Read Библия Церковнославянская Ѱалти́рь 137 Bible Online

Ѱалти́рь 137 - Библия Церковнославянская bible

Ѱалти́рь 137

¹ И҆сповѣ́мсѧ тебѣ̀, гд҇и, всѣ́мъ се́рдцемъ мои́мъ, и҆ пред̾ а҆́гг҃лы воспою̀ тебѣ̀, ѩ҆́кѡ ѹ҆слы́шалъ є҆сѝ всѧ҄ глаго́лы ѹ҆́стъ мои́хъ:

²поклоню́сѧ ко хра́мѹ ст҃о́мѹ твоемѹ̀ и҆ и҆сповѣ́мсѧ и҆́мени твоемѹ̀ ѡ҆ мл҇ти твое́й и҆ и҆́стинѣ твое́й, ѩ҆́кѡ возвели́чилъ є҆сѝ над̾ всѣ́мъ и҆́мѧ твоѐ ст҃о́е.

³Въ ѻ҆́ньже а҆́ще де́нь призовѹ́ тѧ, ско́рѡ ѹ҆слы́ши мѧ̀: ѹ҆мно́жиши мѧ̀ въ дѹшѝ мое́й си́лою твое́ю.

⁴Да и҆сповѣ́дѧтсѧ тебѣ̀, гд҇и, всѝ ца́рїе зе́мстїи, ѩ҆́кѡ ѹ҆слы́шаша всѧ҄ гл҃го́лы ѹ҆́стъ твои́хъ:

⁵и҆ да воспою́тъ въ пѹте́хъ гд҇нихъ, ѩ҆́кѡ ве́лїѧ сла́ва гд҇нѧ:

⁶ѩ҆́кѡ высо́къ гд҇ь, и҆ смирє́нныѧ призира́етъ, и҆ высѡ́каѧ и҆здале́ча вѣ́сть.

⁷А҆́ще пойдѹ̀ посредѣ̀ ско́рби, живи́ши мѧ̀: на гнѣ́въ вра҄гъ мои́хъ просте́рлъ є҆сѝ рѹ́кѹ твою̀, и҆ сп҃се́ мѧ десни́ца твоѧ̀.

⁸Гд҇ь возда́стъ за мѧ̀: гд҇и, мл҇ть твоѧ̀ во вѣ́къ: дѣ́лъ рѹкѹ̀ твоє́ю не пре́зри.