Read Библия Церковнославянская Ѱалти́рь 139 Bible Online

Ѱалти́рь 139 - Библия Церковнославянская bible

Ѱалти́рь 139

¹ И҆зми́ мѧ, гд҇и, ѿ человѣ́ка лѹка́ва, ѿ мѹ́жа непра́ведна и҆зба́ви мѧ̀:

²и҆̀же помы́слиша непра́вдѹ въ се́рдцы, ве́сь де́нь ѡ҆полча́хѹ бра҄ни:

³и҆з̾ѡстри́ша ѧ҆зы́къ сво́й ѩ҆́кѡ ѕмїи́нъ: ѩ҆́дъ а҆́спїдовъ под̾ ѹ҆стна́ми и҆́хъ.

⁴Сохрани́ мѧ, гд҇и, и҆з̾ рѹкѝ грѣ́шничи, ѿ человѣ҄къ непра́ведныхъ и҆зми́ мѧ, и҆̀же помы́слиша запѧ́ти стѡпы̀ моѧ҄.

⁵Скры́ша го́рдїи сѣ́ть мнѣ̀ и҆ ѹ҆́жы, препѧ́ша сѣ́ть нога́ма мои́ма:

⁶при стезѝ собла́зны положи́ша мѝ.

⁷Рѣ́хъ гд҇еви: бг҃ъ мо́й є҆сѝ ты̀, внѹшѝ, гд҇и, гла́съ моле́нїѧ моегѡ̀.

⁸Гд҇и, гд҇и, си́ло сп҇нїѧ моегѡ̀, ѡ҆сѣни́лъ є҆сѝ над̾ главо́ю мое́ю въ де́нь бра́ни.

⁹Не преда́ждь менѐ, гд҇и, ѿ жела́нїѧ моегѡ̀ грѣ́шникѹ: помы́слиша на мѧ̀, не ѡ҆ста́ви менѐ, да не когда̀ вознесѹ́тсѧ.

¹⁰Глава̀ ѡ҆крѹже́нїѧ и҆́хъ, трѹ́дъ ѹ҆сте́нъ и҆́хъ покры́етъ ѧ҆̀.

¹¹Падѹ́тъ на ни́хъ ѹ҆́глїѧ ѻ҆́гнєннаѧ, низложи́ши ѧ҆̀ во страсте́хъ, и҆ не постоѧ́тъ.

¹²Мѹ́жъ ѧ҆зы́ченъ не и҆спра́витсѧ на землѝ: мѹ́жа непра́ведна ѕла҄ѧ ѹ҆ловѧ́тъ во и҆стлѣ́нїе.

¹³Позна́хъ, ѩ҆́кѡ сотвори́тъ гд҇ь сѹ́дъ ни́щымъ и҆ ме́сть ѹ҆бѡ́гимъ.

¹⁴Ѻ҆ба́че првднїи и҆сповѣ́дѧтсѧ и҆́мени твоемѹ̀, и҆ вселѧ́тсѧ пра́вїи съ лице́мъ твои́мъ.