Read Библия Церковнославянская Ѱалти́рь 135 Bible Online

Ѱалти́рь 135 - Библия Церковнославянская bible

Ѱалти́рь 135

¹ И҆сповѣ́дайтесѧ гд҇еви, ѩ҆́кѡ бл҃гъ: ѩ҆́кѡ въ вѣ́къ мл҇ть є҆гѡ̀.

²И҆сповѣ́дайтесѧ бг҃ѹ богѡ́въ: ѩ҆́кѡ въ вѣ́къ мл҇ть є҆гѡ̀.

³И҆сповѣ́дайтесѧ гд҇еви господе́й: ѩ҆́кѡ въ вѣ́къ мл҇ть є҆гѡ̀.

⁴Сотво́ршемѹ чѹдеса̀ вє́лїѧ є҆ди́номѹ: ѩ҆́кѡ въ вѣ́къ мл҇ть є҆гѡ̀.

⁵Сотво́ршемѹ небеса̀ ра́зѹмомъ: ѩ҆́кѡ въ вѣ́къ мл҇ть є҆гѡ̀.

⁶Ѹ҆тверди́вшемѹ зе́млю на вода́хъ: ѩ҆́кѡ въ вѣ́къ мл҇ть є҆гѡ̀.

⁷Сотво́ршемѹ свѣти҄ла вє́лїѧ є҆ди́номѹ: ѩ҆́кѡ въ вѣ́къ мл҇ть є҆гѡ̀:

⁸со́лнце во ѡ҆́бласть днѐ: ѩ҆́кѡ въ вѣ́къ мл҇ть є҆гѡ̀:

⁹лѹнѹ̀ и҆ ѕвѣ́зды во ѡ҆́бласть но́щи: ѩ҆́кѡ въ вѣ́къ мл҇ть є҆гѡ̀.

¹⁰Порази́вшемѹ є҆гѵ́пта съ пе́рвєнцы є҆гѡ̀: ѩ҆́кѡ въ вѣ́къ мл҇ть є҆гѡ̀:

¹¹и҆ и҆зве́дшемѹ ї҆и҃лѧ ѿ среды̀ и҆́хъ: ѩ҆́кѡ въ вѣ́къ мл҇ть є҆гѡ̀:

¹²рѹко́ю крѣ́пкою и҆ мы́шцею высо́кою: ѩ҆́кѡ въ вѣ́къ мл҇ть є҆гѡ̀.

¹³Раздѣ́льшемѹ чермно́е мо́ре въ раздѣлє́нїѧ: ѩ҆́кѡ въ вѣ́къ мл҇ть є҆гѡ̀:

¹⁴и҆ прове́дшемѹ ї҆и҃лѧ посредѣ̀ є҆гѡ̀: ѩ҆́кѡ въ вѣ́къ мл҇ть є҆гѡ̀:

¹⁵и҆ и҆стрѧ́сшемѹ фараѡ́на и҆ си́лѹ є҆гѡ̀ въ мо́ре чермно́е: ѩ҆́кѡ въ вѣ́къ мл҇ть є҆гѡ̀.

¹⁶Прове́дшемѹ лю́ди своѧ҄ въ пѹсты́ни: ѩ҆́кѡ въ вѣ́къ мл҇ть є҆гѡ̀.

¹⁷Порази́вшемѹ цари҄ вє́лїѧ: ѩ҆́кѡ въ вѣ́къ мл҇ть є҆гѡ̀.

¹⁸И҆ ѹ҆би́вшемѹ цари҄ крѣ҄пкїѧ: ѩ҆́кѡ въ вѣ́къ мл҇ть є҆гѡ̀:

¹⁹сиѡ́на царѧ̀ а҆морре́йска: ѩ҆́кѡ въ вѣ́къ мл҇ть є҆гѡ̀:

²⁰и҆ ѡ҆́га царѧ̀ васа́нска: ѩ҆́кѡ въ вѣ́къ мл҇ть є҆гѡ̀.

²¹И҆ да́вшемѹ зе́млю и҆́хъ достоѧ́нїе: ѩ҆́кѡ въ вѣ́къ мл҇ть є҆гѡ̀:

²²достоѧ́нїе ї҆и҃лю рабѹ̀ своемѹ̀: ѩ҆́кѡ въ вѣ́къ мл҇ть є҆гѡ̀.

²³ѩ҆́кѡ во смире́нїи на́шемъ помѧнѹ́ ны гд҇ь: ѩ҆́кѡ въ вѣ́къ мл҇ть є҆гѡ̀.

²⁴И҆ и҆зба́вилъ ны̀ є҆́сть ѿ врагѡ́въ на́шихъ: ѩ҆́кѡ въ вѣ́къ мл҇ть є҆гѡ̀:

²⁵даѧ́й пи́щѹ всѧ́кой пло́ти: ѩ҆́кѡ въ вѣ́къ мл҇ть є҆гѡ̀.

²⁶И҆сповѣ́дайтесѧ бг҃ѹ нб҇номѹ: ѩ҆́кѡ въ вѣ́къ мл҇ть є҆гѡ̀.