Read Библия Церковнославянская Ѱалти́рь 144 Bible Online

Ѱалти́рь 144 - Библия Церковнославянская bible

Ѱалти́рь 144

¹ Вознесѹ́ тѧ, бж҃е мо́й, цр҃ю̀ мо́й, и҆ благословлю̀ и҆́мѧ твоѐ въ вѣ́къ и҆ въ вѣ́къ вѣ́ка.

²На всѧ́къ де́нь благословлю́ тѧ, и҆ восхвалю̀ и҆́мѧ твоѐ въ вѣ́къ и҆ въ вѣ́къ вѣ́ка.

³Ве́лїй гд҇ь и҆ хва́ленъ ѕѣлѡ̀, и҆ вели́чїю є҆гѡ̀ нѣ́сть конца̀.

⁴Ро́дъ и҆ ро́дъ восхва́лѧтъ дѣла̀ твоѧ҄ и҆ си́лѹ твою̀ возвѣстѧ́тъ:

⁵великолѣ́пїе сла́вы ст҃ы́ни твоеѧ̀ возглаго́лютъ и҆ чѹдеса̀ твоѧ҄ повѣ́дѧтъ:

⁶и҆ си́лѹ стра́шныхъ твои́хъ рекѹ́тъ и҆ вели́чїе твоѐ повѣ́дѧтъ:

⁷па́мѧть мно́жества бл҃гости твоеѧ̀ ѿры́гнѹтъ и҆ пра́вдою твое́ю возра́дѹютсѧ.

⁸Ще́дръ и҆ мл҇тивъ гд҇ь, долготерпѣли́въ и҆ многомл҇тивъ.

⁹Бл҃гъ гд҇ь всѧ́чєскимъ, и҆ щедрѡ́ты є҆гѡ̀ на всѣ́хъ дѣ́лѣхъ є҆гѡ̀.

¹⁰Да и҆сповѣ́дѧтсѧ тебѣ̀, гд҇и, всѧ҄ дѣла̀ твоѧ҄, и҆ прпдбнїи твоѝ да благословѧ́тъ тѧ̀:

¹¹сла́вѹ цр҇твїѧ твоегѡ̀ рекѹ́тъ и҆ си́лѹ твою̀ возглаго́лютъ,

¹²сказа́ти сыновѡ́мъ человѣ́чєскимъ си́лѹ твою̀ и҆ сла́вѹ великолѣ́пїѧ цр҇твїѧ твоегѡ̀.

¹³Цр҇тво твоѐ цр҇тво всѣ́хъ вѣкѡ́въ, и҆ влдчество твоѐ во всѧ́комъ ро́дѣ и҆ ро́дѣ. Вѣ́ренъ гд҇ь во всѣ́хъ словесѣ́хъ свои́хъ и҆ прпдбенъ во всѣ́хъ дѣ́лѣхъ свои́хъ.

¹⁴Ѹ҆твержда́етъ гд҇ь всѧ҄ низпа́дающыѧ и҆ возставлѧ́етъ всѧ҄ низве́ржєнныѧ.

¹⁵Ѻ҆́чи всѣ́хъ на тѧ̀ ѹ҆пова́ютъ, и҆ ты̀ дае́ши и҆̀мъ пи́щѹ во благовре́менїи:

¹⁶ѿверза́еши ты̀ рѹ́кѹ твою̀ и҆ и҆сполнѧ́еши всѧ́кое живо́тно бл҃говоле́нїѧ.

¹⁷Првднъ гд҇ь во всѣ́хъ пѹте́хъ свои́хъ и҆ прпдбенъ во всѣ́хъ дѣ́лѣхъ свои́хъ.

¹⁸Бли́з̾ гд҇ь всѣ҄мъ призыва́ющымъ є҆го̀, всѣ҄мъ призыва́ющымъ є҆го̀ во и҆́стинѣ:

¹⁹во́лю боѧ́щихсѧ є҆гѡ̀ сотвори́тъ, и҆ моли́твѹ и҆́хъ ѹ҆слы́шитъ, и҆ сп҃се́тъ ѧ҆̀.

²⁰Храни́тъ гд҇ь всѧ҄ лю́бѧщыѧ є҆го̀, и҆ всѧ҄ грѣ́шники потреби́тъ.

²¹Хвалѹ̀ гд҇ню возглаго́лютъ ѹ҆ста̀ моѧ҄: и҆ да благослови́тъ всѧ́ка пло́ть и҆́мѧ ст҃о́е є҆гѡ̀ въ вѣ́къ и҆ въ вѣ́къ вѣ́ка.