Read Библия Церковнославянская Ѱалти́рь 134 Bible Online

Ѱалти́рь 134 - Библия Церковнославянская bible

Ѱалти́рь 134

¹ Хвали́те и҆́мѧ гд҇не, хвали́те, рабѝ гд҇а,

²стоѧ́щїи во хра́мѣ гд҇ни, во дво́рѣхъ до́мѹ бг҃а на́шегѡ.

³Хвали́те гд҇а, ѩ҆́кѡ бла́гъ гд҇ь: по́йте и҆́мени є҆гѡ̀, ѩ҆́кѡ добро̀:

⁴ѩ҆́кѡ ї҆а́кѡва и҆збра̀ себѣ̀ гд҇ь, ї҆и҃лѧ въ достоѧ́нїе себѣ̀:

⁵ѩ҆́кѡ а҆́зъ позна́хъ, ѩ҆́кѡ ве́лїй гд҇ь, и҆ гд҇ь на́шъ над̾ всѣ́ми бѡ́ги:

⁶всѧ҄, є҆ли҄ка восхотѣ̀ гд҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ.

⁷Возводѧ̀ ѡ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ.

⁸И҆́же поразѝ пе́рвенцы є҆гѵ́пєтскїѧ ѿ человѣ́ка до скота̀:

⁹посла̀ зна́мєнїѧ и҆ чѹдеса̀ посредѣ̀ тебє̀, є҆гѵ́пте, на фараѡ́на и҆ на всѧ҄ рабы҄ є҆гѡ̀.

¹⁰И҆́же поразѝ ѩ҆зы́ки мнѡ́ги и҆ и҆збѝ цари҄ крѣ҄пки:

¹¹сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ҄ ца҄рствїѧ ханаа҄нска:

¹²и҆ дадѐ зе́млю и҆́хъ достоѧ́нїе, достоѧ́нїе ї҆и҃лю лю́демъ свои҄мъ.

¹³Гд҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ:

¹⁴ѩ҆́кѡ сѹди́ти и҆́мать гд҇ь лю́демъ свои҄мъ, и҆ ѡ҆ рабѣ́хъ свои́хъ ѹ҆мо́литсѧ.

¹⁵Ідѡли ѩ҆зы҄къ сребро̀ и҆ зла́то, дѣла̀ рѹ́къ человѣ́ческихъ:

¹⁶ѹ҆ста̀ и҆́мѹтъ, и҆ не возглаго́лютъ: ѻ҆́чи и҆́мѹтъ, и҆ не ѹ҆́зрѧтъ:

¹⁷ѹ҆́ши и҆́мѹтъ, и҆ не ѹ҆слы́шатъ: ниже́ бо є҆́сть дѹ́хъ во ѹ҆стѣ́хъ и҆́хъ.

¹⁸Подо́бни и҆̀мъ да бѹ́дѹтъ творѧ́щїи ѧ҆̀ и҆ всѝ надѣ́ющїисѧ на нѧ̀.

¹⁹До́ме ї҆и҃левъ, благослови́те гд҇а: до́ме а҆арѡ́нь, благослови́те гд҇а: до́ме леѵі́инъ, благослови́те гд҇а:

²⁰боѧ́щїисѧ гд҇а, благослови́те гд҇а.

²¹Блг҇ве́нъ гд҇ь ѿ сїѡ́на, живы́й во ї҆ер҇ли́мѣ.