Read Библия Церковнославянская Ѱалти́рь 142 Bible Online

Ѱалти́рь 142 - Библия Церковнославянская bible

Ѱалти́рь 142

¹ Гд҇и, ѹ҆слы́ши моли́твѹ мою̀, внѹшѝ моле́нїе моѐ во и҆́стинѣ твое́й, ѹ҆слы́ши мѧ̀ въ пра́вдѣ твое́й:

²и҆ не вни́ди въ сѹ́дъ съ рабо́мъ твои́мъ, ѩ҆́кѡ не ѡ҆правди́тсѧ пред̾ тобо́ю всѧ́къ живы́й.

³ѩ҆́кѡ погна̀ вра́гъ дѹ́шѹ мою̀: смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ѩ҆́кѡ мє́ртвыѧ вѣ́ка.

⁴И҆ ѹ҆ны̀ во мнѣ̀ дѹ́хъ мо́й, во мнѣ̀ смѧте́сѧ се́рдце моѐ.

⁵Помѧнѹ́хъ дни҄ дрє́внїѧ, поѹчи́хсѧ во всѣ́хъ дѣ́лѣхъ твои́хъ, въ творе́нїихъ рѹкѹ̀ твоє́ю поѹча́хсѧ.

⁶Воздѣ́хъ къ тебѣ̀ рѹ́цѣ моѝ: дѹша̀ моѧ̀ ѩ҆́кѡ землѧ̀ безво́днаѧ тебѣ̀.

⁷Ско́рѡ ѹ҆слы́ши мѧ̀, гд҇и, и҆зчезѐ дѹ́хъ мо́й: не ѿвратѝ лица̀ твоегѡ̀ ѿ менє̀, и҆ ѹ҆подо́блюсѧ низходѧ́щымъ въ ро́въ.

⁸Слы́шанѹ сотворѝ мнѣ̀ заѹ́тра мл҇ть твою̀, ѩ҆́кѡ на тѧ̀ ѹ҆пова́хъ: скажѝ мнѣ̀, гд҇и, пѹ́ть, въ ѻ҆́ньже пойдѹ̀, ѩ҆́кѡ къ тебѣ̀ взѧ́хъ дѹ́шѹ мою̀.

⁹И҆зми́ мѧ ѿ вра҄гъ мои́хъ, гд҇и, къ тебѣ̀ прибѣго́хъ.

¹⁰Наѹчи́ мѧ твори́ти во́лю твою̀, ѩ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вѹ.

¹¹И҆́мене твоегѡ̀ ра́ди, гд҇и, живи́ши мѧ̀ пра́вдою твое́ю: и҆зведе́ши ѿ печа́ли дѹ́шѹ мою̀:

¹²и҆ мл҇тїю твое́ю потреби́ши врагѝ моѧ҄ и҆ погѹби́ши всѧ҄ стѹжа́ющыѧ дѹшѝ мое́й: ѩ҆́кѡ а҆́зъ ра́бъ тво́й є҆́смь.