра́вдою, и҆ прпдбнїи твоѝ возра́дѹютсѧ.

¹⁰Дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀.

¹¹Клѧ́тсѧ гд҇ь дв҃дѹ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждѹ̀ на престо́лѣ твое́мъ.

¹²А҆́ще сохранѧ́тъ сы́нове твоѝ завѣ́тъ мо́й и҆ свидѣ҄нїѧ моѧ҄ сїѧ҄, и҆̀мже наѹчѹ̀ ѧ҆̀, и҆ сы́нове и҆́хъ до вѣ́ка сѧ́дѹтъ на престо́лѣ твое́мъ.

¹³ѩ҆́кѡ и҆збра̀ гд҇ь сїѡ́на, и҆зво́ли и҆̀ въ жили́ще себѣ̀.

¹⁴Се́й поко́й мо́й во вѣ́къ вѣ́ка, здѣ̀ вселю́сѧ, ѩ҆́кѡ и҆зво́лихъ и҆̀.

¹⁵Лови́твѹ є҆гѡ̀ блг҇влѧ́ѧй блг҇влю̀, ни́щыѧ є҆гѡ̀ насы́щѹ хлѣ҄бы:

¹⁶сщ҃е́нники є҆гѡ̀ ѡ҆блекѹ̀ во сп҇нїе, и҆ прпдбнїи є҆гѡ̀ ра́достїю возра́дѹютсѧ.

¹⁷Та́мѡ возращѹ̀ ро́гъ дв҃дови, ѹ҆гото́вахъ свѣти́лникъ пома́занномѹ моемѹ̀.

¹⁸Врагѝ є҆гѡ̀ ѡ҆блекѹ̀ стѹдо́мъ, на не́мъ же процвѣте́тъ ст҃ы́нѧ моѧ̀.