Read Библия Церковнославянская Ѱалти́рь 136 Bible Online

Ѱалти́рь 136 - Библия Церковнославянская bible

Ѱалти́рь 136

¹ На рѣка́хъ вавѷлѡ́нскихъ, та́мѡ сѣдо́хомъ и҆ пла́кахомъ, внегда̀ помѧнѹ́ти на́мъ сїѡ́на:

²на ве́рбїихъ посредѣ̀ є҆гѡ̀ ѡ҆бѣ́сихомъ ѻ҆рга́ны на́шѧ.

³ѩ҆́кѡ та́мѡ вопроси́ша ны̀ плѣ́ншїи на́съ ѡ҆ словесѣ́хъ пѣ́сней, и҆ ве́дшїи на́съ ѡ҆ пѣ́нїи: воспо́йте на́мъ ѿ пѣ́сней сїѡ́нскихъ.

⁴Ка́кѡ воспое́мъ пѣ́снь гд҇ню на землѝ чѹжде́й;

⁵А҆́ще забѹ́дѹ тебѐ, ї҆ер҇ли́ме, забве́на бѹ́ди десни́ца моѧ̀.

⁶Прильпнѝ ѧ҆зы́къ мо́й горта́ни моемѹ̀, а҆́ще не помѧнѹ̀ тебє̀, а҆́ще не предложѹ̀ ї҆ер҇ли́ма, ѩ҆́кѡ въ нача́лѣ весе́лїѧ моегѡ̀.

⁷Помѧнѝ, гд҇и, сы́ны є҆дѡ҄мскїѧ въ де́нь ї҆ер҇ли́мль глаго́лющыѧ: и҆стоща́йте, и҆стоща́йте до ѡ҆снова́нїй є҆гѡ̀.

⁸Дщѝ вавѷлѡ́нѧ ѡ҆каѧ́ннаѧ, бл҃же́нъ, и҆́же возда́стъ тебѣ̀ воздаѧ́нїе твоѐ, є҆́же воздала̀ є҆сѝ на́мъ:

⁹бл҃же́нъ, и҆́же и҆́метъ и҆ разбїе́тъ младе́нцы твоѧ҄ ѡ҆ ка́мень.